Ижкар+13 °C
13 -тӥ куартолэзь 2021 Покчиарня
18+

50 адями Бадӟым удмурт диктантэз 100 баллы гожтӥз

  • 968
  • 0
Ижкар / Удмуртия
50 адями Бадӟым удмурт диктантэз 100 баллы гожтӥз
Туспуктэм: Григорий Фомин

2021-тӥ арын Бадӟым удмурт диктантэз 50 адями 100 баллы гожтӥз. Оглом ужрадэ 1 сюрс 500-лэсь трос адями пыриськиз. Со сярысь ивортодэтъя «Удмуртия» агентстволы ужрадэз огез радъясь, элькунысь йӧскалык политикая министерствоысь ӧнерчи Елизавета Ложкина.

50 мурт гожтӥз янгышъёстэк – 100 баллы. Шор баллэз туэ - 84,7. Оглом, площадкаосын но, радиодиктант, теледиктант гожтэмъёс но 1 сюрс 504 адями. Соос пӧлысь площадкаосын гожтӥз 747 мурт. Пыриськизы вань муниципал кылдытэтъёс Удмурт Элькунысь, Каракулино сяна (отын удмуртъёссы трос ӧвӧл)
Елизавета Ложкина, Удмуртиысь йӧскалык политикая министерствоысь ӧнерчи

Елизавета Ложкиналэн кылъёсызъя, туэ ужрадлы школаосын бадӟым саклык висъязы, соин ик 39,2 процентэз вань пыриськемъёс – 9-17 аресъем пиналъёс. 29,5 процентэз – 36-60 аресъем муртъёс. Азьвыл аръёсы 36 ареслэсь бадӟымъёс тужгес мыло-кыдоесь вал. 

Пусъем арлыдзэс учконо ке, тужгес пинал пыриськисьёслы 9 арес (10 мурт), 80 арессэс ортчемъёс укмыс кузя вал. Тужгес арлыдоез – 94 арес – Кияса ёросын улӥсь, со ужез понна 90 балл басьтӥз.

Удмуртиын диктант гожтыны 45 площадкаос радъямын вал, элькунлэн палэназ – 13. Удмурт кылын шонер гожъяськыны быгатэмзэс эскеризы Башортостанын (Татышлы, Янаул ёросъёсын, Янаул, Нефтекамск каръёсын улӥсьёс), Татарстанын (Агрыз, Балтаси, Кукмор ёросъёсын), Москваын но Москва улосвылын, Пермь шаерын, Махачкалаын но Нижневартовскын. Оглом 200-лэсь трос адями.

Диктантэз онлайн амалэн (текстэз радио но телевидение пыр лыдӟем улсын) 757 адями гожтӥз. Соослэсь почта пыр келям ужъёссэс Удмурт кун университетысь Удмурт кылосбуръя финно-угороведениея но журналистикая институтын эскеризы.

Статистикаез лыдэ басьтоно ке, туэ результатъёс трослы умойгес. 13 мурт чылкак янгыштэк гожтэмын – 100 балл, но 99 баллы но гожтӥсьёсыз ӧжыт ӧвӧл. Шор балл милям лыдъяммыя туэ луиз 91,5 - со туж трос, азьло аръёсы 80 но кӧня ке гинэ луэ вал
Ольга Стрелкова, кылосубр тодосъя кандидат

Ольга Стрелковалэн верамезъя, туэ текст сокем секыт ӧй вал, тросгес вакчи предложениос пыртэмын. Соин ик янгышъёс ӧжытгес луизы, угось азьвыл ӵапак кузь предложениосын пусъёс пуктылон ласянь ӵемгес янгышало вал. Но текстэз юри капчиятыны кулэ ӧвӧл, лыдъя тодосчи.

Чылкак капчи текст сётоно ке, шуом, арлыдоослы со чик но тунсыко уз луы. Но туж секыт сётоно ке, нылпиослэн гожъяськыны мылкыдзы уз луы. <…> Соин ик со шоро-куспо луыны кулэ, дыр, текст. Но шорзэ, вадессэ шедьтыны, валамон ини, милемлы но шуг, гожъясьёслы но со шуг
Ольга Стрелкова, кылосубр тодосъя кандидат

Елизавета Ложкина ивортэмъя, диктантлэсь текстсэ но ужъемышъёсты Бадӟым удмурт диктантлэн сайтаз 1-тӥ куартолэзьысен поттозы (али сайт выльдӥське – ред.). Со сяна, удмурт кылъя выль тест но интыялозы. Отысь ик электрон сертификатэз кыскыны луоз.

Тодэ вайытом, удмурт кылын шонер гожъяськыны быгатонэз эскерон ужрад 10-тӥ ползэ 3-тӥ оштолэзе ортчиз. Диктантлы текст Владимир Котков гожтӥз.

Ватсалом, 2020-тӥ арын удмурт диктантэз онлайн амалэн 638 адями гожтӥз, пандэмиен сэрен нимаз площадкаос ӧз радъяське. Удмурт кылэз вӧлмытон вылысь Бадӟым удмурт диктантэз «Удмуртия» телерадиокомпания, йӧскалык политикая министерство, Удмурт кун университетысь Удмурт кылосбуръя, финно-угроведениея но журналистикая институт, «Удмурт Кенеш» ортчыто.



Наверх
Вниз