Ижкар+1 °C
9 -тӥ толсур 2021 Покчиарня
18+

Адӟытонъёс, шудонъёс, мастер-классъёс ортчозы Удмурт кыллэн нуналэз улсын Удмуртиын

  • 217
  • 0
Ижкар / Удмуртия
Адӟытонъёс, шудонъёс, мастер-классъёс ортчозы Удмурт кыллэн нуналэз улсын Удмуртиын
Туспуктэм: Руслан Нуриахметов

27-тӥ шуркынмонэ Удмуртиын ньылетӥзэ Удмурт кыллэсь нуналзэ пусъёзы. Со улсын пӧртэм ужрадъёс ортчозы, ивортӥз элькун тӧролэн но кивалтэтлэн пресс-службазы.

27-тӥ шуркынмонэ пӧртэм ужрадъёс (6+) йӧскалык лыдӟетъюртын радъяськозы. Соосты «Удмурт кыллэн чеберлыкез – удмурт дӥськут пыр» тема огазеялоз:

  • 10 часын Йӧскалык но шаертодонъя литературая но библиографияя центрын (1-тӥ этаж) «Удмуртский орнамент: культурный код» адӟытон усьтӥськоз. Со толэзь пумозь ужалоз;
  • 14 часысен 16 часозь мастер-классъёс ортчозы. Одӥгез соос пӧлысь – удмурт мунё-ибырвесь лэсьтонъя мастер-класс;
  • 16 часын Удмуртиысь искусство удысысь дано ужасьлэн Пётр Даниловлэн «Богатство языка музыкальной культуры и народного костюма шошминских удмуртов» лекциез кутскоз. Со удмурт кылын луоз.

Со сяна, нунал ӵоже йӧскалык лыдӟетъюртлэн нимлыко сайтаз удмурт костюмлэн люкетъёсызъя, пужыосызъя, куон амалъёсызъя «Удмурт дэрем, удмурт пужы» тест луоз. Сое вань мылкыд карисьёс ортчыны быгатозы. 

«Удмурт Кенеш» огазеяськонлы 30 ар тырмонлы сӥзьыса, ассоциацилэн ёрос ёзэтъёсаз юбилей ужрадъёс радъяськозы. 23-тӥ шуркынмонэ Кузебай Герд нимо йӧскалык музейын огазеяськонлэн котырес лыдпусэзлы «Всеудмуртский съезд» адӟытон усьтӥськоз.

25-тӥ шуркынмонэ Г. Д. Красильниковлэн литературая музей-квартираяз «Ноябрьский свободный микрофон» ортчоз. Ужрад гожъяськисьлэн, этнографлэн, лингвистлэн, фольклористлэн, мер но политика удысъёсын ужасьлэн Трофим Борисовлэн вордӥськем дырысеныз 130 ар тырмонлы сӥземын луоз. Кутсконэз 18 часын.

Кыккылолыкъя «Билингва» удмурт центрын Удмурт кыллэн нуналэз улсын ик «Билингва ТВ. Моя родословная» семья конкурс ортчоз. Вожвылъяськонэ удмурт кылын видеоужъёсты 25-тӥ шуркынмонозь кутозы. Пыр-почгес чӧлсконпусъя.

24-тӥ шуркынмонэ Ижкарысь гурт возёсъя кун академиысь нюлэс культураосъя, садово-парковой лэсьтӥськонъя но музъемез уже кутонъя кафедраысь доцент, биологи тодосъя кандидат Надежда Сунцова удмуртъёслэн сям-йылолъёсазы будосъёслэн интызы сярысь вералоз. Лекция 20 час 30 минутэ кутскоз но онлайн амалэн ортчоз. Кылзон понна чӧлсконпусъя азьвыл ик гожтӥськыны кулэ.

Тодэ вайытом, Удмурт кыллэсь нуналзэ пусъён улсын 22-27 шуркынмонэ элькунысь пиналъёс удмурт ӝӧквыл шудонъёсын шудозы. Нош 4-тӥ толсуре Удмуртиын студентъёс нырысьсэ «ЭТНОэксперт» визьбур шудонын асьсэзыс утчалозы. Нош Москваын 27-тӥ шуркынмонэ А. М. Горький нимо литературая институтысь доцент, литератураез эскерись, кылосбур тодосъя кандидат Вера Пантелеева удмурт литератураысь классикъёс но туала гожъясьёс сярысь лекция лыдӟоз.



Наверх
Вниз