Ижкар+22 °C
11 -тӥ пӧсьтолэзь 2020 Кӧснунал
16+

Кузебай Герд вордскем дырысен 120 ар: кызьы пусъёзы сое Ижкарын но гожъясьлэн вордскем Вавож ёросаз

  • 661
  • 0
Ижкар / Удмуртия
Кузебай Герд вордскем дырысен 120 ар: кызьы пусъёзы сое Ижкарын но гожъясьлэн вордскем Вавож ёросаз
Туспуктэм: Майя Бывальцева

14-тӥ толшоре удмурт гожъясь, югдытӥсь но дышетӥсь, фольклорист но этнограф, кылчи но критик Кузебай Герд (Кузьма Павлович Чайников) вордскем дырысен 120 ар тырме. Удмурт калыклэн дано пиезлэн котькуд вордскем нуналаз буре ваён, сӥлы карон ужрадъёс ортчо. Ивортодэтъя «Удмуртия» агентство тодӥз, кызьы туэ пусъёзы Гердлэсь юбилейзэ Ижкарын но гожъясьлэн вордскем Вавож ёросаз.

12-тӥ толшоре Ижкарысь Г. Д. Красильниковлэн музей-квартираяз (М. Горький нимо урам, 45) Кузебай Гердлэн творчествоезлы сӥзем пумиськон-кенешон ортчоз. Ужрадэ гожъясьлэсь, югдытӥсьлэсь улон но ужан сюрессэ эскерись ӧнерчиосты, тодосчиосты, вордскем шаерлэн историеныз тунсыкъяськись студентъёсты, но дышетскисьёсты ӧтё. Кенешон удмурт но ӟуч кылъёсын мыноз.

Ужрад 18 часын кутскоз, пыронэз эркын. Ватсаса юанъёс сётыны луоз (3412) 78-67-65 телефонъя.

14-тӥ толшоре Удмуртиысь Лулчеберетъя но туризмъя, министерство, «Удмурт Кенеш» огазеяськон но К. Герд нимо йӧскалык музей вань мылкыды карисьёсты удмурт калыклэн дано пиезлы синпелет доры (Коммунаръёслэн урамзы, 287) сяськаос поныны ӧтё, озьы ик солэсь кылбуръёссэ лыдӟон радъямын луоз.

Ужрад 15 часын кутскоз.

14-тӥ толшоре Вавож черкогуртысь паркын Кузебай Гердлэн вордскем дырысеныз 120 ар тырмонлы сӥзем флешмоб ортчоз. Отчы вань мылкыд карисьёсты ӧтё. Люкаськем калык «улэп» букваосын «Кузебай Герд 120» гожтоз. Сое квадрокоптерен видео вылэ пуктозы, кудзэ тулыспалэ элькун «Герд лыдӟонъёс» конференциын возьматозы.

Ужрад 11 часын кутскоз.

15-тӥ толшоре Удмуртиысь Йӧскалык лыдӟетъюртлэн Йӧскалык но шаертодон литературая но библиографияя центраз (Удмуртской урам, 264) Кузебай Гердлы сӥзем ӝыт ортчоз. Мылкыд карисьёс кылбуръёсты шара лыдӟыны быгатозы. Соосты гожъясьлэн улон вакытэз поттэм бичетъёсысь бырйыны ӵектозы — со «Крезьчи» (1922), «Сяськаяськись музъем» (1927), «Лёгетъёс» (1931) книгаос.

Со сяна, Кузебай Герд сярысь вераськозы литератураез эскерисьёс, кылосбур тодосъя докторъёс Василий Ванюшев но Алексей Арзамазов. Озьы ик ӝытын Йӧскалык лыдӟетъюртлэн фондаз утиськись Гердлэн кырӟанъёсыз чузъяськозы.

Ужрад 18 часын кутскоз, пыронэз эркын. Ватсаса юанъёс сётыны луоз (3412) 72-89-09 телефонъя.

15-тӥ но 16-тӥ толшоре Вавож ёросысь Гурезь-Пудга гуртысь Кузебай Гердлэн музей-юртаз вань мылкыд карисьёс дунтэк пырыны быгатозы.

Нош 26-тӥ толшоре Гурезь-Пудгаысь школаын ёрос «Герд лыдӟонъёс» ортчозы. Отчы Вавож ёросысь дышетскисьёс пыриськозы, озьы ик Ува ёросысь, Ижкарысь Кузебай Герд нимо гимназиысь, «Ӟечбур!» газетысь куноос луозы.

Тулыспалэ Вавож черкогуртын 21-тӥез «Герд лыдӟонъёс» элькун конференци ортчоз.



Наверх
Вниз