Ижкар-10 °C
9 -тӥ южтолэзь 2021 Пуксён
18+

Кузебай Гердлэн вордӥськем нуналаз солэн Ижкарысь синпелетэз доры сяськаос понӥзы

  • 85
  • 0
Ижкар / Удмуртия
Кузебай Гердлэн вордӥськем нуналаз солэн Ижкарысь синпелетэз доры сяськаос понӥзы
Туспуктэм: Константин Вознесенских

Туннэ, 14-тӥ толшоре, удмурт кылбурчилы, югдытӥсьлы, мер ужасьлы Кузебай Гердлы (Кузьма Павлович Чайниковлы) 123 ар тырмысал. Солы сӥзьыса, Ижкарысь синпелетэз дорын буре ваён но сяська понон ужрад ортчиз. Отчы «Удмурт Кенеш» огазеяськонлэн ёзчиосыз, дышетӥсьёс, Кун Кенешысь депутатъёс, Кузебай Герд нимо йӧскалык гимназиын дышетскисьёс, журналистъёс пыриськизы.

«Удмурт Кенеш» огазеяськонлэн тӧроез Татьяна Ишматова Кузебай Гердлэн вордӥськем нуналэз табере катэн тодэ ваён нунал сямен юнматэмын шуыса пусйиз.

Кезьыт куазь ке но, коронавирус ке но, асьмеос нокызьы татчы лыктытэк ум быгатӥське, малы ке шуоно Кузебай Герд - со одӥгез асьме понна югдытӥсьмы луэ, кудӥзлэсь ужзэ азинтэ «Удмурт Кенеш» огазеяськон но, йӧскалык музей но, йӧскалык гимназимы но, йӧскалык библиотекамы но. Оглом вераса, ваньмы. Малы ке шуоно соослэсь ужзэс ке ӧм азинтэ, луоз-а мед-а азинлыкез асьме элькунмылэн, асьме калыкмылэн
Татьяна Ишматова, «Удмурт Кенеш» огазеяськонлэн тӧроез

Кун Думаысь депутат Алексей Загребин пусйиз, Кузебай Гердлэн вордӥськем нуналэз катэн юнматэм нунал гинэ ӧвӧл, асьме понна со - адями. Адями, кудӥз асьмелы кин луиськом луыны сётӥз.

Со шуиз: «Тодады возе но данъяське, тӥ удмуртъёс шуыса. Ас лулчеберетэныды данъяське, ас музъеменыды данъяське». Татысь номырзэ уд но кулэсты, номыр уд но ватса, азьланьтод гинэ. Азьланьтом солэсь ужзэ. Сое тодамы возём, малы ке шуоно со ке ӧй луысал, асьмеос ӧй луысалмы. Луысалмы, но луысалмы мукет
Егор Загребин, Кун Думаысь депутат

Удмуртиысь Кузебай Герд нимо йӧскалык музейлэн кивалтӥсез Александр Волков музейзы 100 ар улон сюресэз ӵоже зол воштӥськиз шуыса вераз. Туннэ со элькунмылэн музей ужъя, лулчеберетъя но югдытонъя, методикая бадӟым центрез луэ. Арлы быдэ отчы 150 сюрслэсь трос куноос вуыло, 1 сюрс 500-лэсь трос экскурсиос ортчо, пӧртэм ӧръёсъя 68 адӟытон ӵектосъёс улонэ пыӵатӥсько.

Ми кылдытӥсьёсыныз - Кузебай Гердэн, Михаил Ильинэн, Герман Сидоровен но трос, трос мукетъёсыныз - ӝутэм планкаез вылӥын возьыны тыршиськом
Александр Волков, Удмуртиысь Кузебай Герд нимо йӧскалык музейлэн кивалтӥсез

Кузебай Гердлэсь нимзэ нуллэменызы данъяськемзэ Ижкарысь йӧскалык гимназилэн кивалтӥсез Татьяна Волкова но шараяз. Ужрадэ зэмзэ но удмуртлык понна висись, Гердлэсь ужзэ азинтон понна сюлмаськись муртъёс люкаськизы шуыса пусйиз.

Верало озьы, нылпиосты, пе, кылын гинэ дышетыны уг яра, ас ужъёсыныд возьматыса дышетыны, будэтыны, визьноданы кулэ. Соин ик ми татын. Шумпотӥсько, зэмзэ но ми татчы люкаськыны быгатӥмы шуыса, оскисько, арысь аре нокин косытэк татчы эшшо но тросгес адямиос люкаськылозы шуыса
Татьяна Волкова, Кузебай Герд нимо йӧскалык гимназилэн кивалтӥсез

Ужрадэз йылпумъяса, йӧскалык гимназиын дышетскисьёс Кузебай Гердлэсь кылбуръёссэ лыдӟизы. Нош бӧрысь мылкыд карисьёс понна йӧскалык музейлэн вань адӟытонъёсызъя дунтэк экскурсия ортчытӥзы. 

Кузебай Гердлэн синпелетэз доры сяська понон

9 фото



Наверх
Вниз