Ижкар+9 °C
16 -тӥ куарусён 2021 Покчиарня
18+

Чугун сюрес но автовокзалъёсын огъетэз усьтӥзы Можгаын

  • 123
  • 0
Можга / Удмуртия
Чугун сюрес но автовокзалъёсын огъетэз усьтӥзы Можгаын
Туспуктэм: Удмуртиысь тӧролэн но кивалтэтлэн пресс-службазы

9-тӥ куарусёнэ Можгаын транспортно-пересадочной узелэз усьтӥзы. Со одӥг липет улэ чугун сюрес вокзалэн но автостанциез огазеяз. Со сярысь элькун тӧролэн но кивалтэтлэн пресс-службазы ивортӥз.

Сӥё-дано ужрадэ Россиысь чугун сюресъёслэн кивалтӥсез Олег Белозёров но Удмуртилэн тӧроез Александр Бречалов вуылӥзы. 

Олег Белозёров та ӵектосэз улонэ пыӵатон бордын Удмуртилэн кивалтэтэныз ог-огзэс валаса, огкылысь ужазы шуыса пусйиз.

2018-тӥ арын выль вокзал пуктон сярысь вераським, нош туннэ туала но ӟечлыко ужъюртэз усьтонэ пыриськиськом ини. Татын тужгес но туала ужан тӥрлык, аромамаркетинг уже кутӥське, билетъёс котькыӵе транспортэ басьтыны луэ. Котькуд пассажир гань-гань интыяськыны быгатэ. Выль транспортно-пересадочной узеллэн котькуд люкетаз улосвылэн валче ужаммы адӟиське
Олег Белозёров, Россиысь чугун сюресъёслэн кивалтӥсез

Транспортно-пересадочной узел 291 миллион манет тыр усиз. Отын пассажиръёслы поезд яке автобус возьманы инты, нылпиосын пассажиръёслы висъет, кузь сюрес вылэ потыны яке матысь каръёсы, гуртъёсы мыныны билетъёс басьтыны нимаз кассаос, буфет, санитарной комнатаос вань. Ужъюртын автомат амалэн ивортӥсь сӧзнэт кыскемын, вирус инфекциос медаз вӧлме шуыса рециркуляторъёс пуктэмын.

Со ӟечлыкезъя, кышкыттэмлыкезъя вань куронъёслы но тазалыксыя ӧжыт луонлыкъем адямиослы тупа. Туала тӥрлыкен тырмытэмезъя Калининградысь вокзал бере кыкетӥ луэ

Ӵектос улсын вокзал котырысь интывылэз но умоятӥзы, пассажиръёслы выль платформа пуктӥзы, ужъюртысь платформае яке автобус площадкае меӵак потонъёс радъязы.

Транспортно-пересадочной узелын огдыре 250 адями луыны быгатоз.

Пусъём, Можга пыр трос гинэ поездъёс ветло. Кылсярысь, Дальний Востоке, Москвае, Уйпал Кавказысь улосвылъёсы. Нуналаз вокзал пыр ог 160 составъёс кошко.

Азьло пассажиръёс понна Можгаын 1915-тӥ арын пуктэм ужъюрт ужаз. Азьланяз со музей огъет луоз.

Тодэ вайытом, Удмуртиысь М7 трассалэсь люкетсэ 4 чурозь паськытатозы. Нырысь ик сюресчиос Можга ёросын интыяське участок борды басьтӥськозы



Наверх
Вниз