Ижкар+11 °C
18 -тӥ коньывуон 2021 Вордӥськон
18+

Эрик Батуев нимо йӧскалык премиез сётӥзы Ижкарын

  • 752
  • 0
Ижкар / Удмуртия
Эрик Батуев нимо йӧскалык премиез сётӥзы Ижкарын
Туспуктэм: УДМУРТИЫСЬ ПЕЧАТЬЯ НО КАЛЫКЕ ИВОРТОДЭТ ВӦЛМЫТОНЪЯ АГЕНТСТВО

Кӧснуналэ, 27-тӥ толшоре, Россиысь печатьлэсь нуналзэ но «Удмуртская правда» газетлы 100 ар тырмонэз пусъён улсын радъям котырес ӝӧк сьӧрын кенешонын Эрик Батуев нимо йӧскалык премиез сётӥзы.

2017-тӥ ар понна премиез басьтӥзы «Удмуртия» кун телерадиокмпаниысь журналист Владимир Михайлов, «Мынам Удмуртие» телерадиокомпаниысь журналист Александр Бикузин но «Удмурт дунне» газетысь журналист, «Дарт» ватсэтэзлэн редакторез Мария Векшина.

«Удмурт Кенеш» огазеяськонлэн тӧрез Татьяна Ишматова верамъя, премиез нырысь ик нимаз ӧръёсъя сётъяны кутскизы вал: телевидение, радио, печатласа потӥсь изданиос. Но берло огазеяны малпазы, угось одӥг удысъя одӥг гинэ уж вуыны быгатэ вал, нош мукетаз трос. Озьы вожвылъяськонэ вуэм вань ужъёсты огазе дунъяны кутскизы, премиез одӥг яке кӧня ке адями басьтыны быгатэ. Ужъёсты эскеро журналистъёс, Удмурт кун университетысь дышетӥсьёс, удысэз тодӥсь-валась ӧнерчиос. 

Вераны кулэ, премия понна вожвылъяськонэ удмурт но, ӟуч но кылын гожъяськись журналистъёс пыриськыны быгато.

Удмурт кылын гожъяськись журналистъёслы куронъёс бадӟымгес, отын удмуртлыкъя аналитической материалъёс мед луозы, огшоры ивор гинэ медаз луы. Нош ӟуч кылын ке гожъясько, кыӵе амалэн со пусъе удмурт калыкен герӟаськем ужпумъёсты
Татьяна Ишматова

«Удмурт Кенеш» огазеяськонлэн тӧроез озьы ик со пусйиз, йӧскалык премиен пусъён понна кандидатъёсты бырйыку ӧри уг чакла журналистлэсь вань ужамзэ, дунъя вожвылъяськонэ сётэм ужъёсты гинэ.

«Жаляса верано, асьмелэн котькуд ар палэнэгес кылё ёрос газетъёсын ужасьёс, хотя соос сёто, туэ но трос ужъёс лыктэмын вал ёросъёсысь, но уггес тырмы аналитической пуштросэз. Валаны кулэ, комиссия уг эскерыны журналистлэсь вань ужамзэ, учкиськом со ужъёсты, кудъёсыз сётэмын конкурсэ — 3–5 уж лыктэмын, кылсярысь, вот соосъя дунъет сётӥське», — пусйиз Татьяна Ишматова.

Тодады вайытом, «Удмурт Кенеш» огазеяськонлэн кичӧлтэмезъя, Эрик Батуев нимо йӧскалык премия удмурт лулчеберет, история, удмуртъёслэн ужрадъёссы сярысь ивортӥсь журналистъёслы 2011-тӥ арысен сётӥське.

«Эрик Батуевез кызьы ке но кулэ вал тодамы вайытыны. Соин валче сыӵе мылкыд лыктӥз: журналистика удысын со адямиосты, кин удмуртлыкъя материалъёс гожъя яке удмурт калык сярысь гожъя, соосты кызьы ке но пусъёно шуыса. Татын туж умой тупаз Эрик Батуевлэн нимыз та премилы», — вераз Татьяна Ишматова.

Нялтас вераса, Эрик Батуев нимо йӧскалык премия понна вожвылъяськонэз туэ паськытгес карыны малпанъёс вань. «Удмурт Кенешлэн» тӧроез верамъя, возьмалозы Башкортостанысь но Татарстанысь удмурт газетъёсын ужасьёслэсь но ужъёссэс.

ВАТСАН

Батуев Валерий (Эрик) Николаевич — удмурт но ӟуч кылбурчи, журналист. Вордскиз 23-тӥ куарусёнэ 1969-тӥ арын Дэри ёросысь Симанки гуртын. Дышетскиз Москваысь кун университетын журналистикая факультетын, собере аспирантураын. Москваысь газетъёсын корреспондент луыса ужаз. Дуннеысь «пӧсь интыосысь» — Палестинаысь, Израильысь, Афганистанысь, Курдистанысь, Турциысь, Таджикистанысь, Косовоысь, Иранысь репортажъёс лэсьтылӥз. Ожгар корреспондент луыса быдэс Чечняез но Уйпал Кавказэз ортчиз. 2002-тӥ арын Палестина сярысь «Война обетованная» ужез «Устоез статья» номинациын пусъемын вал.
Улэп дыръяз ай удмурт но ӟуч кылын кылбуръёсынызы 4 бичетэз потӥз: «Гольык», «Тень моей жизни», «Пӧртмаськись ошмес», «По венам из сердца уходит любовь». 2002-тӥ арын 31-тӥ южтолэзе потон уе Эрик Батуевез аслаз патераз виизы. Со вакытэ «Московские новости» газетлэн нимысьтыз корреспондентэз вал.


Наверх
Вниз