Ижкар+2 °C
26 -тӥ коньывуон 2021 Пуксён
18+

Этнографияя диктантэз гожтӥсьёслэн лыдзыя Удмуртия кыкетӥ инты басьтӥз

  • 790
  • 0
Ижкар / Удмуртия
Этнографияя диктантэз гожтӥсьёслэн лыдзыя Удмуртия кыкетӥ инты басьтӥз
Фото: lentaregion.ru

Этнографияя диктантэз гожтӥсьёслэн лыдзыя Удмуртия кыкетӥ инты басьтӥз, тросгес вал Оренбург улосвылын гинэ. Персс-конференциын со сярысь ивортӥз улосвылысь йӧскалык политикая министр Лариса Буранова.

Солэн верамезъя, элькун диктант гожтыны тужгес трос интыос радъяз — быдэс Россиын 800 пӧлысь 72-сэ.

Кунъя шоро-куспо балл 100 пӧлысь 53,5 луиз. Тужгес умой лыдпусъёс Уйпал Кавказ федерал округ возьматӥз, шорлыдын 65,3 балл люказ. Удмуртиын — 53,3.

«Ми кунъя сыӵе ик йылпумъянъёсты чакламы вал. Со «куиньлы», со туж умой ӧвӧл, но чакланъёсмы мукет луысалзы ке, та ужрадэз ӧй малпасалмы», — пусйиз Буранова.

Диктантлы йылпумъянъёс возьматӥзы: улосвылъёсын улӥсьёс умойгес валэктонъёс сётӥзы асьсэ калыксылэн но интывылзылэн аспӧртэмлыкъёсыныз герӟаськем юанъёслы.

«Котырамы улӥсь адямиосты, калыкъёсты но калыкъёслэсь йылолъёссэс ми тодӥськомы. Приволжск федерал округын асьмеос мар но со тодӥськомы, кинъёс со бигеръёс, поръёс, чувашъёс. Нош кунлэн уйпалаз яке Кавказэ мыноно ке, отын тодон ӧжытгес ни. Озьы ик Кавказысь улосвылъёсын. Соос Кавказэз, Якутиез яке Приморьеез сярысь, умойгес тодо», — вераз министр.

Ужрадэ ваньмыз 42 сюрс 153 мурт пыриськиз, озьы ик 50 сюрс пала адями онлайн амалъя диктант гожтӥз. Удмуртиын — 2 сюрс 600 котыр. Диктант гожтӥсьёс пӧлын тросгес вал 30 аресозь егитъёс (78,1 процентэз). Сое валэктыны луоно унозэ площадкаосты дышетсконниосын радъямен. Умойгес тодонлыкъёссэс возьматӥзы 30 аресысен 49 аресозь адямиос.

4-тӥ коньывуонэ этнографияя бадӟым диктант Россиысь ваньмаз улосвылъёсын, озьы ик Турциын но Швейцариын ортчиз. Сое радъязы Россиысь Йӧскалык ужпумъёсъя федерал агентство, Удмуртиысь Йӧскалык политикая министерство но «Удмуртиысь калыкъёслэн ассамблеязы» огазеяськон.



Наверх
Вниз