100 лет государственности Удмуртии
Ижкар+21 °C
7 -тӥ инвожо 2020 Воскресенье
16+

Быдэс Удмуртиысь 350 пала удмурт азьветлӥсьёс люкаськизы «Герд лыдӟонъёсы» Вавоже

  • 598
  • 0
Вавож / Удмуртия
Быдэс Удмуртиысь 350 пала удмурт азьветлӥсьёс люкаськизы «Герд лыдӟонъёсы» Вавоже
Туспуктэм: Наталья Еркешева

Кузебай Герд вордскем дырысен 120 ар тырмонлы сӥзем элькун конференцие Вавоже быдэс Удмуртиысь 350 пала удмурт азьветлӥсьёс люкаськизы. «Герд лыдӟонъёслы» дасям валтӥсь ивортонъёсты кылзыны кутскемлэсь азьвыл лыктэм калыклы ёросысь но элькунысь кивалтӥсьёс вазиськизы.

Ас вакытаз Кузебай Герд туж тыршиз, вордскем музъемез мед сяськаялоз шуыса, солэн малпанъёсыз быдэсмизы, пусйиз Вавож ёрослэн тӧроез Николай Чайников. Туннэ ёрос одӥгез тужгес азинлыкоез ёрос луэ — гурт возёсъя но, мер удысъя но. Бусыосын вань туала куронъёслы тупась техника ужа, пуктӥсько выль гидъёс, школаос, спорт объектъёс. Озьы ик кивалтӥсь пусйиз, ар ӵоже ёросын Гердлэн юбилеезлы сӥзем трос ужрадъёс ортчозы на шуыса.

Йӧскалык азьветлӥсьлэн вордскем музъем вылаз куноосты кырӟанъёсын пумитазы. Соосты кылзыса, сюлэмам небыт но шуныт луиз, вераз Удмуртиысь йӧскалык политикая министр Лариса Буранова.

Сыӵе адямиос сярысь, Кузебай Герд кадь, туж секыт вераны. Ваньзэ вераны ке, мае пусъем потэ, быдэс нунал быгатӥсько, дыр, та сцена вылын сылыны, нош ӧжыт вераны сюлмы уг чида. Котькуд калыклэн вань аслаз батыръёсыз. Котькуд даур вае котькуд калыклы батырез. Нош таӵе адямиос, Кузебай Герд кадь, сю аръёс но, сюрс аръёс но ортчыса, соос калыклэн историяз одно ик кылё.
Лариса Буранова, Удмуртиысь йӧскалык политикая министр

Министр тодаз ваиз Гердлэн 100 аръем юбилеезлы дасяськон улсын кылдэм мылкыдъёссэ. Пайми, вакчи улонэз ӵоже но кӧня быгатӥз адями лэсьтыны удмурт калык понна, шуиз Лариса Буранова.

«Котькуд удысын учкыны ке, со нырысь вал: музейын нырысь вал, школаын, удмурт кылын со нырысь вал, этнографиез учкыны ке, наука, со нырысь вал. Кӧня кужым кулэ, кӧня яратон кулэ! Соку монэ паймытӥз эшшо одӥг фраза Гердлэн, удмурт калык сярысь со вераз (ӟуч кылын нырысь адӟи): «я порой до ненависти люблю свой народ». Соку мон туж кема малпай, кызьы озьы луэ яратыны? Кӧня ке но ар ортчыса, мон сое валай: со сыӵе зол яратэ вал ас калыкез, ас кылэз, анай кылэз, адӟыса ваньзэ, кызьы удмурт калык улэ та дунне вылын, кыӵе секыт со улэ, пеймыт со улэ. Учкиськод ке, туж трос кылбуръёс Гердлэн сӥземын со улонлы, тӥ ваньзэ сое тодӥськоды. Со котьку но турттӥз асьме удмурт калыкез нуыны азьлань. Возьматыны, кыӵе чебер сюрес возьма удмурт калыкез», — вераз Лариса Буранова.

