Ижкар-24 °C
6 -тӥ толсур 2021 Вордӥськон
18+

«Удмурт нылкышно кенешлэн» Сьӧлта ёросысь ёзэтэз «Тетера» клубзэ усьтӥз

  • 674
  • 0
Сьӧлта / Удмуртия

«Удмурт нылкышно кенешлэн» Сьӧлта ёросысь ёзэтэзлэн «Тетера» клубез ужаны кутскиз. Нырысетӥ пумиськонзэс 14-тӥ толсуре Выль Мӧнья гуртысь лулчеберетъя юртын ортчытӥзы, сое нуны веттан гуръёслы сӥзизы. Со сярысь ивортодэтъя «Удмуртия» агентстволы Сьӧлта ёросысь нылкышноослэн огазеяськонзылэн кивалтӥсез Светлана Хлебова вераз.

Нуны веттан гурлы сӥзем ӝытэ ог 30 адями люкаськиз — Сьӧлта ёросысь пӧртэм гуртъёсысь куноос но нылпиослэн «Дарали» фольклор ансамбльзы.

Одӥг семья но нуны веттан гуртэк нылпизэ уг будэты, соин ик та пумиськонмы но милям солы сӥземын вал. Ваньмыз со бордысь потэ, дыр. Мар меда анай-атай сӥзиллям асьсэлэн нылпизылы, кызьы со будоз шуыса. Нуны веттан гурын озьыгес вераське ук, мар ужалоз нылпи бадӟым будыса шуыса
Светлана Хлебова
 

Ӝыт ӵоже люкаськемъёс гуртъёсысьтызы нуны веттан гуръёсын тодматӥзы, кырӟазы но веразы. Туж тунсыко, Выль Мӧнья гурт котырын гинэ но куинь-аньыль-а нуны веттан гур шедиз шуыса, пусйиз ёросысь «Удмурт нылкышно кенешлэн» кивалтӥсез.

Ижкарысь удмурт нылкышноослэн «Табань-клубзы» музэн ик Сьӧлтаос но клубзэс сиён нимын нимазы. Светлана Хлебовалэн верамезъя, тетера — со Сьӧлталэн аспӧртэмлыкез, малы ке шуоно сое Удмуртиысь куд-ог ёросъёсын уг ик пӧрало, соин ик та удмурт калык сиёнэз Сьӧлта ёрослэн брендэзлы пӧрмытыны кулэ.

Ватсалом, «Тетера» клублэн ужез одӥг яке кык толэзьлы одӥг пол радъяськоз. Вуоноез пумиськон толшоре ортчоз. Отчы нимысьтыз куноез ӧтёзы — Кӧпка черкогуртысь дӥсь вурисез но мунё лэсьтӥсез Иза Мамееваез. Светлана Хлебова малпамъя, клублэсь ужзэ мукет гуртъёсы потаса паськытатыны луонлык кылдоз. 

Тодэ вайытом, шуркынмонэ Ижкарын «Удмурт нылкышно кенешлэн» «Табань-клубезлэн» пумиськоназ «Меми дор сяськаос» интернет-вожвылъяськонын вормисьёсты пусйизы.

Нялтас вераса, «Удмурт нылкышно кенешлэн» ёзэтэныз кивалтон сяна, Светлана Хлебова Выль Мӧнья гуртысь школаын удмурт кылъя но литературая дышетӥсь луыса ужа, «Дарали» фольклор коллективен кивалтэ. Туэ со Россиын анай кылэз дышетӥсьёс пӧлын одӥгез устоез луиз



Наверх
Вниз