Ижкар+1 °C
13 -тӥ оштолэзь 2021 Пуксён
18+

Владимир Байметов Удмуртиысь калыкъёслэн ассамблеязылэн выль тӧроез луиз

  • 367
  • 0
Ижкар / Удмуртия
Владимир Байметов Удмуртиысь калыкъёслэн ассамблеязылэн выль тӧроез луиз
Туспуктэм: Григорий Фомин

«Удмуртиысь калыкъёслэн ассамблеязы» мер огазеяськонлэн йылпумъян-быръён конференцияз солы выль тӧроен огкылысь бырйизы Дышетонэз азинтонъя институтлэсь кивалтӥсьсэ, Вань удмуртъёслэн «Удмурт Кенеш» ассоциацизылэсь вице-президентсэ Владимир Байметовез. Со сярысь ивортэ элькунысь йӧскалык политикая министерстволэн пресс-службаез.

Байметовез ӵектӥз Ассамблеялэн азьвыл тӧроез, Кун Думаын Удмуртилэсь депутат Алексей Загребин. Со аслаз кивалтэмезлы йылпумъянъёс лэсьтӥз но лулчеберетъя йӧскалык огазеяськонъёслэн кивалтӥсьёссылы ужамзы понна тау кариз.

Со пусйиз, Ассамблеялы луыса берло куинь аръёс ӵоже элькунын туж пусйымон ужрадъёс быдэстэмын, соос пӧлын «Бадӟым этнографи диктант» ужрад, «Пельняньлэн дунневыл нуналэз» фестиваль, озьы ик «Герои народа — герои страны» книга поттэмын
Удмуртиысь йӧскалык политикая министерстволэн пресс-службаез

Кенешонын йӧскалык огазеяськонъёслэн кивалтӥсьёссы Ассамблеяез азинтон луонлыкъёсты эскеризы, кылсярысь, Удмуртиысь калыкъёслэсь конгрессэс ортчытыны ӵектӥзы.

ВАТСАН

Байметов Владимир Александрович. Вордӥськиз 1965-т арын 25-тӥ оштолэзе Яр каргуртын. Йылпумъяз Москваысь М. В. Ломоносов нимо кун университетысь психологияя факультетлэсь аспирантуразэ. 
Ужаз Удмуртиысь Дышетӥсьёслэсь быгатонлыкъёссэс будэтонъя институтысь ӧнер дышетонъя кафедраын дышетӥсь луыса; Удмурт кун университетысь психологияя кафедраын дышетӥсь, кивалтӥсь; тодос ужъя проректор; журналистикая факультетлэн деканэз луыса.  
Та дыре — Дышетонэз азинтонъя институтлэн кивалтӥсез.


Наверх
Вниз