Ижкар-5 °C
1 -тӥ толсур 2020 Пуксён
18+

Удмуртия Александр Волковен люкиськиз

  • 495
  • 0
Ижкар / Удмуртия
Удмуртия Александр Волковен люкиськиз
Туспуктэм: Григорий Фомин

Удмуртиын улӥсьёс элькунлэсь нырысетӥ азьмуртсэ Александр Волковез берпуметӥ сюресаз келязы. Люкиськон ортчиз 24-тӥ куартолэзе Ижкарысь Свято-Михайловской соборын. Политикез буре вайыны калык 9 часысен лыктӥз.

Азьвыл сенаторен люкиськыны лыктӥзы: улосвыл тӧролэсь ужзэ огдырлы быдэсъясь Александр Бречалов, кивалтэтлэн тӧроезлэсь ужзэ быдэсъясь Виктор Савельев, кивалтэтлэн ёзчиосыз, Кун Кенешлэн тӧроез Владимир Невоструев, Федераци Кенешлэн тӧроезлэн воштӥсез Ильяс Умаханов, Росси азьмуртлэн Приволжск федерал округъя ужоскето муртэзлэн воштӥсез Олег Мельниченко, Хими ожтӥрлыкез кышкыттэмлыко возёнъя но быдтонъя федерал управленилэн кивалтӥсез Валерий Капашин, «РуссНефть» компанилэн кивалтӥсьёсызлэн кенешсылэн тӧроез Михаил Гуцериев, Брянск улосвылсь губернаторлэн воштӥсез Михаил Кобозев, Федераци Кенешлэн Удмуртилэсь ёзчиез Александр Чекалин, Ижкарлэн тӧроез Юрий Тюрин, Кар думалэн тӧроез Олег Гарин, «Ижевский мотозавод «Аксион-Холдинг» огазеяськонлэн кивалтӥсез Геннадий Кудрявцев, Россиысь Следствиосъя комитетлэн элькунъя Следствиосъя управленилэн кивалтӥсез Владимир Никешкин, Ижкарлэн азьвыл сити-менеджерез Денис Агашин, карлэн азьвыл кивалтӥсез Александр Ушаков но трос мукетъёсыз.

«Тодӥськоды-а, мон оскисько, со шудо адями вал шуыса. Котыраз матысь адямиосыз но ӵыжы-выжыосыз вал шуыса гинэ ӧвӧл. Со шудо вал туж трос лэсьтыны быгатэменыз но - сое, мар кема аръёс ӵоже адямиос понна ужалоз. Со зэмос шуд: ортчем сюресэз учкыса, адӟыны храмъёсты, мечетьёсты, нылпи садъёсты, школаосты. Нош валтӥсез — адӟыны адямиосты, кинлы со юрттӥз. Удмурт Элькунлэн нырысетӥ азьмуртэз, калыкез но аслэсьтыз музъемзэ сюлмысьтыз яратӥсь патриот сайкытэн тодэ мед кылёз», — вераз люкиськон кылаз улосвыл кивалтӥсь Александр Бречалов.

Александр Волковен люкиськон

25 фото

Александр Волковез Ижкарлы матысь Хохряки гурт вӧзысь шайвылын ватӥзы.

Федераци Кенешлэн ёзчиез улонысь кошкемен валче 24-тӥ куартолэзез Удмуртиын кайгырон нуналэн ялӥзы. Быдэс элькунын куншетъёсты лэзизы, шулдыръяськон ужрадъёсты уретӥзы.

Тодэ вайытом, Удмуртилэн нырысетӥ азьмуртэз улонысь кошкиз 20-тӥ куарусёнэ.



Наверх
Вниз