100 лет государственности Удмуртии
Ижкар+12 °C
1 -тӥ инвожо 2020 Вордӥськон
16+

Тодосчи Александр Шкляев: удмурт ужпумъёсты Кузебай Герд кадь шӧдӥсь адями ноку но ӧй ни вал

  • 638
  • 0
Пичи Пурга / Удмуртия
Тодосчи Александр Шкляев: удмурт ужпумъёсты Кузебай Герд кадь шӧдӥсь адями ноку но ӧй ни вал
Фото: Анжелика Петрова

Пичи Пургаын ортчем «Герд лыдӟонъёс» улсын 16-тӥ тулыспалэ элькунысь удмурт тодосчиос но азьветлӥсьёс Кузебай Герд, солэн ужъёсыз, калыкез туннэ сюлмаськытӥсь ужпумъёсын докладъёсынызы тодматӥзы. Со сярысь ивортэ «Удмуртия» агентстволэн корреспондентэз.

Кузебай Гердлэн публицистикаез пыр со вакытысь лэчыт ужпумъёс адӟиськон сярысь яркыт докладзэ лыдӟиз Удмурт кун университетысь дышетӥсь, кылосбур тодосъя кандидат Александр Шкляев.

«Солэн (Кузебай Гердлэн — ред.) сюлэмыз висе вал котькуд событие понна. Солэсь творчествозэ кылбурысь кылбуре эскерыны луэ, мар сое сюлмаськытэ вал но кызьы солэн сюлмыз бугыръяськиз кунлык поттон ласянь, кылэз мургес дышетон ласянь, книга-газет поттон ласянь. Ваньмыз со сое сюлмаськытэ вал. Кызьы шуэмын вал Пушкинлэн «Все волновало нежный ум». Гердэз сюлмаськытэ вал котькуд событие. Калыклэн улон сюресэз. Берло со допросын шуиз: «Монэ быдтӥз удмурт калык борды пуны кадь дэмӟиськеме» («Меня погубила моя собачья преданность удмуртскому народу»). Удмурт ужпумъёсты со кадь шӧдӥсь адями ноку но ӧй ни вал», — пусйиз тодосчи иворъёсъя «Удмуртия» агентстволэн корреспондентэныз вераськыкуз.

Глобализация вакытэ кылъя политика сярысь вераськон мытӥз Россиысь тодосъя академилэн Урал ёзэтысьтыз Историяя, кылъя но литературая удмурт институтлэн кивалтӥсезлэсь ужзэ огдырлы быдэсъясь Александр Егоров. Со кылэз выльдытон сярысь нимаз вераськиз. Кылсярысь, кызьы со ортче вал ХХ даурлэн кутсконаз Европаысь пӧртэм кунъёсын - Франциын, Венгриын -  но асьме дорын, али кыӵе воштӥськонъёс но кыӵе ужпумъёс сыло кылчиос азьын яке огшоры удмурт калык азьын.

«Вераны кулэ, Европаысь кылъёсы но али туж зол англи кылъёс пыро глобализациен йырин. Пӧртэм валатонъёсты адямиос тыршо али кылын вераны. Нош Франциысь тодосчиос солы пумит луо, малы ке шуоно соослэн утемзы потэ француз кылзэс, мед луоз кылзы чылкытгес шуыса. Соин соос малпало пӧртэм амалъёс, кылдыто пӧртэм сайтъёсын опрос выллем яке выль кылъёсын лыдмет пырто, кудзэ огшоры калык лыдӟыны быгатэ но бырйыны аслыз кельшисьсэ, со понна куара сётыны. Озьы тӥни вераськонэ но, гожъяськон кылэ но выль кылъёс пыро», — пусйиз Александр Егоров. 

Пичи Пургаысь лыдӟиськон юртлэн кивалтӥсез Людмила Шумилова «К истокам Воршуда — новый взгляд» ӵектоссэс улонэ пыӵатэмзы сярысь вераз. Солы Пичи Пурга ёросысь Бобья-Уча гуртын дышетскисьёс юрттӥзы.

Историяя, кылъя но литературая удмурт институтысь кылосбур эскеронъёсъя ёзэтысь тодосъя ӧнерчи, кылосбур тодосъя доктор Алексей Арзамазов Кузебай Гердлэн кылосбур дуннеяз гурт но кар пумитъяськон, удмуртъёслэсь дуннезэс но ӟучъёслэсь дуннезэс узырмытӥсь кусыпъёс сярысь вераськиз. Со тема удмурт литератураын али но вӧлмемын луэ шуиз со.

Удмурт кылэз адямилы ас интызэ шедьтыны амалэз сямен эскериз Историяя, кылъя но литературая удмурт институтысь междисциплинарной но прикладной эскеронъёсъя ёзэтысь тодосъя валтӥсь ӧнерчи, истори тодосъя кандидат Игорь Поздеев. Солэн верамезъя, удмурт кыл мукет калыкъёс пӧлын астэ капчигес шедьтыны луонлык сётэ. Нош удмурт кылэз школаосын дышетон - пиналъёслы лулчеберетэз пыӵатыны но утьыны валтӥсез амал луэ шуыса пусйиз.

Тодэ вайытом, таяз арын нырысьсэ «Герд лыдӟонъёс» Ижкарлэн палэназ ортчизы. Вуоно арын пумиськонэз Вавож ёросын радъяны малпало. Ужрадын озьы ик Кузебай Герд нимо премилэсь лауреатъёссэ пусйизы.  



Наверх
Вниз