Ижкар+12 °C
16 -тӥ оштолэзь 2021 Удмуртарня
18+

Ижкар – Балезино чугун сюресэз усьтэм дырысен 76 ар тырмонэз пусйизы Удмуртиын

  • 1606
  • 0
Кекоран / Россия
Ижкар – Балезино чугун сюресэз усьтэм дырысен 76 ар тырмонэз пусйизы Удмуртиын
Туспуктэм: Удмуртиысь Кун Кенешлэн пресс-службаез

17-тӥ тулыспалэ Якшур-Бӧдья ёросысь Кекоран черкогуртын Ижкар – Балезино чугун сюресэз усьтэм дырысен 76 ар тырмонэз пусйизы. Лэсьтӥськисьёслы синпелет дорын митинг ортчиз. Со сярысь Удмуртиысь Кун Кенешлэн пресс-службаез ивортӥз.

Ужрадэ Кун Кенешысь ужъя, мерлыко политикая но ветеранъёслэн ужъёссыя ялан ужась ӧрилэн кивалтӥсез Алексей Чернов, Якшур-Бӧдья ёрослэн мерлыко ужпумъёсъя воштӥсез Ольга Протопопова, элькунысь транспортъя но сюрес возёсъя министерствоысь, Горький чугун сюреслэн ыстэм муртъёссы, лэсьтӥськонэз нуэмъёслэн ӵыжы-выжыоссы, шаерчиос, Кекоран школаысь дышетӥсьёс но пиналъёс пыриськизы.

Фронтлы туж кулэ луись сюресэз лэсьтон но уйпал но лымшор вайёсты огазеян понна кӧня ке сюрс тонна музъемез ас киосын гудон но поттон - зэмос уж подвиг. Пиналъёслэн, нылкышноослэн но пересьёслэн улонзы но ужзы Ижкар – Балезино чугун сюресэз лэсьтонын туж бадӟым инты басьтӥз
Алексей Чернов, Кун Кенешысь ужъя, мерлыко политикая но ветеранъёслэн ужъёссыя ялан ужась ӧрилэн кивалтӥсез

Ольга Протопопова дышетӥсьёслы но шаерчиослы егитъёсты визьнодамзы но трос аръёс ӵоже ни историез утемзы понна тау кариз. Солэн верамезъя, ёросысь шаертодонъя музей чугун сюресэз лэсьтӥсьёслэсь тодэ ваёнъёссэс гожтон понна грант утӥз. Якшур-Бӧдья ёросын сыӵе адямиос 28 гинэ кылемын на.

1997-тӥ арын Кекоранын, чугун сюресэз лэсьтонлэн тужгес секыт люкетаз, лэсьтӥськисьёслы синпелет пуктӥзы, нош 2016-тӥ арын Быдӟым Атыкай оже Узгинка станциысь кошкемъёслы «Журавушки» мемориал ӝутӥзы. Озьы кылдэм огъет ожын но ужын тыршисьёсты огазея.

Тодэ вайытом, 9-тӥ тулыспалэ Удмуртиын одӥгез 19 пӧлысь тодэ ваён нунал пусйиське - Ижкар – Балезино чугун сюресэз лэсьтонэз йылпумъян но уже кутон нунал. 



Наверх
Вниз