Ижкар-1 °C
27 -тӥ шуркынмон 2021 Кӧснунал
18+

40 адями пыриськоз Татарстанысь удмурт егитъёслэн «БиГерд» форумазы

  • 880
  • 0
Тэремшур / Россия
40 адями пыриськоз Татарстанысь удмурт егитъёслэн «БиГерд» форумазы
Туспуктэм: vk.com (Удмурты Татарстана | Татарстанысь удмуртъёс)

22–23 инвожое Татарстанысь Менделеевск ёросысь Тэремшур (Енабердино) черкогуртын удмурт егитъёслэн нырысетӥез «БиГерд» форумзы ортчоз. Ужрадэ пыриськыны куриськон сётӥз 40 адями. Иворъёсъя «Удмуртия» агентстволы со сярысь вераз «Татарстан Элькунысь удмуртъёслэн йӧскалык лулчеберетъя автономизы» улосвыл мер огазеяськонлэн быдэсъясь кивалтӥсез Марина Иванова.

Форуме пыриськозы 16 аресысен 30 аресозь пиналъёс но егитъёс. Куриськон сётэмъёс пӧлысь ог ӝыныез — школаын дышетскисьёс. «БиГерд» форум куинь ӧръёсъя ужалоз: фольклор, этноквестъёс но этноблогинг.

«Этноблогинг — со мер вотэсъёсын ужан, ас блогъёсты кылдытон сярысь вераськом, удмурт кылын кызьы сое карыны луэ. Сое Алина Крестьянинова нуоз, солэн аслаз блогъёсыз вань. Этноквестъёс — квест заданиос, кызьы соосты дасяно, мар со сыӵе, малы со кулэ, созэ мон нуо ачим. Фольклор — отын Татарстанысь удмуртъёслэсь лулчеберетсэс, йылолъёссэс мургес эскерон луоз милям. Геннадий Ахметов модераторез луоз отын, со Кукмор ёросысь элькунамы тужгес тодмо «Инвожо» ансамбльлэн кивалтӥсез. Со ик программаын Паша Александров луоз но Аня Самсонова», — форумлэсь ужанрадлыксэ валэктӥз Марина Иванова.

Со сяна, Татарстанысь удмуртъёслэн огазеяськонзылэн тӧроез Андрей Герасимов «Мон — удмурт» лекция дася. Кылсярысь, со туала удмуртъёслы мер улонэ пыриськыны кулэлыкъёс сярысь вералоз. Та пумиськонэ Москваысь ӧнерчиез но возьмало.

Кык нунал ӵоже тодонлыкъёссэс но быгатонлыкъёссэс муромытэм бере, 24-тӥ инвожое, «Гырон быдтон» элькун шулдыръяськонын егитъёс возьматозы, марлы соос дышетскизы. Кылсярысь, фольклор ӧръя дасяно луозы кык номер — эктон но кырӟан.

«Гырон быдтонын» дыръя ик тунсыко флешмоб ортчыны чаклало. Форуме пыриськемъёс но мукетъёсыз пиналъёс, но егитъёс, ваньмыз 100–120 адями, удмурт дӥськут дӥсяса удмурт эктон эктозы. Али солы дасяськонъёс мыно.

«БиГерд» форумез радъязы «Татарстан Элькунысь удмуртъёслэн йӧскалык лулчеберетъя автономизы» улосвыл мер огазеяськон но Менделеевск ёрос. 

«Та нырысетӥез форум, таӵе форматэн удмуртъёс пӧлын Татарстанын ужамзы ӧвӧл али», - пусйиз Марина Иванова.



Наверх
Вниз