100 лет государственности Удмуртии
Ижкар+11 °C
1 -тӥ инвожо 2020 Вордӥськон
16+

Кузебай Герд нимо йӧскалык премиез сётӥзы Пичи Пургаын «Герд лыдӟонъёс» улсын

  • 833
  • 0
Пичи Пурга / Удмуртия
Кузебай Герд нимо йӧскалык премиез сётӥзы Пичи Пургаын «Герд лыдӟонъёс» улсын
Фото: Анжелика Петрова

Кузебай Герд нимо йӧскалык премиез сётӥзы 16-тӥ тулыспалэ Пичи Пургаын «Герд лыдӟонъёс» улсын. Туэ сое ньыль адями басьтӥз. Со сярысь ивортэ «Удмуртия» агентстволэн корреспондентэз.

Премилэн лауреатъёсыз луизы Пичи Пургаысь Татьяна но Василий Москвинъёс. Соосты удмурт дӥсез улӟытэмзы но вӧлмытэмзы, удмурт калыклэсь данзэ, лулчеберетсэ, сямъёссэ но йылолъёссэ утёнын но азинтонын, калыкъёслэсь эшъяськонзэс юнматон удысын бадӟым уж нуэмзы понна пусйизы.

Василий Москвин со понна кузпалызлы тау кариз.

«Тани та нылашез мон 18 аресысен адями карыны турттӥ ини, нош данэ поттӥз со монэ», — серем пыр шуиз со.

Фото: Анжелика Петрова
Василий Москвин Кузебай Герд нимо премия сётэмзы понна тау кылъёссэ вера      Фото: Анжелика Петрова © udmurt.media

Премиез эшшо одӥг басьтӥсь луиз Можга карысь крезьгурчи, «Марӟан» ансамбльлэн кивалтӥсез Вячеслав Кудрявцев.

«Та премилы мон туж шумпотӥсько, малпасько, сое зэматыны трос ужаны кулэ. Ужасько мон удмурт кырӟан бордын, нош мылкыды мынам эшшо вань удмурт кылэз ӝутыны: удмурт кырӟан мед чузъяськоз, медаз вунэтэ удмурт кылэз, удмурт кырӟанъёсты. Озьы ужаса, сое адӟизы адямиос, валазы. Соин, малпасько, премия мыным сётӥзы. Шумпотӥсько. Бадӟым тау шуисько «Удмурт Кенешлы» но, вань удмуртъёслы но», — мылкыдзэ вераз со иворъёсъя «Удмуртия» агентстволэн корреспондентэзлы.

Озьы ик пусйизы Эстониысь гожъясез, удмурт литератураез эстон кылэ берыктӥсез Арво Валтонэз. Данъетэз солы сётыны Удмуртиысь гожъясьёслэн огазеяськонзы ӵектӥз.

Та пумиськонэ Арво Валтон вуыны ӧз быгаты, но «Герд лыдӟонъёсы» люкаськемъёслы гожтэт пыр вазиськиз но премиен пусъемзы понна тау кариз.

«Герд удмурт калыклэн лулпушлыко героез вал но, али но луэ. Соослэсь троссэ ужъёссэ эстон кылэ берыктыса но со берыктэмъёсты тросаз изданиосын поттыса, мон туж тырмытскылӥ. Мон оскисько, Кузебай Гердлэн удмурт лулчеберетэз улӟытон понна нюръяськемез удмурт интеллигенция, ас калыксэ, аслэсьтыз быдӟым лулчеберетсэ яратӥсь, аслэсьтыз узыр кылзэ, аспӧртэмлыксэ утён понна сылӥсь вань удмуртъёс понна адӟем карымон луоз. <…> Удмурт кылын дышетонэз но тодосэз ӝутэ, кызьы сое лэсьтӥз даур талэсь азьло Кузебай Герд. Кылдытэ анай кылын школаосты, вераське анай кылын нылпиосыныды, кыл сярысь кутэм кат улсын асьтэ кылдэс котькытын кутэ, эн сётӥське ассимиляцилы, угось ачиз калык гинэ, солэн котькуд ёзчиез ӵошен утьыны быгатозы ас калыксэс» (Арво Валтонлэн гожтэтысьтыз)

Вераны кулэ, Арво Валтон сяна, та премиез палэнысь кык адями басьтылӥз. Со - Чувашиысь калык гожъясь Мишши Юхма (Михаил Ильин) (1994-тӥ арын) но Венгриысь тодмо финно-угровед, тодосчи Петер Домокош (1995-тӥ арын).

Тодэ вайытом, 2016-тӥ ар понна Кузебай Герд нимо йӧскалык премиез басьтӥсьёсты «Удмурт Кенеш» огазеяськонлэн исполкомаз юнматӥзы. Премия 1992-тӥ арысен, удмуртъёслэн Нырысетӥ Ӧтчамзылы ар тырмон нуналызлы сётӥське. Туннэ нуналлы сое 57 адями басьтӥз ини. Соин удмурт лулчеберетэз, сям-йылолъёсты азинтӥсьёсты, утисьёсты, удмуртъёслэсь шуг-секытъёссэс сэрттӥсь-пертчисьёсты, калыкъёслэсь эшлыко кусыпъёссэс юнматӥсьёсты пусъё.

Пичи Пургае «Герд лыдӟонъёсы» Удмуртиысь 400 пала адями люкаськылӥз — удмурт азьветлӥсьёс, тодосчиос, дышетӥсьёс, пиналъёс. «Удмурт Кенешлэн» тӧроез Татьяна Ишматова вуоно арын ужрадэз Кузебай Гердлэн вордӥськем палъёсаз — Вавож ёросын ортчытыны чаклало шуыса вераз.



Наверх
Вниз