Герд лыдӟонъёсын
Элькун конференцие лыктэмъёслы мылкыд сётӥзы нылпиос Фото: Наталья Еркешева © udmurt.media

Солэн кылъёсызъя, туннэ котькуд удмуртлы малпаськыны кулэ, дыр: нош тон туннэ дась-а удмурт калык понна батыр луыны, мар тон лэсьтӥськод удмурт калык понна котькуд нунал?

«Та залэ туннэ люкаськизы адямиос, мон понна котькуд адями та залын — удмурт калыклэн туала батырез. Соин ик тау тӥледлы бадӟым, тӥтэк удмурт кылмы, удмурт калыкмы, ӧй луысал верам уг поты, но сыӵе вормонъёс, кыӵе туннэ нуналлы вань, ӧй луысалзы», — пусйиз Удмуртиысь йӧскалык политикая министр.

Улосвыл парламентысь тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез, «Удмурт Кенеш» огазеяськонлэн тӧроез Татьяна Ишматова Вавож ёрослэн тӧрлыкезлы, отын улӥсьёслы та бадӟым ужрадэз вылӥ ӟечлыкен радъямзы понна тау кариз но конференцие люкаськемъёслы пайдалыко ужаны сӥзиз.

«Мылкыдмы умой, ужаны тыршиськом, огазеяськыны тыршиськом. Но, жаляса верано, дыр но аслэсьтыз кыӵе ке но тупатонъёссэ пыртэ улонамы. Туннэ вератэк кельтыны уг луы, удмурт кылэз дышетонэн но кыӵе шуг-секытъёс кылдо. Но соин ик тазьы люкаськиськом, валаськом: та адямиос, кудъёсыз «Удмурт Кенеш» огазеяськон пӧлын уло, «пӧзё», улонэз азинто — со тодосчиосмы, кудъёсыз котырамы, дышетӥсьёсмы — соос вылын туж тросэз возиське», — пусйиз со.

Асьмеос, номыр шоры учкытэк, кулэ дышетыны удмурт кылэз, кулэ азинтыны удмурт лулчеберетэз. Со понна ик та конференция но асьмелы кыӵе ке но анализ но мед сётоз, но со дыре ик мылкыд котькудмылы мед сётоз азьланяз но ужмес быдэсъяны. <…> Асьмеос ӵош кариськыса ваньзэ вормом.
Татьяна Ишматова, Кун Кенешысь депутат, «Удмурт Кенеш» огазеяськонлэн тӧроез

Удмуртиысь лулчеберетъя но туризмъя министр Владимир Соловьёв озьы ик Кузебай Гердлэсь пӧртэм удысъёсын азинлыко тыршемзэ пусйиз. Солэсь лэсьтэм ужзэ асьмеос улон мынытозь эскерыны, бугыръяны турттом, шуиз со.

«Мон туж шумпотӥсько, та залын егитъёсмы вань шуыса, вань ветеранъёс, вань шоро-куспо арлыдъемъёс, кин тодэ, кин дышетске ай, кин эшшо тросгес тодыны мылкыдын улэ туннэ нуналлы Кузебай Гердлэсь, Трофим Борисовлэсь (эшшо вераны луэ мукет фамилиосты) историзэс, биографизэс, лэсьтэм ужъёссэс вуоно поколениос доры выжытыны, кузьманы мед быгатомы шуыса», — вераз лулчеберетъя но туризмъя министр.

Мон тодӥсько, Кузебай Гердлэн ужез азьланьтӥське но азьланьтӥськоз. Та выллем ужрадъёс <…> асьмелэсь удмурт луэммес, шӧдэммес юнматэ-а, мар-а котькудмылэсь
Владимир Соловьёв, Удмуртиысь лулчеберетъя но туризмъя министр

Та дыре конференцилэн пленарной кенешонэз мынэ. Элькунысь тодосчиос, озьы ик пиналъёс, «Герд лыдӟонъёсы» люкаськемъёсты асьсэ докладъёсынызы тодмато. Со сяна, ужрадын Кузебай Герд нимо йӧскалык премилэсь 2017-тӥ ар понна лауреатъёссэ данъялозы. 

«Кузебай Гердлы – 120» темая мукет иворъёс


Наверх
Вниз