Ижкар+4 °C
19 -тӥ коньывуон 2021 Пуксён
18+

Кыкетӥзэ модельной библиотекаез усьтозы Ижкарын

  • 132
  • 0
Ижкар / Удмуртия
Кыкетӥзэ модельной библиотекаез усьтозы Ижкарын
Туспуктэм: Майя Бывальцева

17-тӥ куарусёнэ Ижкарын кыкетӥзэ модельной библиотекаез усьтозы. Со Н. К. Крупская нимо филиал лыдӟетъюртын интыяськоз, ивортӥз Ижкар администрацилэн пресс-службаез.

Библиотека югыт, туала шӧмо пӧрмиз. Висъетъёсын тӧдьы, вож, напӵуж буёлъёсты кутӥзы, 1975-тӥ арысь борддор мозаикаез улӟытӥзы, выль арт-объектъёс пуктӥзы

Выльдон ужъёс бере книга возён интыос, абонементъёс но лыдӟиськон залъёс лыдӟиськыны, шутэтскыны, творчествоен вырыны, вераськыны, тодон-валанъёсты азинтыны туала интылы пӧрмизы.

Ужъюртэ выль компьютеръёс, принтеръёс, сканеръёс, VR-очки басьтӥзы, Йӧскалык электрон библиотекае но «Литрес» библиотекае дунтэк пырон усьтӥзы, дунтэк Wi-Fi пуктӥзы. Со сяна 600 сюрс котыр манет тыр 2 сюрслэсь трос выль книгаос басьтӥзы. Со пӧлысь 1 сюрс 715-ез чеберлыко литература, 354-ез – удысъёсъя.

Библиотекаын мастер-классъёсы, творческой мастерскойёсы ветлыны, мунё спектакльёс учкыны, кылбур лыдӟыны, книга бырйыны, лекциос кылзыны, тунсыко адямиосын тодматскыны, гаджетъёсын ужаны, психологен кенешыны, тренингъёсты ортчыны но трос мукетсэ ужаны луоз.

Тупатъян ужъёслы луыса лыдӟетъюртэ тазалыксыя ӧжыт луонлыкъем муртъёс но ветлыны быгатозы

Ужъюртэз «Культура» йӧскалык ӵектос улсын выльдӥзы. Солы федерал коньдэтысь 5 миллион манет, элькун коньдэтысь 1 миллион манет, муниципал коньдэтысь 600 сюрс манет но ватсаса 2 миллион 244 сюрс манет висъязы.

Пусъём, 2021-тӥ ар пумозь Ижкарын эшшо кык модельной лыдӟетъюртъёс усьтӥськозы. Озьы, Октябрь ёросысь Ф. Васильев нимо лыдӟетъюртэз туала этно-интылы пӧрмытозы, нош Ленин ёросысь В. Маяковский нимо филиал лыдӟетъюртэз – лулчеберетъя трос луонлыкъем центрлы.

Тодэ вайытом, Ижкарын нырысетӥзэ модельной библиотекаез 2019-тӥ арын усьтӥзы. Нош туэ гужем Сюмсиын гурт интывылын интыяськем нырысетӥез модельной лыдӟетъюрт ужаны кутскиз



Наверх
Вниз