Ижкар+3 °C
25 -тӥ коньывуон 2020 Воскресенье
18+

«Удмурт Кенешлэн» азьветлӥсьёсыз Трокай Борисовлы но Кузёбай Гердлы синпелетъёс доры сяськаос понӥзы

  • 597
  • 0
Ижкар / Удмуртия
«Удмурт Кенешлэн» азьветлӥсьёсыз Трокай Борисовлы но Кузёбай Гердлы синпелетъёс доры сяськаос понӥзы
Фото: Григорий Фомин

8-тӥ шуркынмонэ Ижкарын  Удмурт Кенешлэн» Пичи кенешез ортчиз. Солэсь азьвыл удмуртлыкез азинтон понна тыршисьёс, пелляськись куазь шоры учкытэк, Трокай Борисовлы но Кузёбай Гердлы синпелетъёс доры сяськаос понӥзы, ивортэ «Удмуртия» агентстволэн корреспондентэз. 

«Та пичи кенешмы сиземын 96 ар тырмонлы, кызьы удмурт калыклэн луиз аслаз кунлыкез. Асьмеос ваньмы тодӥськом, та лыдпус юн герӟаськемын Трокай Борисовлэн нимыныз, Кузёбай Гердлэн нимыныз. Мон малпасько, «Удмурт Кенеш» та нимъёсты тодын возем сяна, калыке поттыны кулэ. Асьмеос со бордын трос аръёс ӵоже ужаськом ини», — Пичи кенешез усьтыса, вераз «Удмурт Кенеш» огазеяськонлэн тӧроез Татьяна Ишматова.

Трокай Борисовлы но Кузебай Гердлы синпелетъёс доры сяськаос понон

5 фото

Пичи кенешын вань удмуртъёслэн XIII Бадӟым ӧтчамзы бере «Удмурт Кенешлэн» ужамез пумысен вераськизы, Огазеяськонлы 25 ар тырмонлы сизем сиё-дано ужрадэ, со 8-тӥ толсурлы чакламын, ӧтем куноослэсь лыдзэс юнматӥзы, Озьы ик 2016-тӥ арын «Удмурт Кенешлэн» Данъян книгаяз пыртэм адямиослы Оскытонэтъёсты сётӥзы но мукет пӧртэм ужпумъёсты сэрттӥзы-пертчизы.

ВАТСАН

Кузёбай Герд (Кузьма Павлович Чайников) вордскиз 1898-тӥ арын 14-тӥ толшоре туала Вавож ёросысь Почивуко гуртын. Удмурт кылбурчи, прозаик, драматург, йӧскалык но мер ужась. Трос лэсьтӥз удмурт кылэз, лулчеберетэз азинтон понна. Лулчеберетъя но тодосъя 120-лэсь трос статьяос гожтӥз (со пӧлысь 40-эз ӟуч кылын, 5-ез мадьяр, финн, немец кылъёсын), 20-лэсь трос книгаос поттӥз. Юри малпам ужъёсъя янгыше уськытыса, 1937-тӥ арын 1-тӥ шуркынмонэ ыбыса быдтэмын. Чылкыт нимыз берыктэмын 1961-тӥ арын.  Кузёбай Гердлы синпелетэз кылдытӥзы Анатолий Аникин но Виталий Яковицкий. Бронзалэсь лэсьтэм кылбурчи бадӟым из вылын пуке. Памятникез усьтӥзы 2005-тӥ арын 2-тӥ шуркынмонэ. Интыяськемын Коммунаръёслэн урамазы, Удмуртиысь Йӧскалык музеен артэ, со ужъюрт, озьы ик Ижкарысь урам Кузёбай Гердлэсь нимзэ нулло.  
Трокай (Трофим) Кузьмич Борисов — публицист, филолог, этнограф. Вордскиз 1891-тӥ арын 19-тӥ шуркынмонэ Алнаш ёросысь Кизекгуртын. Трос лэсьтӥз удмуртъёслэсь автономизэс кылдытон понна. Улонысь кошкиз 4-тӥ инвожое 1943-тӥ арын Актюбинск лагерьын (Узбекистанын). Трофим Борисовез шонере потто 20-тӥ куарусёнэ 1988-тӥ арын гинэ. Трокай Борисовлы синпелет пукытыны кичӧлтон сётӥз «Удмурт Кенеш» огазеяськон. Кылдытӥзы скульпторъёс Виктор Овчинников но Геннадий Кутлыбаев. Со гранитлэсь лэсьтэмын, ӝуждалаез 3 метр, инъетэзлэн ӝуждалаез – 1 метр, быдэсызлэн секталаез 5 но ӝыны тонна. Синпелетэз Ижарын сӥё-дано усьтӥзы 2012-тӥ арын 5-тӥ коньывуонэ. Интыяськемын Коммунаръёслэн ульчаязы.


Наверх
Вниз