Ижкар+1 °C
9 -тӥ толсур 2021 Покчиарня
18+

21 нылкышноосты «Анайлэн данэз» пусэн данъялозы Удмуртиын

  • 125
  • 0
Ижкар / Удмуртия
21 нылкышноосты «Анайлэн данэз» пусэн данъялозы Удмуртиын
Туспуктэм: Удмуртиысь мер политикая но ужъя министерстволэн пресс-службаез

2021-тӥ арын Удмуртиын «Анайлэн данэз» пусэн 21 нылкышноосты данъялозы. Ваньзы ик соос куинь яке солэсь трос нылпизэс синмаськымон будэто. Со сярысь элькунысь мер политикая но ужъя министрлэн нырысетӥ воштӥсез Ольга Лубнина вераз.

«Анайлэн данэз» пусэз Удмуртиын 2005-тӥ арын кылдытӥзы. Сое трос нылпи будэтӥсь анайёслэсь пиналъёсты визьноданын сӥ-аднзэс пусъён понна малпазы. Пусэз шуркынмонлэн берпуметӥ арнянуналаз пусйиськись Анайлэн нуналэзлы тупатыса сёто. Туэ со 28-тӥ шуркынмонэ тупа

Пусэз басьтӥсьёс пӧлын – Сьӧлта ёросысь Галина Давыдовна Чиркова. Со сизьым нылпиослэн анайзы луэ – куинь нылъёслэн но ньыль пиослэн. Нылкышно ветеринарияя техникумез йылпумъяса, трос аръёс ӵоже гурт возёс удысын тыршиз.

Галина Чирковалэн ваньмыз ик нылпиосыз улонысь ас сюрессэс шедьтӥзы. Бадӟымез Нина нылыз 30 арлэсь кема визьнодась луыса ужаз, али пенсиын ини. Озьы ке но, нылпи садлы праздникъёслы костюмъёс, ужан дӥсь вурыса юрттӥське. Лия нылыз покчи классъёсты дышетэ. Дышетскисьёсыз котькыӵе удысын асьсэзыс умой возьмато. Римма нылыз пудо висёнъёсын нюръяськонъя Уваысь ёроскуспо станциын тырше, паласькись висёнъёслэсь утиськонъя но палэнтонъя уже мыло-кыдо пыриське.

Николай пиез школаез йылпумъямез бере водительлы дышетскиз. Ваньмон дыръяз спортэн выре. Василий пиез но руль бергатӥсь луыса тырше. Алексей пиез трос аръёс ӵоже гурт возёс удысын тракторист луыса ужаз, али аслэсьтыз фермер возёссэ ӝутэ. Владимир пиез электроника кылдытонъя ёзэтэн кивалтӥсь луыса ужа.

Галина Давыдовналы али 82 арес. Со огназ улэ, курег вордэ, юртъер котыраз выре. Шумпотыса укмыс нунокъёссэ будэтыны юрттӥське.

Элькунамы трос нылпиё семьяослэн лыдзы арлы быдэ йылэ. 10 ар талэсь азьло сыӵе семьяосмы 8 сюрслэсь трос ӧй вал ке, али куинетӥ но со бӧрсьы нылпи ваем семьяосмы 25 сюрслэсь трос ини
Ольга Лубнина, Удмуртиысь мер политикая но ужъя министрлэн воштӥсез

«Демография» йӧскалык ӵектос улсын трос нылпиё семьяослы кӧня ке пумо юрттэт сётӥське: куинетӥ но со бӧрсьы вордӥськем пиналъёслы тыриськонъёс но, 3-7 аресъем нылпи будэтӥсь семьяослы, кудъёсыз толэзьлы тырмымон шуыса юнматэм коньдонлэсь ӧжыт табыш басьто, тыриськонъёс но.

Пусъём, 2020-тӥ арын «Анайлэн данэз» пусэз Удмуртиысь 18 нылкышноос басьтӥзы вал. 



Наверх
Вниз