Ижкар+9 °C
16 -тӥ куарусён 2021 Покчиарня
18+

«Удмурт Кенеш» огазея» марафон мытӥзы Удмуртиын

  • 111
  • 0
Ижкар / Удмуртия
«Удмурт Кенеш» огазея» марафон мытӥзы Удмуртиын
Туспуктэм: Анжелика Тихонова

«Удмурт Кенеш» огазеяськон 30 ар тырмонэз азьын «Удмурт Кенеш» огазея» марафон мытӥз. Со улсын куншетсэ ёрос ёзэтъёсызъя лэзиз. Нырысь ик сое Ижкарысь Октябрь ёрос ёзэтэ пырисьёс басьтӥзы. Сӥё-дано ужрадэ ивортодэтъя «Удмуртия» агентстволэн корреспондентэз но вуылӥз.

Пумиськонэ «Удмурт Кенеш» огазеяськонлэн Ижкарысь ёрос ёзэтъёсыныз кивалтӥсьёс но азьветлӥсьёс люкаськизы.

Огазеяськонлэн тӧроез Татьяна Ишматова марафон быдэс элькунысь, озьы ик бускель улосвылъёсысь удмуртъёсты огазеяны кулэ шуыса пусйиз.

Тани та флаг ветлоз асьмелэн ёросысь ёросэ. Ветлэм сяна, со пӧртэм чебер ужрадъёс пыр калыклы «Удмурт Кенеш» вань шуыса возьматоз, калыкъёсты огазеялоз. Со дыре ик калыкез лыдъян-чотан азьын удмуртъёслэсь ас валанзэс, шуом, эшшо огпол ӝутоз, сайкатоз, со сярысь малпаськытоз. Ӵапак соин та марафонэз малпам
Татьяна Ишматова, «Удмурт Кенеш» огазеяськонлэн тӧроез

Нырысь ик куншетэз Ижкарысь Октябрь ёрос ёзэтлы сётӥзы. Сое Татьяна Ишматова киысь ёзэтэн кивалтӥсь Валентина Ившина басьтӥз. Со пусйиз, куншетэз басьтон туж бадӟым дан шуыса.

Милемлы та быдӟа ужрад мытыны оскон – со зэмзэ но туж бадӟым дан. <…> «Удмурт Кенеш» кутскон бордысен «Октябрь ёрос кенеш» мар ке но ужаз, мар ке но лэсьтӥз. Та куншетэз ёросысь ёросэ сётон – со туж бадӟым ужрад. Нырысь ик котькуд «Ёрос кенешлы» со нимысьтыз презентация выллем луэ, <…> со «Удмурт Кенешлэсь» ужзэ, «Удмурт Кенешлэсь» пуштроссэ, ортчем сюрессэ шарая, малы ке шуоно тае котькуд ёрос пыр быдэс Удмурт шаермы адӟоз
Валентина Ившина, «Октябрь ёрос кенешлэн» тӧроез

Марафон улсын котькуд ёрослэн делегациез огазеяськонлэсь куншетсэ бускель ёросэн гожазы пумиталоз но бӧрысь кыӵе ке адӟиськымон интыын ужрад ортчытоз. Котькуд ёросын асьсэ малпам ужрадзы луоз. Со флешмоб, котырес ӝӧк, концерт яке мукет маке луыны быгатоз.

Котькудӥз творчески со борды мед басьтӥськоз. Малы ке шуоно котькуд ёрослэн аслаз маиз ке тунсыкоез вань, сямъёсыз. <…> Медаз ортчы со шыпак гинэ
Валентин Тубылов, «Удмурт Кенеш» огазеяськонлэн дано тӧроез

Ужрад 14-тӥ куарусёнэ кутскыса 31-тӥ коньывуонозь ортчоз. Со дыр ӵоже куншет берпуметӥ ёросэ – Каракулиное – вуыны кулэ луоз. Отысь со берен Ижкаре берытскоз.

Пусъём, куншетэз кыкетӥез басьтӥсь Ижкарысь Индустри ёрос луоз. Сӥё-дано ужрад 17-тӥ куарусёнэ Ижкарысь зоопаркын покчи пиналъёслы «Кизили» журналлэсь 35 ар тырмонзэ пусъён улсын ортчоз. Бӧрысь, 18-тӥ куарусёнэ, Космонавтъёслэн паркысьтызы удмурт сэрегез усьтон улсын куншетэз Первомай ёрослы сётозы. Но озьы со азьлань но азьлань вамыштоз. 



Наверх
Вниз