Ижкар-18 °C
26 -тӥ тулыспал 2021 Удмуртарня
18+

Удмуртиысь студотрядъёсы пыриськисьёс 17-тӥ тулыспалэ ӧнер нуналзэс пусъё

  • 392
  • 0
Ижкар / Удмуртия
Удмуртиысь студотрядъёсы пыриськисьёс 17-тӥ тулыспалэ ӧнер нуналзэс пусъё
Туспуктэм: Удмуртиысь тӧролэн но кивалтэтлэн пресс-службазы

17-тӥ тулыспалэ Удмуртиысь тӧролэн но кивалтэтлэн администрациенызы кивалтӥсь Сергей Смирнов улосвылысьтымы студотрядъёсы пыриськисьёсын пумиськылӥз но егитъёсты Россиысь студентъёслэн отрядъёссылэн нуналэнызы ӟечкылаз. Со сярысь элькун тӧролэн но кивалтэтлэн пресс-службазы ивортӥз.

Сергей Смирнов студентъёслэн отрядъёсазы ортчытэм аръёссэ тодаз вайиз. Со вить ар ӵоже эшъёсыныз ӵош Астрахань улосвылэ ветлӥз.

Та движение быдэс выжыослэсь улонзэс воштэ. Кылсярысь, мынам анай-атае эм удысъя вылӥ дышетсконниысь студентъёслэн отрядзылы луыса тодматскизы. Вань пичи дырме мон соослэн эшъёссы пӧлын ортчытӥ. Ачим но кузпалыным отрядын ик пумиськи
Сергей Смирнов, Удмуртиысь тӧролэн но кивалтэтлэн администрациенызы кивалтӥсь

Элькун тӧролэн но кивалтэтлэн администрациенызы кивалтӥсь вуоно арын Удмуртиысь студентъёслэн движенизылы 55 ар тырмоз шуыса пусйиз. Озьы ик со студотрядъёсысь асьсэды умой возьматэм егитъёслы данъетъёс сётӥз.

Ужрад улсын котькуд мылкыд карись юан сётыны яке малпанъёссэ шараяны быгатӥз. Озьы егитъёс пӧртэм амалъёсын ужаны луонлыко интывыл кылдытыны, «Отрядный вираж» акци борды кивалтэт ёзэсъёсын ужасьёсты итыны но Гуртлэн арез улсын мукет улосвылъёсысь гурт возёс отрядъёсты элькунамы ӧтчаны ӵектӥзы.

Со сяна, пумиськонын движенилэн 2020-тӥ арын ужъя куинетӥ семестрезлы йылпумъянъёс лэсьтӥзы но азьланезлы ужпумъёс пуктӥзы. Кылем арын элькунысьтымы студотрядъёсысь егитъёс «МыВместе» огъяросси акци борды но «ПоддЕРжка» улосвыл ӵектос борды итӥськизы. Соос колл-центръёсын пӧсь герӟетъёсын ужазы, арлыдоослы но дорысьтызы потыны быгатӥсьтэм муртъёслы сиён-юонъёс но эмъюмъёс вуттылӥзы. Озьы ик «Волонтёры Конституции» огъяросси ӵектосэ пыриськизы.

Пусъём, Россиысь студентъёслэн отрядъёссылэн нуналзы туэ куатетӥзэ пусйиське. Та вакытэ Удмуртиын 52 отрядъёс лыдъясько – проводникъёслэн, гурт возёс, лэсьтӥськон, сервис, дышетон, катрадлыкез чаклан но эм удысъёсъя. Соос Удмурт кун университетын, Ижкарысь техникая М. Т. Калашников нимо  кун университетын, Ижкарысь гурт возёсъя кун академиын, Ижкарысь эм кун академиын, Ижкарысь монтажной техникумын, Глазкарысь техникая колледжын, Ярысь политехникумын но мукетъёсаз дышетсконниосын кылдытэмын. Отчы 2 сюрс пала егитъёс пырисько.



Наверх
Вниз