Ижкар+1 °C
9 -тӥ толсур 2021 Покчиарня
18+

«Удмурт Кенешлэн» данъян книгаяз пыртоно муртъёс тодмо луизы Удмуртиын

  • 276
  • 0
Ижкар / Удмуртия
«Удмурт Кенешлэн» данъян книгаяз пыртоно муртъёс тодмо луизы Удмуртиын
Туспуктэм: Майя Бывальцева

Вань удмуртъёслэн «Удмурт Кенеш» ассоциацизылэн данъян книгаяз 2021-тӥ арын ньыль муртэ пыртозы. Кандидатураосты 24-тӥ шуркынмонэ огазеяськонлэн исполкомезлэн кенешоназ юнматӥзы. 

Ӵектэм муртъёсты нырысь ик йӧскалык премиосъя ӧриын эскеризы.

Котькуд ӵектэм кандидатураез пыр-поч эскерим, «тодӥськом» гинэ ӧм шуэ. Котькудӥзлэсь адямилэсь лэсьтэм ужъёссэ пыр-поч ми сэрттӥм-пертчим
Пётр Данилов, «Удмурт Кенеш» огазеяськонлэн йӧскалык премиосъя ӧриезлэн кивалтӥсез, «Айкай» театрлэн кивалтӥсез

Дэмлам муртъёс пӧлын Кизнер ёросысь депутатъёслэн кенешсылэн тӧроез Вениамин Андреев. Со трос аръёс ӵоже ни удмуртлыкез, Кизнер ёрослэсь историзэ азинтон, шаертодон ужын туж трос кужымзэ сётыса тырше.

Озьы ик ӵектӥзы удмурт радиоын удмурт кылын радиопередачаос лэсьтӥсь, соос пыр азинлыко удмурт адямиосын тодматӥсь Анастасия Гребинаез.

Эшшо одӥгез йӧно кандидат - «Удмурт Кенешлэн» Глазкарысь но Глаз ёросысь ёзэтэзлэн азьвыл кивалтӥсез, агропром огъетын ужасьёслэн профсоюззылэн кивалтӥсез, удмуртлыкез азинтонын трос кужымзэ сётыса ужась Инесса Рябова.

Со сяна, Данъян книгае Татарстанысь Балтась ёросысь Ӟаны (Средний Кушкет) гуртысь школалэн азьвыл кивалтӥсез Иван Ермаковез пыртыны ӵектӥзы. Туэ со 75 арессэ пусйиз ни.

Ас дыраз Ӟаны школаез, быдэс тапак удмурт школаез, выжтӥзы вал бигер гуртэ. Туж бадӟым кужым быдтӥз та школаез выльысь берыктыны Ӟаные. Удмурт школа выль лэсьтӥзы, синмаськымон йыг-йыг выль школа пуктэмын солэн тыршемезъя, солэн кужымезъя. Трос аръёс ӵоже кужымзэ пыртӥз удмуртлыкез азинтонэ, вань районын улӥсьёс ваньзы сое гажало но тодо.
Пётр Данилов, «Удмурт Кенеш» огазеяськонлэн йӧскалык премиосъя ӧриезлэн кивалтӥсез, «Айкай» театрлэн кивалтӥсез

Данъян книгалэн учкетэзъя, одӥг аре витёзь адямиез пусйыны луэ бере, исполкомлэн ёзчиосыз вань ньыль ӵектэм муртъёс понна огкылысь дурбасьтӥзы.

Туж тодмо адямиос, гажано адямиос, трос ужамын ваньмыз. Тани Ермаковез ӧжытгес тодо, дыр, куд-огез, но ми, Татарие ветлыса, ваньмы тодӥськом, кыӵе со сюлэмзэ поныса ужамын. Татысь куноосыз - артистъёсыз-а, учёнойёсыз-а, дышетон удысын ужасьёсыз-а - ки вылаз нуллэ вал отын. <…> Бадӟым сюлэмо адями!
Андрей Ураськин, «Удмурт Кенеш» огазеяськонлэн исполкомезлэн ёзчиез, Удмурт йӧскалык театрлэн кивалтӥсез

Данъян книгае пыртэм муртъёслы сӥлы карозы ни 2022-тӥ арын тулыспалэ «Удмурт Кенешлэн» 30 ар тырмонэзлы сӥзем сӥё-дано ужрадын. 

Тодэ вайытом, 2020-тӥ арын данъян книгае озьы ик ньыль адямиез пыртӥзы.



Наверх
Вниз