Ижкар+9 °C
16 -тӥ куарусён 2021 Покчиарня
18+

Удмуртиысь кун кылъёсты утён но азинтон ужпумъёсъя кун программа дасяло элькунын

  • 584
  • 0
Ижкар / Удмуртия
Удмуртиысь кун кылъёсты утён но азинтон ужпумъёсъя кун программа дасяло элькунын
Туспуктэм: Руслан Нуриахметов

Улосвылысь йӧскалык политикая министерство «Удмурт Элькунысь кун кылъёсты но Удмурт Элькунысь калыкъёслэсь мукет кылъёссэс утён, дышетон но азинтон» кун программа кылдытон бордын ужа. Со бадӟым ужкагазэз дасяны ӵектон Вань удмуртъёслэн XIV ӧтчамзылэн резолюцияз пыртэмын вал, соин ик та нуналъёсы «Удмурт Кенеш» огазеяськонлэн исполкомезлэн Ижкарысь ёзчиосыз министрлэн воштӥсеныз Людмила Соковиковаен пумиськон ортчытӥзы. Ужрадэ ивортодэтъя «Удмуртия» агентстволэн редакторез вуылӥз.

Людмила Соковикова нырысь ик социологи юалляськонлы йылпумъянъёсын тодматӥз. Сое 2020-тӥ арын «Центр этнологических исследований» ортчытӥз. Ужрадэ 1 сюрс 600 адями пыриськиз – студентъёс, кун служащейёс, коньдэт чотын возиськись ужъюртъёсын ужасьёс. Валамон со зэмос югдурез возьматыны уг быгаты, та ужын котьку янгышанъёс чакласько, озьы ке но, лыдпусъёс малпаськыто.

Юам муртъёс пӧлысь 51 процентэз веразы, удмурт кылэз умой тодо шуыса (верасько, гожъясько, лыдӟисько). 2016-тӥ арын та возьматэм 54 процент вылэм. Удмурт кылэз чик уг валало 6 процентэз (2016-тӥ арын – 4 процентэз). Удмурт кыл гурт еръёсын умойгес возиське, но кылэз умой тодӥсьёслэн лыдзы отын но берло 10 арскын 10 процентлы кулэсмем, со дыре ик карын – 11 процентлы йылэм. Егитъёс пӧлын удмурт кылэз воксё уг тодо 22 процентэз юамъёс, 2010-тӥ арын 11 процент вылэм.

Кылэз тодон трослы сое улонын нуналмысь кутон бордысь потэ. Кызьы возьматӥзы эскеронъёс, тросэз удмуртъёс ӵемгес ӟуч кылын верасько. Одӥг ласянь, соос удмуртсэ сокем ӟеч уг тодо, мукет ласянь, котырысьтыз адямиос удмурт кылэз уг валало
Людмила Соковикова, Удмуртиысь йӧскалык политикая министрлэн воштӥсез

Людмила Соковиковалэн верамезъя, удмурт кыллэн кутӥськемез ласянь шуг-секытъёс нырысь ик кылдо пӧртэм ёзъёслэн но огазеяськонъёслэн нимаз луэмзы бордысь. Озьы ик удмурт кыл удысын ӧнерчиослэн тырмымтэзы, ивортодэтлэн тырмымтэез, цифровизаци ласянь удмурт кыллэн бере кылемез шӧдӥське.

Ваньзэ со кылэз утён но азинтон ласянь вань ресурсъёсты огазеяны быгатӥсь нимаз кун программа кылдытэмез кулэ кариз. Ужкагаз бордын ужаны нимаз группа кылдытӥзы, педагогика тодосъя кандидатъёс Валентина Ившина, Любовь Фёдорова но мукетъёсыз пыризы. Асьсэлэсь ӵектонъёссэс йӧскалык политикаен, удмурт кылэн озьы-а, тазьы-а герӟаськем вань удысэтъёс сётӥзы.

