Ижкар-1 °C
22 -тӥ коньывуон 2020 Покчиарня
18+

Удмурт лулчеберетъя центрлэн пуштросэз пумысен калыкен кенешон ортчиз Ижкарын

  • 632
  • 0
Ижкар / Удмуртия
Удмурт лулчеберетъя центрлэн пуштросэз пумысен калыкен кенешон ортчиз Ижкарын
Туспуктэм: Майя Бывальцева

7-тӥ инвожое Ижкарын Удмурт лулчеберетъя центрлэн пуштросэз пумысен калыкен кенешон ортчиз. Удмуртиысь кун филармонилэн залаз люкаськемъёс трос ӵектонъёс вераны. Соос центрлэсь учкетсэ (концепцизэ) кылдытыку одно ик лыдэ басьтэмын луозы.

Калык кылзонъёсы удмурт азьветлӥсьёс, тодосчиос, «Удмурт Кенеш» огазеяськонлэн тӧроез Татьяна Ишматова, Удмуртиысь тӧролэн но кивалтэтлэн администрациенызы кивалтӥсьлэсь ужзэ быдэсъясь Сергей Смирнов, элькунысь лулчеберетъя но туризмъя министрлэсь ужзэ быдэсъясь Владимир Соловьёв, печатья но калыке ивортодэт вӧлмытонъя агентстволэн кивалтӥсез Алексей Воронцов, Ижысь Кар Думалэн тӧроез Олег Гарин пыриськизы.

Кенешонэз кутскыса, Татьяна Ишматова пусйиз, туннэ асьмеос ог-огмес оскытыны кулэ ӧвӧл ни со центр кулэ шуыса, али ужпум — солэн пуштросэзъя одӥг кылэ вуон.

Валано, мар отын луыны кулэ, кызьы со азинскыны кулэ но кызьы асьмеос со центре калыкез кыскыны быгатомы, Удмурт Элькунысь гинэ ӧвӧл, туристъёсты но
Татьяна Ишматова

Удмуртиысь тӧролэн но кивалтэтлэн администрациенызы кивалтӥсьлэсь ужзэ быдэсъясь Сергей Смирнов озьы ик пусйиз - Удмурт лулчеберетъя центрлэн кулэлыкез пумысен юанъёс ӧвӧл ни. Со луоз шуыса пумкылъян кутэмын ни. Но азьвыл Короленко нимо театрлэн юртэз быдэсак выльдэмез кулэ каре.

«Ужкагазъёс юнматэмын ӧвӧл на, но Александр Владимирович (Бречалов, улосвыл тӧролэсь ужзэ огдырлы быдэсъясь — ред.) вераны куриз, пумкылъян кутэмын ни шуыса, со юртын ми Удмурт лулчеберетъя центр лэсьтом. Таяз арын тупатъян ужъёсты кутскомы. Кӧня ке ар ортчыса, шонергес вераса, куинь ар улыса, Удмуртилэн кунлыкезлы 100 ар тырме. Мон вераны быгатӥсько, со дырлы, тыршомы вазьгес но, Удмурт лулчеберетъя центр отын усьтӥськоз», — ивортӥз Сергей Смирнов.

Со оскемзэ вераз, та ужын удмурт азьветлӥсьёс, интеллигенция, Ижкарын улӥсьёс центрез тунсыко лэсьтыны юрттозы шуыса. Центр мед луоз шуыса гинэ ужаны кулэ ӧвӧл, со удмурт лулчеберетэз кунамы, быдэс дуннеын улӥсьёслы возьматыны кулэ.

«Удмурт лулчеберет туж узыр. <…> Ижкаре лыктӥсьёслэн ужанрадлыказы та центре ветлон одно ик мед луоз. Соин ик ужбергатонэз но кыскыны кулэ, йӧскалык сиён-юонъёсын ӟеч ресторан усьтыны. Юртлэн бераз умой интывыл вань, отчы пуктӥськыны луоз. Ми али кун но ужбергатон валче вылысь ужалозы шуыса малпаськиськомы ни», — вераз Удмуртиысь тӧролэн но кивалтэтлэн администрациенызы кивалтӥсьлэсь ужзэ быдэсъясь.

Майя Бывальцева
                                                                                                                                                Фото: Майя Бывальцева © udmurt.media

Тодэ вайытом, али драмая ӟуч театрлэн азьвыл юртаз фольклор кырӟанъя, но эктонъя «Айкай» театр гинэ ужа. Солэн чеберлыкъя кивалтӥсез Олег Бимаков верамъя, Удмурт лулчеберетъя центрез усьтон театрлы но ужзэ паськытатыны луонлыкъёс сётоз. Кылсярысь, нылпиослы студия кылдытыны. Озьы ик со ӵектӥз киужъёсъя, крезьгуро инструментъёсты лэсьтонъя, куараез гожтонъя студиос, шаертодонъя литератураен но нотаосын бичетъёсын библиотека усьтыны.

