100 лет государственности Удмуртии
Ижкар+21 °C
7 -тӥ инвожо 2020 Воскресенье
16+

Йӧскалык азьветлӥсез Кузебай Гердэз буре ваизы Удмуртиын

  • 608
  • 0
Ижкар / Удмуртия
Йӧскалык азьветлӥсез Кузебай Гердэз буре ваизы Удмуртиын
Туспуктэм: Майя Бывальцева

14-тӥ толшоре Удмуртиын гожъясез, йӧскалык азьветлӥсез, Удмурт автономия кылдытон понна нюръяськисез Кузебай Гердэз буре ваизы. Ижкарысь синпелетэз доры (усьтэмын 2005-тӥ арын 2-тӥ шуркынмонэ) удмурт азьветлӥсьёс, политикъёс, дышетӥсьёс, пиналъёс люкаськизы.

Вераськисьёс Кузебай Гердлы тау карон кылъёссэс веразы но туннэ асьмеос жадьытэк ужаны, солэсь кутскем ужзэ азьланьтыны кулэ шуыса пусйизы.

«Туннэ секыт син азе пуктыны, луысалыз-а мед-а Удмурт Элькун нимаз автономия но нимаз элькун, ой-а? Нош соослы луыса асьмеос туннэ дасяськиськом юбилейлы — автономилэн 100 ар тырмонэзлы (2020-тӥ арын — ред.) <…>», — вераз Удмуртиысь лулчеберетъя но туризмъя министр Владимир Соловьёв.

Кузебай Гердлы 120 ар тырмонэз пусъён

12 фото

1926-тӥ арын Кузебай Герд шаертодонъя музеен кивалтыны кутскиз, улосвылын музей сӧзнэтэз кылдытонъя нырысетӥзэ учкетэз (концепциез) гожтӥз. Солэн валтэмез улсын нырысетӥосыз экспедициос ортчизы, соку люкам арбериосын но ивортодэтэн Йӧскалык музейын тодматскыны луэ.

Та дыре Кузебай Гердлэсь нимзэ нулло Ижкарысь но Вавожысь урамъёс, Удмурт Элькунысь Йӧскалык музей, Йӧскалык гимназия.

Гимназилы Кузебай Гердлэсь нимзэ сётон сярысь ивортодэтъя «Удмуртия» агентстволэн корреспондентэзлы вераз дышетсконнилэн соку кивалтӥсез, та дыре «Удмурт Кенеш» огазеяськонлэн Ижкарысь Первомай ёросъя ёзэтэзлэн кивалтӥсез Ольга Шилова.

«Туж мон солы синмаськемын вал — дӥсьтонлыкезлы, быгатонлыкезлы котыр ласянь. Мынам но сыӵе пиналъёсты будэтэм потӥз та гимназиын. Малы ке шуоно учке ай: со ик этнограф, со ик историк, со ик литературовед, со ик гожъяськись, со ик кун ужась. Сыӵе ик дӥсьтонлыксы мед луоз шуыса, солы синмаськыса, солэсь луонлыксэ адӟыса, асьсэлы мед пыӵатозы, медаз луэ соос возьдаськисесь, асьсэлэсь кылзэс мед вераны быгатозы, соингес Кузебай Гердлэсь нимзэ сётэм потӥз гимназилы», — тодаз ваиз Ольга Шилова.

Кузебай Гердлэн вордскем палъёсаз — Вавож ёросысь Гурезь-Пудга гуртын 1998-тӥ арын солэн музей-юртэз ужаны кутскиз.

«Фондмы узырме арысь аре, но милям Гердэн герӟаськем экспонатъёсмы ӧвӧл, туспуктэмъёс гинэ вань. Гердлэн вынызлэн, Андрейлэн, пиез милемлы кузьмаз картинаоссэ, туспуктэмъёс со милемлы сётӥз. Но милям исторической, уникальной юртмы ук — та юртын улӥз но ужаз, дышетскиз но Кузебай Герд, соиз дуно», — вераз ивортодэтъя «Удмуртия» агентстволы музей-юртлэн кивалтӥсез Лариса Зайцева.

2014-тӥ арын коньывуонэ Вавожысь ёрос лыдӟетъюрт азьын Кузебай Гердлы бюст усьтӥзы.

14-тӥ толшоре черкогуртын дано гожъясьлэн юбилеезлы сӥзем флешоб ортчытӥзы. 400 пала адями «улэп» букваосын «Кузебай Герды 120» гожтӥзы.

Вавожын Кузебай Гердлэн юбилеезлы сӥзем флешмоб


Удмурт калыклэн дано пиезлэн юбилеезлы сӥзем ужрадъёс азьланьтӥськозы на. 



Наверх
Вниз