Ми асьме министерствоослэсь, мер огазеяськонъёслэсь, тодос огазеяськонъёслэсь ӵектонъёссэс люкам. Россилэн мукет улосвылъёсысьтыз та выллем кун программаосты эскеримы. Таӵе программаоссы Татарстанын, Башкириын, Саха-Якутиын, Чувашиын вань. Озьы кылдӥз таӵе кун программа, ӵектосэз, кытчы ватсанъёс пыртэмын луозы на
Людмила Соковикова, Удмуртиысь йӧскалык политикая министрлэн воштӥсез

Программа 2023-2030 аръёслы чакламын. Отын пусъем ужпумъёсты быдэстыны арлы быдэ 30-35 миллион манет кулэ шуыса лыдъямын.

Кун программалэн валтӥсь люкетъёсыз - эсеплыко-эрикрадъем инъетэз умоятон, удмурт кыл удысэз тодос ласянь эскерон но азинтон.

Но валтӥсез – со этнокультурая вис карытэк дышетон но югдытон: ӧнерчиосты дасян бордысен кутскыса, семьяын, нылпи садын, школаын, шор ёзо ӧнер дышетсконниосын, вузъёсын, ватсаса тодон-валан но югдытон. Со удмурт кыллэсь имиджзэ кылдытон – со но одӥгез валтӥсь ӧр. Солэсь кутӥськемзэ паськытатон, цифровизация, удмурт диаспораен ужан
Людмила Соковикова, Удмуртиысь йӧскалык политикая министрлэн воштӥсез

Программаен чаклам ужпумъёсты быдэстыса, нылпи садъёсын удмурт кылэз дышетӥсьёслэн, удмурт кылэз ӟеч тодӥсьёслэн лыдзы йылыны, муниципал кылдытэтъёсын удмурт кылын литератураен вузкарись интыос тросгес луыны, удмурт кылосбуръя, этнографияя, фольклористикая но мукет удысъёсъя тодос но эскерон ужъёс тросгес потыны кулэ.

Удмуртилэсь кун программазэ улонэ пыӵатӥсьёсын элькунысь йӧскалык политикая министерство, дышетонъя но тодосъя министерство, лулчеберетъя министерство, печатья но калыке ивортодэт вӧлмытонъя агентство, лулчеберет кылёсбуръя объектъёсты кун ласянь утёнъя агентство пусъемын. Соос пыр ужкагазэз быдэсъянэ дышетсконниос, тодосъя ужъюртъёс пыриськозы.

«Айкай» театрлэн кивалтӥсез Пётр Данилов кун но муниципал ужъюртъёслэсь сайтъёссэс одно ик кык кылын нуонлы саклык висъяны куриз. Йӧскалык дышетонъя Дышетон удысысь йӧскалык ужпумъёсты эскеронъя тодос институтлэн кивалтӥсез Надежда Ураськина удмурт тодосчиосты дасян пумысен сюлмаськемзэ вераз. Солэн кылъёсызъя, берло 10 аръёс ӵоже докторской но кандидатской диссертациосты утьыны потӥсьёс ӧй вал, егитъёс тодос удысэ уг мыно. Озьы ик дышетон амалъёслы, педагогикалы, социолингвистикалы бадӟымгес саклык висъяны кулэ шуыса пусйиз.

«Удмурт Кенешлэн» Ижысь Ленин нимо ёросысь ёзэтлэн кивалтӥсез, ужбергатӥсь Николай Михайлов Ижысь лэсьтӥськисьёсын кенешемез сярысь вераз. Соослэн чакланъёссыя, матысь вить аръёсы выль коркаосы 30-35 сюрс адями гуртъёсысь лыктозы.

Тросэз со удмурт адямиос. Соослэн пиналъёссы вордскозы. Матысь 10 аръёсы карын 35 удмуртъёс вордскозы, кытчы соос школае мынозы, кытын соос удмурт кылэз дышетозы? Сое но программаын чаклано
Николай Михайлов, «Удмурт Кенешлэн» Ижысь Ленин нимо ёросысь ёзэтлэн кивалтӥсез

Кун программаез дасян ужез йылаз пумаз вуттыса, сое улосвыл кивалтэт эскерыны кулэ на. Со ӝог уж ӧвӧл, шуиз Людмила Соковикова. Ужкагаз юнматэмын луиз ке, со туж бадӟым вормон луоз шуыса пусйиз «Удмурт Кенеш» огазеяськонлэн тӧроез Татьяна Ишматова.



Наверх
Вниз