100 лет государственности Удмуртии
Ижкар+21 °C
7 -тӥ инвожо 2020 Воскресенье
16+

Элькун «Герд лыдӟонъёсын» пӧртэм ӧръёсъя 11 ивортонъёс чузъяськизы

  • 565
  • 0
Вавож / Удмуртия
Элькун «Герд лыдӟонъёсын» пӧртэм ӧръёсъя 11 ивортонъёс чузъяськизы
Туспуктэм: Наталья Еркешева

XXI элькун «Герд лыдӟонъёсын» Удмуртиысь тодмо но егит тодосчиос, дышетӥсьёс но пиналъёс пӧртэм ӧръёсъя 11 ивортонъёсын тодматӥзы. Конференци 15-тӥ тулыспалэ Вавожысь лулчеберетъя юртын ортчиз. Туэ со Кузебай Гердлэн 120 ар тырмонэзлы сӥземын вал но «Кузебай Герд улэ асьмемын ӵош» нимаськиз. 

Удмурт кун университетысь доцент, кылосбур тодосъя кандидат,  Галина Шушакова аслаз докладаз «Зэм ик-а Кузебай Герд улэ асьмемын ӵош?» юан пуктӥз. Солы валэктон тодосчи кык палысен сётыны тыршиз. Нырысетӥез — кызьы Гердлэн нимыз но ужъёсыз туннэ асьме пӧлын уло.

«Татын вераны луэ «Герд» газетэз но, «Удмурт дуннелэн» ватсэтэз луыса нимаз поттэмын со. Синпелет доры сяська понон, кылбуръёс лыдӟон — со сямлы пӧрмем акция луиз «Удмурт Кенешлэн» кивалтэм улсаз. <…> Красильниковлэн музеяз сыӵе диспут-кенешон ортчиз тодосчиосын Гердлэн творчествоез сярысь, улонэз сярысь», — вераз Галина Шушакова.

Солэн ивортонэзлэн кыкетӥ люкетэз Кузебай Гердлэн малпанъёсызлэн улонэ асьме вакытэ пыӵамзылы сӥземын вал.

Туала егитъёсмы кызьы чырмыт ужало, <…> со но Кузебай Гердлэн малпанъёсызлэн улонэ пыӵамез. Учке ай, кыл сярысь сюлмаськиськомы, дышетон сярысь. «Удмурт Кенеш» кичӧлтэмъя трос ужъёс мыно, трос лэсьтэ «Шунды» огазеяськон, егитъёс, соослэн лагерьёссы, «Вамыш» лагерь но «Удмурт-а мон?» форумъёссы
Галина Шушакова, Удмурт кун университетысь доцент

Дышетон удысысь йӧскалык ужпумъёсты эскеронъя институтысь валтӥсь тодослыко ужась, кылосбур тодосъя кандидат Людмила Бусыгина Кузебай Герд сярысь вотэсысь ивортодэтъёслы сӥзем доклад дасяз. Интернетысь удмурт материалъёслэн узырлыксы но ӟечлыксы милемыз туж сюлэмшугъяськытэ, шуиз со.

«Кузебай Гердлы сӥзем материалъёс интернетын ӧжыт ӧвӧл. Озьы ке но, соос уже кутымон, тодмо но тунсыко мед луозы шуыса, вотэсбамъёсысь материалъёсты весь выльдоно, ватсанъёс пыртылоно. Рос-прос лэсьтэм сайтъёсысь ӟеч материалъёсты гинэ дышетон удысын кутыса, нылпиослэсь тодон-валанзэс будэтыны, творчествоя быгатонлыксэс азинтыны луэ», — пусйиз Людмила Бусыгина.

Вавожын ортчем «Герд лыдӟонъёс»

8 фото

Вавоже «Герд лыдӟонъёсы» Санкт-Петербургысь архивысь куара гожтэмъёсты эскерись, кылосбур тодосъя кандидат Виктор Денисов но лыктӥз. Со кылзӥсьёсты Кузебай Гердлэн фонографе гожтэмъёсыныз тодматӥз. Виктор Денисовлэн кылъёсызъя, та дыре 300 пӧлысь 37-ез гинэ гожтэмъёс кылизы, мукетъёсыз ыштэмын.

Мыным потэ, «Удмурт Кенешлы» но мукет огазеяськонъёслы малпаськоно удмурт музъемлэн дано адямиосыныз «Куара портретъёсын галерея» кылдытон сярысь
Виктор Денисов, кылосбур тодосъя кандидат

Тодосчиос сяна, лыдӟонъёсы пиналъёс но пыриськизы. Одӥгез соос пӧлысь Вавож ёросысь Гурезь-Пудга школаын 10-тӥ классын дышетскись Анна Зайцева «Мадиськон ӝытъёс» ивортон дасяз. Анналэн кылъёсызъя, та тема солы пичи дырысен сюлмаз пыриз.

«Пичи дыръямы милям вал со ӝытъёсмы. Али но соос вань, но ӵапак пичи дыръямы мыным со пыриськиз. Со сыӵе шулдыр. Удмуртъёслэн со ӝытъёс капчи мылкыдын ортчо. Дорын кадь мылкыдын. <…> Кин ке но керттӥське, кин ке но мадиськон вера, пиналъёс туж тыршо тодыны соосты», — тодаз ваиз нылаш.

«Удмурт Кенешлэн» тӧроез Татьяна Ишматова пусйиз, радъясьёс тыршо «Герд лыдӟонъёсын» дано тодосчиос вӧзын егитъёс но пиналъёс мед вераськозы шуыса.

Мон эшшо шумпотӥсько, школьникъёс туж чырмыт басьтӥськемын ни та уж борды шуыса. Оскон кылдэ, со азьланьскоз шуыса
Татьяна Ишматова, «Удмурт Кенеш» огазеяськонлэн тӧроез

Озьы ик «Удмурт Кенешлэн» тӧроез шумпотэ, ужрад ёросъёсын ортчемен валче, отчы тросгес калык пыриськыны быгатэ шуыса.

«Кылем арын Пургалан ортчытӥм, туэ Вавожын. Зэм но, калык шумпотыса кылзӥське, реагирует, шуом, ваньмызлы, мар чузъяське. Соин ик вуоно аре озьы ик малпаськом, кыӵе ке но ёросэз бырйыса, ёросын ик ортчытыны. Асьмеос но, лыктэмъёс, тодматскиськом ёросэн, адӟиськом, маин соос данъясько. Со но, мон малпасько, туж умой», — йылпумъяз Татьяна Ишматова.

Тодэ вайытом, «Герд лыдӟонъёс» «Удмурт Кенеш» кичӧлтэмен 21 ар радъясько ни. Туэ куноосты Вавож ёрос пумитаз. Ужрадлэн кутсконаз люкаськемъёсты элькунысь кивалтӥсьёс ӟечкылазы. Ивортонъёс сяна, лыдӟонъёсын Кузебай Герд нимо йӧскалык премилэсь лауреатъёссэ данъяло. Туэ кылбурчиез Вениамин Ившинэз но Кияса ёросысь «Инвожо» ансамбльлэсь кивалтӥсьсэ Надежда Пахомоваез пусйизы.

«Кузебай Гердлы – 120» темая мукет иворъёс



Наверх
Вниз