Ижкар-18 °C
26 -тӥ тулыспал 2021 Удмуртарня
18+

Видеоконференци амалэн «Бадӟым удмурт диктант Яр сямен» гожтӥзы Яр ёросын

  • 330
  • 0
Яр / Удмуртия
 Видеоконференци амалэн «Бадӟым удмурт диктант Яр сямен» гожтӥзы Яр ёросын
Туспуктэм: Фаина Васильева

Анай кыллэн калыккуспо нуналэз азьын 19-тӥ тулыспалэ Яр ёросын видеоконференци амалэн «Бадӟым удмурт диктант Яр сямен» гожтӥзы. Со сярысь ивортодэтъя «Удмуртия» агентстволэн корреспондентэзлы Яр ёрос лыдӟетъюртысь методист, ужрадлэн радъясез Татьяна Малых ивортӥз.

«Бадӟым удмурт диктант Яр сямен» видеоконференци амалэн туэ нырысьсэ ортчиз. Татьяна Малыхлэн верамезъя, ужрадэз выль сямен туж сюлмаськыса радъяз, но ваньмыз туж умой пӧрмиз.

Калык вӧзын ӧвӧл бере, уд адӟиськы ваньзэсты. Гожтыса вуттӥзы-а ни, ӧз-а, лыдӟоно-а. Собере, ог-огзылы медаз люкетэ шуыса, куаразэ кысыны косӥ. Соин соослэн, оло, верамзы потэ но, мон соосты уг кылӥськы. Мон соослы шуисько, уд ке вуиське, киыныды возьматэ шуыса. Но калыкъёс шуиллям туж яраз, эшшо но таӵе ужрад ортчытэ шуыса
Татьяна Малых, ужрадэз радъясь

Со сяна, азьвылгес диктантэз очной амалэн но гожтӥзы. Ужрад 16-тӥ тулыспалэ Яр ёрос лыдӟетъюртын ортчиз. Озьы, 2021-тӥ арын диктантэз Яр ёросын оглом 46 адями гожтӥз: 37-эз – видеоконференция амалэн, укмысэз – очной амалэн.

Мон понна со бадӟым вормон. Малы ке шуоно кылем аръёсы 15-озь гинэ люкаськылӥзы. <…> Тужгес трос Биграгуртысь калык вал – 10 адями, Никольскысь – тямыс адями
Татьяна Малых, ужрадэз радъясь

Туэ ужрадэз куатетӥзэ ортчытӥзы ини. Элькунамы ялэм Гуртлэн арезлы сӥзьыса, Геннадий Красильниковлэн «Тонэн кылисько» повестьысьтыз люкетсэ лыдӟизы.

«Бадӟым удмурт диктант Яр сямен» ужрадэз ми калык элькун «Бадӟым удмурт диктантлы» мед дасяськоз шуыса малпамы. Яр ёросын туж ӧжыт калык удмурт сямен вераське. Котькуд аре мон абдраса учкисько лыктэмъёсмылы, кудъёсыз сярысь уд но малпа вал удмуртэз валало шуыса, эшшо ик гожъясько шуыса
Татьяна Малых, ужрадэз радъясь

Татьяна Малых пусъе, бӧрысь та диктантэз гожтэмъёс ик «Бадӟым удмурт диктантэ» но мыло-кыдо пырисько.

Яр ёросын диктантын шонер гожъяськемез эскерем сяна, пыриськисьёсты куинь номинацияя пусъё: тужгес арлыдоез гожтӥсь, тужгес егитэз гожтӥсь но чебер почерк.

Тужгес арлыдоез милям котькуд аре ветлэ Ярысь Булдакова Фаина Андреевна. Со 1940-тӥ аре вордӥськемын, 81 арес солы луоз ини ӵапак ӵуказе, Анай кыллэн калыккуспо нуналаз. Тужгес егитэз Юдчиноысь Бабинцева Милана, солы 12-13 арес
Татьяна Малых, ужрадэз радъясь

Нош тужгес чебер гожъяськисьлэсь нимзэ 26-тӥ тулыспалэ шараялозы, соку ик диктантлэн йылпумъянъёсыз но тодмо луозы.

Тодэ вайытом, Яр ёросын Флор Васильев нимо «Тюрагай» премиез басьтӥсьёсты пусйизы

Ватсалом, 2021-тӥ арын Бадӟым удмурт диктантэз 3-тӥ оштолэзе ортчытозы. Текстсэ кылбурчи, драматург Владимир Котков гожтоз.



Наверх
Вниз