Ижкар+1 °C
13 -тӥ оштолэзь 2021 Пуксён
18+

Куать ӵектосъёсты быдэстозы Дэбес ёросын «Милям кичӧлтонмы» элькун программа улсын

  • 543
  • 0
Дэбес / Удмуртия
Куать ӵектосъёсты быдэстозы Дэбес ёросын «Милям кичӧлтонмы» элькун программа улсын
Туспуктэм: Руслан Нуриахметов

«Милям кичӧлтонмы» («Наша инициатива») элькун программа улсын Дэбес ёросын куать ӵектосъёсты улонэ пыӵатозы. Со понна оглом 7 миллион манетлэсь трос коньдон уже кутэмын луоз. Со сярысь ёрослэн тӧроез Андрей Иванов «ВКонтакте» мерлыко вотэсысь бамаз ивортӥз.

Ӵектосъёсты быдэстон матысь дыре кутскоз ни.

- Дэбес черкогуртын Речной ульчаысь 840 метр мында сюрес шобретэз тупатъялозы. Солы 2 миллион 579 сюрс манет висъязы. Вормонлы 50 ар ульчаын 950 метр сюресэз выльдозы. Ужъёс 2 миллион 195 сюрс манет тыр усёзы;

- Лесагуртысь Восточной ульчалэсь 700 метрзэ тупатъялозы. Ӵектослэн дуныз – 1 миллион 568 сюрс манет;

- Данёгуртын (Старый Кыч) 641 метръем Труд ульчаез выльдозы. Со понна 1 миллион 395 сюрс манет висъялозы;

- Сылӥӟдур (Малый Зетым) гурын асфальт пырылэсь пыдын ветлон сюрес лэсьтозы, солэн кузьдалаез 1,3 иськем луоз. Ӵектослэн дуныз – 944 сюрс манет;

- Смольники гуртын улӥсьёс шайвылэз котыртыны мылкыд каризы, кичӧлтонзэс быдэстыны 346 миллион манет быдтозы.

Тодэ вайытом, «Милям кичӧлтонмы» программалэн вожвылъяськоназ 2021-тӥ арын Удмуртиын 300 пала ӵектосъёс вормизы.



Наверх
Вниз