Ижкар+19 °C
14 -тӥ оштолэзь 2021 Вирнунал
18+

Удмуртиысь Максим Фефилов Владимир Путинлы этнографи диктант сярысь вераз

  • 695
  • 0
Йошкар-Ола / Россия
Удмуртиысь Максим Фефилов Владимир Путинлы этнографи диктант сярысь вераз
Туспуктэм: пресс-служба Кремля

20-тӥ пӧсьтолэзе Йошкар-Олаын ортчем йӧскалык кусыпъёсъя кенешлэн пумиськоназ Удмуртиысь Ӟуч лулчеберетъя огазеяськонлэн ыстэм муртэз Максим Фефилов Владимир Путинлы этнографи диктант сярысь вераз. Со сярысь ивортэ Кремьллэн пресс-службаез.

Тодэ вайытом, Бадӟым этнографи диктант понна кунысьтымы калыкъёс но улосвылъёслэн лулчеберетъя пӧртэмлыкъёссы сярысь 30 юанъёс дасямын вал. Ужрадэ Россиысь улосвылъёс, озьы ик Турция, Израиль но Швейцария пыриськизы. Огъяросси этнографи диктантэз 42 сюрс адями гожтӥз. Быдэс кунъя 800 инты радъямын вал. 50 сюрслэсь трос адями юанъёслы валэктонъёс ӵектослэн сайтаз онлайн амалэн сётӥз.

Максим Фефиловлэн верамезъя, та ужрад Удмуртиын юнме шорысь ӧз кылды. Элькунысь йӧскалык огазеяськонъёс тупаса уло, ог-огенызы юн кусыпъёс возё. Озьы ке, но, улосвылъёслэн ыстэм муртъёссы чакламъя, адямиос ог-огзы сярысь туж ӧжыт тодо, туала улонын калыкъёс, йӧскалык лулчеберет сярысь тодонлыкъёс уг тырмо.

«Миля умой герӟет кылдӥз. Милем гожтэтъёс гожъязы, жингыртӥзы, юазы, ку шонер валэктонъёсты тодыны луоз, ку вуоноез этнографи диктант луоз. Со ласянь ми ужпумез быдэстӥмы —  тунсыкъяськонэз ӝутӥмы, саклыкез кыскимы. Та выллем ӵектосъёс кун йӧскалык политикаез быдэстонъя кун программаын ас интызэс шедьтыны кулэ шуыса малпаськомы. Сое сяме пыӵатыны но Калыкъёслэн огазеяськем нуналзылы тупатыны луэ. Таяз арын ми сое 3-тӥ шуркынмонэ ортчытыны малпаськомы. Озьы ик умой луоз, таяз арын ӵектос борды тодмо адямиос итӥськизы ке: политикъёс, спортсменъёс, крезьгурасьёс, актёръёс», — вераз Максим Фефилов но кун кивалтӥсез ас пыриськемыныз ӵектослы дурбасьтыны куриз.

Кенешонлэн ёзчиосыз Владимир Путинэн Россилэсь кун йӧскалык политикаезлэсь 2025-тӥ арозь стратегизэ улосвыл но муниципал ёзъёсын быдэсъян сярысь вераськизы. Со ужкагазлэсь ӵектосэз эскерон азьвыл паськыт мынӥз, отын 3 сюрслэсь трос дэмланъёс лыдэ басьтэмын.

Кунлэн азьмуртэз улосвылъёсын но муниципалитетъёсын калык лулчеберетъя тодметъёсты (брендъёсты) азинтыны но вӧлмытыны кулэ шуыса пусйиз.

«Кунмы аслаз куазеныз, калык йылолъёсыныз аспӧртэм луэ, но соосты дышетонлы могӟет ӵемысь луэ интыосын кичӧлтонъёсэн ӧвӧлтэмзы. Нош, кылсярысь, со этнографи туризмлы ик кулэяськон быдэс дуннеын будэ, озьы ик асьме кунамы но, — со зэмзэ озьы. Уката ик Россиын, мукетъёсыз сярысь, вань мае возьматыны, маин данъяськыны», — пусйиз Владимир Путин.



Наверх
Вниз