100 лет государственности Удмуртии
Ижкар+22 °C
6 -тӥ инвожо 2020 Кӧснунал
16+

Кузебай Герд нимо премилэн лауреатъёсыз: ужаськомы удмуртлыкез пиналъёслы кельтон понна

  • 533
  • 0
Вавож / Удмуртия
Кузебай Герд нимо премилэн лауреатъёсыз: ужаськомы удмуртлыкез пиналъёслы кельтон понна
Туспуктэм: Наталья Еркешева

15-тӥ тулыспалэ Вавожын XXI элькун «Герд лыдӟонъёсын» Кузебай Герд нимо йӧскалык премилэсь 2017-тӥ ар понна лауреатъёссэ данъязы. Таяз радэ премиен пусъемын нылпи кылбурчи, Удмуртиысь но Россиысь Гожъясьёслэн огазеяськонъёссылэн ёзчиез, «Удмуртия» издательстволэн азьвыл валтӥсь редакторез Вениамин Ившин но Кияса ёросысь Уддяди гуртысь Росси Федерациысь калык творчествоя дано «Инвожо» коллективлэн кивалтӥсез Надежда Пахомова.

Кызьы вераз журналистъёслы Надежда Пахомова, 20 ар ужатозяз котьма вал. Банкын ужакуз со лулчеберетъя ужрадъёс ортчытыны спонсоръёс капчиенгес шедьтэ вылэм. Нош ӟучъёс сое мукет сямен валазы.

«Вал сыӵе вераськонъёс, националист но шуылӥзы. <…> Сое ӟуч калык валаз озьы, удмуртъёслы сиыны-юыны коньдон сёто шуыса. Сыӵе статья потӥз газете. Мон шуак луи, пайми мон», — тодаз вае «Инвожолэн» кивалтӥсез.

Валантэмъёсты палэнтыны шуыса, Надежда Пахомова котырес ӝок люказ. Валэктӥз, спонсор шедьтыса, со ужрадъёс ортчытъя шуыса. Со дырысен Кияса ёросын улӥсь ӟуч калыкен кусыпъёссы тупазы. Табере соос «Инвожо» коллективез куное ӧтьыло.

Туннэ нуналэ табере ӟуч гуртъёс милемыз, «Инвожо» коллективез, ӧтчало куное. <…> Валэктӥськом ке ӟуч калыклы аслад дӥськутэд сярысь, аслад кырӟан-веранэд сярысь, мае тон возьматӥськод, соку соос тонэ туж умой валало. Коллективе мынам быдэс Россилы тодмо ни
Надежда Пахомова, Кузебай Герд нимо йӧскалык премилэн лауреатэз

Кышномуртлэн кылъёсызъя, со ноку но ӧз малпа, ужез понна солы кыӵе ке данъет сётыны кулэ шуыса. 20 ар ужатозям весь лэсьтоно,лэсьтоно малпай мон, ноку но ӧй малпа, куке но мыным премия сётозы шуыса, вера Надежда Пахомова.

«Инвожо» ансамбльлэн кивалтӥсезлэн азьланяз но ужаны мылкыдыз вань. Табере вань тодон-валанъёссэ егитъёслы сётоно, лыдъя Надежда Пахомова.

Со мед кылёз калыклы. Мон кинлэсь ке но басьтыса, кельтӥ ук сое. Тарезэ пинал калыклы кельтыны кулэ. Али тани нылпиосын ужаськом, соослы кельтэм потэ. Соос но мед яратозы фольклорез
Надежда Пахомова, Кузебай Герд нимо йӧскалык премилэн лауреатэз

Пиналъёсты визьноданлы саклык висъя Кузебай Герд нимо премилэн эшшо одӥгез лауреатэз —  Вениамин Ившин. Выль технологиос улонэ пыӵамен туала нылпиос ваньзы сямен ик экран азьын пуко, нош мар котыразы лэсьтӥське, уг адӟо, ӝожтӥське кылбурчи.

«Нош нылашлы яке пияшлы будыны кулэ ук, адями луыны кулэ, улонэз тодыны кулэ. Соин валче ми нош ик ӟеч-ӟеч учкыны кутским Гердлэсь творчествозэ. Солэн пичиослы, школае ветлӥсьтэм пиналъёслы сӥзем ужъёсыз, тужгес кылбуръёсыз, туж сыӵе тодон-валан сётӥсесь. <…> Сыӵе кылдытӥм ӵектос — школае ветлӥсьтэм нылпиослы сӥзем кылбуръёсын книгаоссэ пичиесь гинэ поттыны», — ивортӥз Вениамин Ившин.

Кузебай Герд нимо премилэсь лауреатъёссэ данъян

4 фото

Солэн эшшо одӥгез данъяськымон ужез — со Фома Ермаковлы Гердлэсь люкам сочинениоссэ поттыны юрттон. Соку Вениамин Ившин «Удмуртия» книгапоттонниын редактор луыса ужа вал.

«Со туж секыт вал — коньдон ӧвