Ижкар-19 °C
26 -тӥ тулыспал 2021 Удмуртарня
18+

Ижкарын пуштон сэрен изъянмем коркалэн куинь подъездъёсаз улӥсьёс патеръёсазы берытскыны кутскизы

  • 375
  • 0
Ижкар / Удмуртия
Ижкарын пуштон сэрен изъянмем коркалэн куинь подъездъёсаз улӥсьёс патеръёсазы берытскыны кутскизы
Туспуктэм: Ульяна Колмогорова

Ижкарысь Удмуртской урамысь чагыр эстӥськон пуштэмен изъянмем юртлэн 1–3 подъездъёсаз улӥсьёс патеръёсазы берытскыны кутскизы. Со сярысь журналистъёслы вераз Удмуртиысь лэсьтӥськонъя, жилищно-коммунальной возёсъя но дыкужымъя министрлэсь ужзэ быдэсъясь Иван Ястреб.

Вордӥськонэ ми нырысетӥ-куинетӥ подъездъёсысь конструкциослэн ӟечлыксыя йылпумъянъёсты басьтӥмы. Со йылпумъянъёсъя нырысетӥысен куинетӥозь секциос уже кутымонэн лыдъямын, ми калыкез асьсэ патеръёсазы лэзьыны быгатӥськомы. Со уж туннэ радъямын луоз
Иван Ястреб

Солэн кылъёсызъя, тӧрлыкъёс югдурез чакласа возёзы. Шекъёсты шараяса, калык соослы вазиськыны быгатоз.

Изъянмем подъездэз сэрттон но юртлэсь конструкциоссэ юнматон ужъёсты азьланьтозы. Лэсьтӥськисьёс кык сменаен ужалозы. Та дырлы секцилэн витез вылӥ этажъёсыз кесямын ни.

Ижкар администрацилэн тӧроезлэн нырысетӥ воштӥсез Ильдар Бикбулатов верамъя, туннэ патеръёсазы 330-лэсь трос адями берытскыны кулэ.

10 часысен нырысетӥ подъездын улӥсьёс доразы берытскыны кутскизы, 11 час 30 минутысен кыкетӥ подъездэ пырыны лэзизы, 13 часысен куинетӥ секцие лэзёзы. Кин ужан вакытэ лыктыны ӧз быгаты, ӝытазе берытскыны быгатозы.

Улӥсьёсты коммунальной ёзэсъёсысь ыстэм муртъёслэн ӧризы келя. Электротыл подъездъёсы кемалась сётэмын ни, калык пыремен ӵош патеръёсы кезьыт но пӧсь вуэз, чагыр эстӥськонэз лэзёзы.

Ильдар Бикбулатов верамъя, та подъездъёсты ватсаса шунтонлэн кулэлыкез ӧвӧл.

Ватсаса шунтӥсько ньылетӥ но куатетӥ подъездъёслэн кырысь борддоръёссы гинэ — отын, кытын витетӥ секциез сэрттон мынэ, со борддоръёс, кудъёсыз коркалэн пушказ вал, али кыре кылё. Соин ик чотало, кӧня батареяос ватсаса пуктыны кулэ, со уж та дыре мынэ. Со сяна, усьтӥськем борддоръёсты плитаосын ворсалозы
Ильдар Бикбулатов

Витетӥ секциез сэрттон но юртлэсь конструкциоссэ юнматон ужъёсты тулыспал шорозь йылпумъяны чаклало, собере эскеронъёс ортчытозы, кудӥз бере тодмо луоз, ярало-а улыны ньылетӥез но куатетӥез подъездъёс.

Укмыс этажъем юртын чагыр эстӥськон 9-тӥ шуркынмонэ пуштӥз. Следстви ивортэмъя, шимучыр отын одӥгез улӥсь сэрен кылдӥз.



Наверх
Вниз