Ижкар+1 °C
9 -тӥ толсур 2021 Покчиарня
18+

Удмуртилэсь дас адями пыриськоз Россиысь финн-угор калыкъёслэн ассоциацизылэн ӧтчамаз

  • 259
  • 0
Ижкар / Удмуртия
Удмуртилэсь дас адями пыриськоз Россиысь финн-угор калыкъёслэн ассоциацизылэн ӧтчамаз
Туспуктэм: Майя Бывальцева

Россиысь Финн-угор калыкъёслэн ассоциацизылэн VII ӧтчамаз Удмуртилэсь делегацие 10 адями пыроз. Удмуртъёслэсь ыстэм муртъёсын лыдметэз 25-тӥ шуркынмонэ «Удмурт Кенеш» огазеяськонлэн исполкомезлэн пумиськоназ юнматӥзы.

Ӧтчаме оглом 100 делегатъёс люкаськозы. Коронавирус вӧлмонэн сэрен пыриськисьёслэсь лыдзэс кулэстӥзы. Кызьы валэктӥз «Удмурт Кенешлэн» тӧроез Татьяна Ишматова, квота калыклы уг, улосвыллы сётӥське, соин ик делегацие пырто финн-угор калыкъёсты, кинлэн улосвылын огазеяськонэз вань. Удмуртилы 10 адямилы ӧтён лэзизы.

Укмыс адями делегатъёс но эшшо одӥг адями – ревизионной комиссилэн ёзчиез, со асьмелэн Петров Эдуард Степанович луэ. Со дас адями пӧлысь кык интыез кошке мукет калыкъёслы: поръёслы одӥг инты сётӥськом но одӥг инты мордваослы сётӥськом, соослэн огазеяськонъёссы вань
Татьяна Ишматова, «Удмурт Кенеш» огазеяськонлэн тӧроез

Ассоциацилэн Кенешаз пырись Татьяна Ишматова, солэн воштӥсез, кылосбур тодосъя доктор Наталья Кондартьева но ревкомлэн ёзчиез, «Удмурт Кенешлэн» Можга ёросысь ёзэтэзлэн кивалтӥсез Эдуард Петров сяна, удмуртъёслэсь делегацие пыризы «Удмурт дунне» газетлэн валтӥсь редакторез, «Удмурт нылкышно кенеш»огазеяськонлэн кивалтӥсез Елена Миннигараева, Камьсӧр удмуртъёслэн элькун центрзылэн кивалтӥсез Флюра Чибышева, егитъёслэн мер огазеяськонъёсазы пыриськись, «Даур ТВ» вотэс-телеканаллэн кивалтӥсез Богдан Анфиногенов, «Удмурт Кенешлэн» Глаз ёросысь ёзэтэзлэн ёзчиез, Глаз ёрос администрациысь ӵектос ужъёсъя, лулчеберетъя, егитъёсын ужан политикая, физкультурая но спортъя управленилэн кивалтӥсез Евгений Баженов, пӧртэм удмурт ӵектосъёсын ужась, «Удмурт Кенешлэн» контент-редакторез Наталья Михайлова.

Туннэлы тодмо, удмуртъёс Марий Элысь, Башкортостанысь, Татарстанысь делегациосы пыртэмын.

Удмуртиысь делегатъёсты ӧтчамын ӝутоно ужпумъёсъя бырйизы. Панельной дискуссия амалэн ортчоно ужрадын ньыль оръёсъя вераськон мыноз:

- Россиысь финн-угор калыкъёслэн анай кылъёссы, лулчеберетсы, дышетон: туала югдур но азинскон чакланъёс;
- трос йӧслыко мерлыкын ивортодэт вӧлмытон технологиос;
- этнотуризм но ӵектосъёсын ужан;
- егитъёслэн кичӧлтонъёссы, устоосыз ужан амалъёс.

Нырысетӥ темая Наталья Кондратьева валтӥсь докладэн вераськоз, нош кыкетӥезъя Елена Миннигараева кенешонэз радъялоз но ачиз доклад лэсьтоз.

Ӧтчам 17-18 толсуре Мордовилэн шоркараз Саранскын ортчоз. Солэн огъя темаез - «Финно-угорские народы в едином культурном коде многонациональной России». Татьяна Ишматовалэн верамезъя, ӧтчамлэн ужаз Россиысь йӧскалык ужъёсъя федерал агентствоысь но Калыкез дышетонъя министерствоысь ыстэм муртъёс пыриськозы. 

Тодэ вайытом, «Удмурт Кенешлэн» исполкомезлэн пумиськоназ огазеяськонлэн данъя книгаяз пыртоно но Трокай Борисов нимо йӧскалык премиен пусъёно муртъёс тодмо луизы. 



Наверх
Вниз