Ижкар+1 °C
9 -тӥ толсур 2021 Покчиарня
18+

Удмурт нылпиослы клуб усьтозы Башкириысь Выльгуртын Удмурт кыллэн нуналаз

  • 274
  • 0
Выльгурт / Россия
Удмурт нылпиослы клуб усьтозы Башкириысь Выльгуртын Удмурт кыллэн нуналаз
Туспуктэм: Константин Вознесенских

27-тӥ шуркынмонэ, Удмурт кыллэн нуналаз, Башкириысь Татышлы ёросысь Выльгуртын (Новые Татышлы) Удмуртъёслэн историяя но лулчеберетъя центрын пиналъёслы клуб усьтозы. Кызьы вераз Центрлэн кивалтӥсез Ирина Самигулова, та малпанэн со 5-6 ар улӥз ни.

Татчы вуозы удмурт нылпиос, кудъёсыз вераськозы удмурт кылын, кудъёсыз историез но, кылэз но, культураез но, этнографиез но, ваньзэ-ваньзэ пичиен, мар герӟаськемын ас шаереныд, ас кылыныд, ас удмуртлыкеныд, ваньзэ ми со клубамы эскером, учком. Поталомы экскурсиосы но, тодмо-тодмо удмурт адямиосын тодматскомы
Ирина Самигулова, Башкириысь удмуртъёслэн историяя но лулчеберетъя центрзылэн кивалтӥсез

Солэн верамезъя, нырысетӥез ужпум – пиналъёслэсь тунсыкъяськон мылкыдзэс ӝутон. Собере «ӧръяськыса кошкоз». Нырысь Выльгуртысь но Татышлы ёросысь пиналъёсын ужаны кутскозы, отын 14 школаосын удмурт кылэз дышето, берло вань удмурт ёросъёсысь нылпиосты котыразы кыскозы.

Со сяна, Башкириын улӥсь удмурт нылъёсты но пиосты Удмуртие ас ёзъёсынызы тодматскыны вайылыны мылкыдзы вань, нош татаысь пиналъёс отчы куное ветлысалзы.

Эшъяськон выжъёс но малпалом, малпалом чебересь, шулдыресь интыосты возьматыны, азьло сямен походъёсы но потаны мылкыдмы вань, малы ке шуоно нылпиос али дорын пуко, и дырзы туж быре телефон котырын
Ирина Самигулова, Башкириысь удмуртъёслэн историяя но лулчеберетъя центрзылэн кивалтӥсез

Нялтас вераса, клубе телефонъёсын уз лэзе – со одӥгез чурыт курон.

Нылпи клубзэс «РенБик» ниманы малпазы.

Милям нырысетӥ туж тодмо удмуртмы Ренат Биктимирович Галямшин. Вот солэн улонэз, ужез – быдэс легенда. Кӧня со кужымзэ сётӥз, кӧня ужаз, кӧня тыршиз, и табере малпаськом Удмурт кыллэн нуналаз та клубмес ужаны кутскытыны. <…> Ренат Биктимировичмылы но туж приятно луоз, дыр, вылӥысен ми шоры учкыса, шӧдыны, что солэн улонэз азьланьтӥське, ужез но азьланьтӥське
Ирина Самигулова, Башкириысь удмуртъёслэн историяя но лулчеберетъя центрзылэн кивалтӥсез

Ирина Самигуловалэн кылъёсызъя, «РенБиклы» дышетӥсьёссы но, нылпи садъёсысь визьнодасъёссы но юрттозы. Озьы ик оскемзэ вераз, умой ужаны тыршизы, быгатӥзы ке, туж трос Ренат Биктимировичьёссы будозы на.

Тодэ вайытом, вить ар талэсь азьло Башкириысь удмуртъёслэн историяя но лулчеберетъя центразы кышномуртъёслэсь «Эшъяськон тугоко» клубзэс кылдытӥзы. Нош Татышлы ёросын будэм удмурт нылаш али «Мисс Содружество – 2021» вожвылъяськонэ пыриське



Наверх
Вниз