Тросэз веразы, ужъюрт «Удмурт лулчеберетъя «Айкай» центр» нимаськыны кулэ шуыса. Нош «Айкай» театр солэн шорсюлмыз мед луоз. Лулчеберет ужрадъёсъя режиссёр Павел Поздеев верамъя, сыӵе ним центрлэсь философизэ возьматоз: «Айкай» — тулысэз пумитан йылол, соин ик, кызьы тулыс ваньмыз пушъе, озьы ик центр но удмурт лулчеберетэз выльдоз но азинтоз.

Озьы ик солэн кылъёсызъя центрын луыны кулэ удмурт но удмуртъёсын герӟаськем ужрадъёсты радъянэн вырись бюро, ӵектосъёсъя бюро, кудӥз удмурт калыклэсь, карын улӥсьёслэсь кулэяськонъёссэс эскероз но соосты быдэсъян бордын тыршоз. Озьы ик дышетон ӧр луыны кулэ — нылпиослы студиос но кружокъёс.

Нош оглом уж центр вылын дугыды кулэ ӧвӧл, лыдъя Павел Поздеев. Удмуртлыкез возьматон понна ужатоно быдэс котырез (городское общественное пространство). Карл Марк урамысен Горький урам пала мынонын вань на буш инты, отын выжыкылъёсысь, мифъёсысь геройёсын тунсыко парк кылдытыны луэ. Горький урамын вань Геннадий Красильниковлэн музей-квартираез, удмурт сиён-юонъёсын ресторан. Озьы шутэтскыны но, вылзэ тодыны но луонлыкъёс паськытгес луозы.

Та малпанлы дурбасьтэмзэс веразы егит азьветлӥсьёс Дарали Лели но Алексей Шкляев. Соослэн чакламзыя, центрын одно ик луыны кулэ туала лулчеберетэз возьматон инты но. Дарали Лели верамъя, отын туала удмурт ӵектосъёсъя аспӧртэм штаб ужаны кулэ. Алексей Шкляев IT-центр усьтыны дэмлаз. Озьы ик умой луысал берыктон ужен вырись бюро кылдытыны, кудӥз элькун катъёсты удмурт кылэ берыктон ужез нуоз, нош со удмурт кылэз азинтыны юрттоз.

Майя Бывальцева
                                                                                                                                                Фото: Майя Бывальцева © udmurt.media

«Удмурт Кенешлэн» экспертно-консультативной кенешезлэн кивалтӥсез Игорь Семёнов верамъя, отын одно ик луыны кулэ удмурт кылэз дышетонъя ялан ужась курсъёс.

Удмурт Элькунлэн дано кунмуртэз, истори тодосъя доктор Владимир Владыкин вуоно центрлэн нимыз пумысен малпанъёссэ вераз. Со удмурт куа (удмуртский дом) ниманы ӵектэ. «Куа яке куала дуннеысь ваньмызлэн финн-угор калыкъёслэн вань», — тодэ вайытӥз со.

Удмурт лулчеберетъя центрлы Владимир Короленколэсь нимзэ сётыны ӵектӥсьёс, но вал. Озьы ик солэсь бюстсэ азьвыл интыяз берыктыны куризы.

Нялтас вераса, юртэз выльдон уже удмурт архитекторъёсты одно ик кыскыны куризы, соос лэсьтӥськонэ но удмурт шӧм пыртыны быгатозы. Нош утялтӥськон, чыры-пыры ужъёсты быдэстыны субботникъёс радъяны ӵектӥзы. Таиз малпан ваньмызлы кельшиз кадь.

Вань ӵектонъёсты вераны висъям дыр ӧз тырмы. Но кенешон одӥг нуналэн уг йылпумъяськы, пусйиз Татьяна Ишматова. Матысь дыръя кылдытозы нимысьтыз группа, дэмланъёсты отчы келяны луоз. Со сяна, та дыре интернет пыр юалляськон азьланьтӥське.

Тодэ вайытом, 20-тӥ куартолэзе «Удмурт Кенешлэн» азьветлӥсьёсыз Удмуртилэн тӧроезлэн ужзэ огдырлы быдэсъясен Александр Бречаловен пумиськылӥзы. Отын соос Короленко театрлэн юртаз Удмурт лулчеберетъя центр усьтыны мылкыдзэс веразы. Улосвыл кивалтӥсь ӵектонлы дурбасьтӥз.

21-тӥ куартолэзе со драмая ӟуч театрлэн азьвыл юртаз ветлӥз. Нош 22-тӥ куартолэзе ортчем аппарат кенешонын вераз кенешчиослэн отын «удмурт лулчеберетъя центр кылдытонъя куронзы туж шонер» шуыса.



Наверх
Вниз