Ижкар-1 °C
22 -тӥ коньывуон 2020 Покчиарня
18+

Удмуртилэн тӧроезлэсь ужзэ быдэсъясен пумиськонын «Удмурт Кенешлэн» азьветлӥсьёсыз йӧскалык дышетон сярысь ужпумъёсты ӝутӥзы

  • 574
  • 0
Ижкар / Удмуртия
Удмуртилэн тӧроезлэсь ужзэ быдэсъясен пумиськонын «Удмурт Кенешлэн» азьветлӥсьёсыз йӧскалык дышетон сярысь ужпумъёсты ӝутӥзы
Туспуктэм: Григорий Фомин

Удмуртилэн тӧроезлэсь ужзэ быдэсъясен Александр Бречаловен пумиськонын «Удмурт Кенешлэн» азьветлӥсьёсыз йӧскалык дышетон сярысь ужпумъёсты ӝутӥзы. Кенешон 20-тӥ куартолэзе «Лудорвай» музей-заповедникын ортчиз.

Кызьы вераз иворъёсъя «Удмуртия» агентстволы «Удмурт Кенеш» огазеяськонлэн тӧроез Татьяна Ишматова пумиськонын трос юанъёс ӝутэмын вал, нош тужгес сюлмаськытӥсьёсыз йӧскалык дышетонэн герӟаськемын.

«Татын туж трос юанъёс кылдо: учебникъёсъя асьмелэн пумозяз лэсьтэмын ӧвӧл аккредитация вань линейкаослы, собере удмурт садикъёс удмурт пиналъёс понна ӧвӧл, кытын соос быгатысалзы удмурт кылэз дышетыны. Туж паймыса со кылзӥз со (Александр Бречалов — ред.) ужпумъёсты. Сое одно ик сэрттыны-пертчыны кулэ шуыса вераськиз. Удмурт гимназиос пумысен ӝутӥм (ужпумез — ред.), Можгалан но, Глазовын но сыӵе луонлык луысал ке, туж умой луысал шуыса, озьы ик Можгаысь педколледжъя», — вераз Татьяна Ишматова.

Солэн кылъёсызъя, та юанъёсты сэрттон-пертчон, кыӵе ке но ужанрадлык дасян понна нимысьтыз ӧри кылдытэмын луоз шуыса пумкылъян кутэмын. Нырысь ик валаны кулэ, мае али ик лэсьтоно, нош мар кӧня ке возьманы быгатоз на. «Удмурт Кенешлэн» тӧроез верамъя, Александр Бречалов Глазкаре вуылыкуз отысь удмурт азьветлӥсьёсын пумиськылыны, удмурт гимназия усьтыны быръем школае ветлыны оскытӥз. Озьы ик Можгаысь педколледжлэн ужаменыз тодматскоз шуыса вераз.

Григорий Фомин
«Удмурт Кенешлэн» азьветлӥсьёсыз йӧскалык дышетон сярысь ужпумъёсты ӝутӥзы Фото: Григорий Фомин © udmurt.media

Пумиськонын ӝутэм эшшо одӥгез бадӟым ужпум герӟаськемын вал Ижкарын удмурт лулчеберетъя центр кылдытонэн. «Удмурт Кенеш» сое азьвыл ӟуч драмая театрлэн юртаз интыяны ӵектэ.

«Со отчы ветлӥз ни пумиськонмы бӧрсьы, мылкыдзэ вера кадь кулэ шуыса малпаськыны та ӵектос пумысен. Пумитсэ сыӵе центрлы ӧз вера», — пусйиз Ишматова.

Озьы ик Удмуртилэн кун кылъёсыз сярысь кат пумысен вераськон потӥз. Туннэ со рос-прос уг быдэсъяськы шуыса трос пол верамын ни вал, со сяна, катэ воштонъёс пыртыны кулэлык вань. Соин соглаш луэмзэ вераз улосвыл тӧролэсь ужзэ быдэсъясь но.

«Мон тодэмъя, со али пыр-поч тодматске кун кылъёс сярысь катэн, мон тодэмъя, со запросъёс лэсьтӥз ни, малы, кыӵе отын шугъяськонъёс кылдо, кыӵе редакциос ми дасямы. Солэн тунсыкъясконэз бадӟым, Удмурт Элькунын удмурт калыклы луонлыкъёс котьма ке но кылдытэмын луыны кулэ шуыса», — вераз «Удмурт Кенешлэн тӧроез».

Ужпумлы тӧрлыкъёс саклык висъязы ке, асьсэлэн удмуртъёслэн но кылзэс дышетыны мылкыдзы луоз, школаослэн но администрациослэн кивалтӥсьёссы но валалозы, со юанъёсты сэрттыны-пертчыны кулэ шуыса, лыдъя Татьяна Ишматова.



Наверх
Вниз