Ижкар+1 °C
9 -тӥ толсур 2021 Покчиарня
18+

Эм тодосъя доктор Николай Стрелков Трокай Борисов нимо йӧскалык премиез басьтоз

  • 238
  • 0
Ижкар / Удмуртия
Эм тодосъя доктор Николай Стрелков Трокай Борисов нимо йӧскалык премиез басьтоз
Туспуктэм: vk.com (УДМУРТ КЕНЕШ official)

2021-тӥ ар понна Трокай Борисов нимо йӧскалык премиез Ижкарысь эм кун академилэн 1993-2018 аръёсы кивалтӥсез, Удмуртиысь тазалыкез утён удысысь дано ужась, Россиысь дано эмчи, эм тодосъя доктор, профессор Николай Стрелков басьтоз. Сыӵе пумкылъян 24-тӥ шуркынмонэ «Удмурт Кенеш» огазеяськонлэн исполкомезлэн кенешоназ кутӥзы.

Огазеяськонлэн йӧскалык премиосъя ӧрияз кык кандидатураосты учкизы, исполкомын куара сётонэ ӵапак Николай Стрелковез дэмлазы. Кызьы пусйиз ӧрилэн кивалтӥсез Пётр Данилов, солэн лэсьтэм ужез мургес но паськытгес луэ. Профессор трос аръёс ӵоже Финн-угор калыкъёслэн калыккуспо консультативной комитетазы ужаз, конгрессъёсын но форумъёсын докладъёсын вераськылӥз.

Николай Сергеевичлэн оглом Россиын но, калыккуспо финн-угор дуннеын но бадӟымгес вкладэз. Именно общественной движениын со котьку но, конгрессъёсын но, кытын но, возьматэ вал вылӥ планкаез шуыса, не только удмуртъёслэсь, а быдэс финн-угор калыкъёслэсь
Елена Миннигараева, «Удмурт Кенеш» огазеяськонлэн йӧскалык премиосъя ӧриезлэн ёзчиез, «Удмурт дунне» газетлэн валтӥсь редакторез

Вунэтоно ӧвӧл созэ но, со тодосын быдэс ӧр кылдытӥз – финн-угор калыкъёслэн тазалыксы, кӧня ар со быдэс журнал поттылӥз. Туж бадӟым ватсэт
Алексей Загребин, «Удмурт Кенеш» огазеяськонлэн йӧскалык премиосъя ӧриезлэн ёзчиез, истори тодосъя доктор

«Удмурт Кенешлэн» тӧроез Татьяна Ишматова озьы ик Николай Стрелковлэсь удмурт кадръёсты будэтонын кема аръёс ӵоже ужамзэ пусйиз.

Мер медалез Николай Стрелковлы «Удмурт Кенешлэн» 30 ар тырмонэзлы сӥзем сӥё-дано ужрадын тулыспалэ сётозы.

Ватсалом, Трокай Борисов нимо йӧскалык премиез мер но политика удысъёсын удмурт калыклэсь пӧртэм ӧръёсъя тунсыкъёссэ утись муртъёслы сёто. Берло аръёсы соин пусйизы Дэри ёрос администрацилэн тӧроезлэн воштӥсьсэ – Гуртэз азинтонъя но гурт возёсъя управленилэсь кивалтӥсьсэ, экономика тодосъя кандидатэз Валериан Никитинэз, экономика тодосъя докторез, профессорез Юрий Перевощиковез, Кун Кенешлэсь азьвыл тӧрозэ, «Удмурт Кенеш» огазеяськонлэсь азьвыл кивалтӥсьсэ Игорь Семёновез.

Тодэ вайытом. озьы ик тодмо луизы «Удмурт Кенешлэн» данъян книгаяз пыртоно муртъёслэн нимъёссы. 



Наверх
Вниз