Ижкар+3 °C
25 -тӥ коньывуон 2020 Воскресенье
18+

Ёросъёсысь удмурт азьветлӥсьёсты тужгес но сюлэмшугъяськытэ анай кылэз азинтон ужпум

  • 511
  • 0
Ижкар / Удмуртия
Ёросъёсысь удмурт азьветлӥсьёсты тужгес но сюлэмшугъяськытэ анай кылэз азинтон ужпум
Фото: Григорий Фомин

Ёросъёсысь удмурт азьветлӥсьёсты тужгес но сюлэмшугъяськытэ анай кылэз азинтон ужпум. Со сярысь вераськизы «Удмурт Кенеш» огазеяськонлэн 8-тӥ шуркынмонэ ортчем Пичи Кенешаз, ивортэ «Удмуртия» агентстволэн корреспондентэз.

«Туж сюлэммы висе, удмурт пиналъёсты туннэ ке но уг дышето на анай кылынызы гожъяськыны, лыдӟиськыны, вань школаосын удмурт классъёс ӧвӧл шуыса. Та пумысен ми, Можгаысь ёзчиос, 2013-тӥ арын гожтэт пыр вазиським вал ини Кун Кенешысь депутатъёслы. Озьы ик туэ Можга карын но ёросын быдэс армес сӥзим анай кыллы. <…> Туннэ Можга карын одӥг нырысетӥ школаын гинэ дышето удмурт кылэз, нош 20 нылпи сад пӧлысь 18-аз вань кружокъёссы. Соин ик милемлы, ёзчиослы, вань, мар бордын ужаны», — шуиз «Удмурт Кенешлэн» Можга ёросысь но карысь ёзэтэныз кивалтӥсь Эдуард Петров.

Удмуртилэн азинтон ужпум лэчыт сылэ Сарапул ёросын но. Со сярысь вераз «Удмурт Кенешлэн» отысь ёзэтэныз кивалтӥсь Нина Бехметова.

«Ёросамы 17 школа. 14-аз туэ нуо удмурт кружок но факультатив. Та лыдпусэз кышкаса верасько, малы ке шуоно ӟуч сямен вераса «цыплят по осени считают». Туж оскисько та ужъёсмы азьланьтӥськозы шуыса. 1-тӥ шуркынмонэ ортчытӥмы «Формирование этно-культурного образовательного пространства в Сарапульском районе» конференци. Со бере ортчизы мастер-классъёс, дидактической этно-шудон, презентациос. Та проект бордын ужало лулчеберетъя, дышетонъя управлениос, калык центръёс, туризмъя но калык киужъя центр. Солэсь азьвыл мониторинг ортчытӥм. 110 юам адямиослэн вань мылкыдзы дышетыны удмурт кылэз. Азьланяз малпаськом курсовой подготовка ортчыны, анай кылэз дышетонын интерактивной амалъёсын ужаны», — ивортӥз Бехметова.

«Удмурт Кенешлэн» Кез ёросысь ёзэтэныз кивалтӥсь Наталья Иванова сюлэмшугъяськемзэ вераз, ёрос газетсылэн удмурт кылын бамез потэмысь дугдӥз шуыса.

«Милям «Звезда» ёрос газетмылэн куке но потэ вал удмурт кылын бамез. «Кам син» нимаське вал со. Но туннэ нунал понна со ми доры уг ни вуы. Вераськонмы вал кылкутӥсь редакторен но, удмурт кылын гожъясь корреспондент воксё но правленимылэн ёзчиез луэ, озьы ке но, куинь ар пала ини удмурт бамез ум адӟиське. Кыл шедьтыны ум быгатӥське. Кенешиськом, кенешиськом, нош пайдаез туннэ нунал понна ӧвӧл», - кӧтӝожзэ кисьтӥз со. 

Озьы ик Наталья Иванова шумпотонзэс но вераз - коньывуонэ тужгес бадӟым ужзэс быдэстӥзы, Кез ёрослы сӥзем книгазэс поттӥзы. 

«Кез ёрос кенешлэн ёзчиосыз гинэ тодо, мар бордысен та кутскиз. Кызьы 2013-тӥ арын тулыспалэ ми нырысьсэ люкаськимы но вераськимы таӵе книга Кез ёрослы кулэ шуыса, малы ке шуоно берпуметӥез 1990-тӥ арын поттэмын ини. 26 ар ми тае витим, куинь но ӝыны ар та бордын ужамы но тани милям тужгес бадӟым емышмы туннэ понна. Туж шумпотӥськомы», — вераз Иванова. Огзэ книгазэс со «Удмурт Кенешлэн» тӧроезлы Татьяна Ишматовалы кузьмаз.

Тодады вайытом, «Удмурт Кенешлэн» Пичи кенешез Удмуртилэн Кунлыкезлы 96 ар тырмонлы сиземын вал. Отын «Удмурт Кенеш» огазеяськонлэн XIII Бадӟым ӧтчамез бере ужамезлы йылпумъянъёс лэсьтӥзы.



Наверх
Вниз