Ижкар-12 °C
28 -тӥ тулыспал 2021 Воскресенье
18+

Экономика тодосъя доктор Михаил Шишкин улонысь кошкиз Удмуртиын

  • 82
  • 0
Ижкар / Удмуртия
Экономика тодосъя доктор Михаил Шишкин улонысь кошкиз Удмуртиын
Туспуктэм: vk.com (УДМУРТ КЕНЕШ official)

21-тӥ толшоре Удмуртиысь тодос удысысь сӥё-дано ужась, «Удмурт Кенеш» огазеяськонлэн нырысетӥ тӧроез, Кузебай Герд нимо премилэн лауреатэз, экономика тодосъя доктор, профессор Михаил Шишкин улонысь кошкиз. Со сярысь «Удмурт Кенеш» огазеяськонлэн пресс-службаез ивортӥз.

Михаил Ивановичлы 79 арес вал. Со шаерамы но, быдэс финн-угор дуннеын тодмо адями луэ, пусйизы огазеяськонлэн ивортоназ.

Михаил Иванович туж яратэ вал удмурт калыкмес, соин котьку сюлмаськиз соосыз огазеясь кенеш кылдытон сярысь. Уно аръёс ӵоже кужымзэ но дырзэ жалятэк ужаз мерлыко удысын, трос йӧскалык кадръёсты будэтӥз. Мукет удмурт азьветлӥсьёсын артэ Россиын улӥсь финн-угор калыкъёсты но огазеяны быгатӥз. Финн-угор кусыпъёсты шедьтон но асьме ӵыжы-выжы луэммес шараян понна уж нуиз
«Удмурт Кенеш» огазеяськонлэн пресс-службаез

Ивортодэтъя «Удмуртия» агентстволэн редакциез Михаил Ивановичлэн ӵыжы-выжыосызлы но матысь адямиосызлы мур куректэмзэ вера.

ВАТСАН

Михаил Иванович Шишкин 1941-тӥ арын 14-тӥ инвожое УАССР-ысь Можга ёросысь Ныши-Какси гуртын колхозын ужасьёслэн семьяязы вордӥськиз. Отын ик покчи классъёсты йылпумъяса, шор ёзо школазэ Можга черкогуртын быдтӥз. Школа бере вордскем гуртысьтыз «Красный путь» колхозын пудо возьмась луыса ужаз, колхоз клубен кивалтӥз, колхозысь комсомолъёслэн секретарьзы луылӥз. 1959-тӥ арын Ижкарысь гурт возёсъя институтысь зоотехния факультетэ дышетскыны пыриз. 1964-тӥ арын сое Кезысь кун станцие племенной ужъя валтӥсь зоотехник луыса ужаны келязы. 1965-тӥ арын со уж интые ик Дэбесысь гурт возёсъя производственной управление выжтӥзы. 1970-1971 аръёсы Михаил Шишкин Дэбес ёросын гурт возёс вузъёсты басьтонъя но ӟечлыксыя валтӥсь кун инспектор луыса тыршиз. Собере сое ёросысь Ужасьёслэн депутат кенешсылэн исполкоменыз кивалтӥсе бырйизы. 1975-тӥ арын КПСС-лэн Дэбес ёрос комитетэзлэн секретарез интые юнматӥзы. 1978-тӥ арын КПСС-лэн Удмурт улосвыл комитэтэзлэн кыкетӥ секретарез луиз. 1980-1981 аръёсы Афганистанын выль кивалтӥсьёслы ужзэс радъяны юрттӥськиз. Бӧрысь азьвыл уж интыяз берытскиз. 1982-тӥ арын Михаил Ивановичез Мер тодосъя академие ватсаса тодон-валан люканы келязы. 1984-тӥ арын дышетсконзэ йылпумъяз. Со вакытэ ик со экономика тодосъя кандидат луон понна диссертация гожтӥз но 1983-тӥ арын утиз. 1984-1988 аръёсы УАССР-ысь Планъя кун комитетэз кивалтӥз. 1988-1994 аръёсы – СССР-ысь тодосъя академилэн Урал ёзэтысьтыз Экономикая институтысь тодосъя но эскеронъёсъя «Содружество» ужъюртын (Россиысь тодосъя академиын) секторен кивалтӥсь, кивалтӥсьлэн воштӥсез луыса ужаз. Со вакытэ ик, 1990-тӥ арын, экономика тодосъя доктор луыны диссертацилы материал люказ но ужзэ утиз. 1994-2004 аръёсы – Ижкарысь гурт возёсъя институтын (Ижкарысь гурт возёсъя кун академиын) гурт возёс экономикая кафедраен кивалтӥз. 1995-тӥ арын Удмуртиысь Кун Кенешлэн Контрольной палатаезлэн ялан ёзчиез луиз, 1997-тӥ арысен – тӧроез. 2004-2012 аръёсы Россиысь тодосъя академилэн Урал ёзэтысьтыз Философияя но правоя институтэзлэн удмурт филиалэныз кивалтӥз. Мер уже туж мыло-кыдо пыриськиз. 1990-тӥ аръёс кутсконын Михаил Шишкин удмурт, финн-угор движениослэн одӥгез азьветлӥсьсы луэ вал. 1991-1993 аръёсы «Удмурт Кенеш» огазеяськонлэн нырысетӥ тӧроез луыса тыршиз. Михаил Иванович 150-лэсь трос тодосъя ужъёс, со пӧлын монографиос, книгаос, экономика удысын шуг-секытъёсъя тодосъя но методикая пособиос, гожтӥз. Со кивалтэм улсын экономика тодосъя 40-лэсь трос кандидатъёс дасяськизы. Михаил Иванович «Заслуженный деятель науки Удмуртской Республики» (1995 ар), «Заслуженный экономист Российской Федерации» (1999 ар) дано нимъёсын,  Ужысь Горд Знамя орденэн (1982-тӥ ар), «За доблестный труд. В ознаменование 100-летия со дня рождения Владимира Ильича Ленина» медален (1970 ар) но мукет данъетъёсын пусъёмын.


Наверх
Вниз