Ижкар+1 °C
13 -тӥ оштолэзь 2021 Пуксён
18+

Россилэн азьмуртэз перепись дыръя йӧслыкез вераку зӥбон учыръёсты уретыны куриз

  • 486
  • 0
Москва / Россия
Россилэн азьмуртэз перепись дыръя йӧслыкез вераку зӥбон учыръёсты уретыны куриз
Туспуктэм: Григорий Фомин

Азьмурт бордын йӧскалык ужпумъёсъя кенешлэн заседанияз Владимир Путин калыкез лыдъян-гожтон ужрад дыръя адямиослы ас йӧслыксэс эрико вераны луонлык сётоно шуыса пусйиз, соин валче Статистикая кун ёзэсэз но Валтӥсь прокуратураез Кункатэн пусъем эрикрадэз быдэсъямез чакланы куриз. Со сярысь  кун кивалтӥсьлэн пресс-службаез ивортӥз.

Кин ке ласянь зӥбыны тыршемез, уката ик выжыя ултӥямез соку ик уретыны кулэ
Владимир Путин, Росси Федерацилэн азьмуртэз

Ватсалом, туэ нырысьсэ кунмуртъёс анай кылынызы кык но солэсь трос кылъёсты вераны быгатозы, но лыдэ басьтозы нырысетӥ радэ поттэмзэ. Со сярысь «Удмурт Кенеш» огазеяськонлэн XIV ӧтчамаз Удмуртиысь йӧскалык политикая министр Лариса Буранова вераз. Калыкез лыдъян-гожтон 2021-тӥ арын куарусёнэ ортчоз.

Озьы ик кун кивалтӥсь 2021-тӥ ар пумозь Россиысь Кун Дума «Росси Федерациысь калыкъёслэн кылъёссы сярысь» катэ воштонъёсты куинетӥ лыдӟемен кутоз шуыса ивортӥз. Отын кунысь калыкъёслэсь анай кылъёссэс утён, соосты дышетон но азинтон понна кунлэн кылкутонэз пусъемын луоз.

Озьы ик азьмурт пусйиз, трос экспертъёс юрттэмен, кивалтэт кылъёсъя кун политикалэсь учкетсэ (концепция) дася шуыса.

Туннэ 80 процентэз Россилэн кунмуртъёсыз кунысь йӧскалык кусыпъёсъя югдурез умоен дунъяло. Но та ужпумъёс ялан, мон шуысал котькуд нунал ужамез кулэ каро. <…> Соин ик мон эшшо одӥг пол верасько: йӧскалык политикаез быдэсъян ужпумъёслы, уката ик интыосын, саклык ялан висъяны кулэ, нош ужъёсты чакласькыса, валаса нуоно
Владимир Путин, Росси Федерацилэн азьмуртэз

Путин Кенешлэсь ёзчиоссэ катрадлык кылдытон уже мыло-кыдогес пыриськыны, депутатъёслы визь-кнешен юрттонэз радъяны куриз. 

Тодэ вайытом, Ижкарын кун йӧскалык политикалэсь 2025-тӥ арозь стратегизэ быдэсъянэз Удмуртия вылын эскеронлы сӥзем ӝӧк ортчиз. Кун Думаысь йӧслык ужъёсъя комитетлэн кивалтӥсез Валерий Газзаев элькунамы улӥсьёслэсь умой кусыпъёссэс пусйиз.



Наверх
Вниз