Ижкар+12 °C
10 -тӥ куартолэзь 2021 Вордӥськон
18+

Ижкарысь кык школаослы Быдӟым Атыкай ожысь геройёслэсь нимъёссэс сётозы

  • 433
  • 0
Ижкар / Удмуртия
Ижкарысь кык школаослы Быдӟым Атыкай ожысь геройёслэсь нимъёссэс сётозы
Туспуктэм: Руслан Нуриахметов

Ижкарысь кык школаослы Быдӟым Атыкай ожысь геройёслэсь нимъёссэс сётозы. Со сярысь пумкылъян 24-тӥ южтолэзе Ижкар администрациысь историяя но лулчеберетъя синпелетъёсты утёнлы, ульчаослы, пролкаослы но дугдылонниослы ним сётонлы но воштонлы юрттонъя ӧрилэн кенешоназ кутӥзы, ивортэ Ижкар администрацилэн пресс-службаез.

Совето Союзысь маршаллэсь Фёдор Яковлевич Фалалеевлэсь нимзэ 87 номеро шор ёзо школалы сётозы. Сыӵе куронэн школаын дышетскисьёс вазиськизы. Пиналъёс улосчимы сярысь трос гинэ материал дасязы ини.

Со сяна, 87 номеро школаысь дышетӥсьёс Фёдор Фалалеевлэсь нимзэ туала Смоленской урамлы но сётыны ӵектӥзы, ӵапак отын дышетон юрт интыяське. Ӧри ӵектонзэс умоен лыдъяз. Урамлэсь нимзэ воштон нокинлы шугъяськонъёс уз вайы, уго со борды юнматэм юртъёс ӧвӧл.

Фёдор Яковлевич Фалалеев 1899-тӥ арын 31-тӥ куартолэзе вордӥськиз. Совето ожгарчи, авиациысь маршал. 1942-1943 аръёсы со «Нормандия - Неман» истребительной авиационной полк кылдытонъя но ужзэ радъянъя вачевераськонъёсын СССР-ысь ыстэм валтӥсь мурт вал. 1946-1950 аръёсы Москва улосвылысь Монино каргуртысь Военно-воздушной академиен кивалтӥз. Улонысь 1955-тӥ арын 12-тӥ гудырикошконэ кошкиз. Солэсь нимзэ Монино каргуртысь школа но Удмуртиысь Можга ёросысь Уча черкогуртысь школа нулло, Фёдор Фалалеев ӵапак татын дышетскиз 

100 номеро шор ёзо школа Ожгар-зарезь флотысь вице-адмираллэсь, Совето Союзысь Геройлэсь Валентин Георгиевич Стариковлэсь нимзэ нуллоз.

Ижкарысь Ленин ёросын нылпиослы «Дельфин» зарезь центр ужа. Солэн пинал морякъёсты дасянъя бадӟым опытэз ини, тросэз дышетскисьёсыз Россиысь ожгар-зарезь флотын службазэс нуизы. Центрын 100 номеро школаысь пиналъёс но тодон-валан люкало. Со сяна, школалэн спортъя инфраструктураез  ожгар-зарезь ӧрез азинтыны но атыкай музъемез гажан мылкыд пыӵатон ужез нуыны луонлык сёто.

Валентин Георгиевич Стариков 1913-тӥ арын 8-тӥ инвожое вордӥськиз. Подводник. Быдӟым Атыкай ож кутскыку, капитан-лейтенант Стариков ву ултӥ уясь «М-171» лодкалэн командирез вал. Ож аръёс ӵоже экипаженыз 29 ожгар походъёсы потаз, тушмонъёслэсь 14 транспортсэс но ожгар корабльёссэс выйтӥз. 1942-тӥ арын 3-тӥ оштолэзе Валентин Стариковлы Совето Союзлэн Героез ним сётӥзы, нош командаезлы – гвардейской ним. Улонысь 1979-тӥ арын 26-тӥ инвожое кошкиз. Нимзэ Ижкарысь Ялан ӝуась тыл дорысь Буре ваён пул вылэ пыртӥзы. Солэсь нимзэ Полярный карысь огез урам нуллэ, 2004-тӥ арысен – вордӥськем Сарапул карысьтыз нылпиослы «Норд» зарезь центр

Тодэ вайытом, Ижкарысь Столичной лицейлы Совето Союзысь Геройлэсь Евгений Кунгурцевлэсь нимзэ сётӥзы.



Наверх
Вниз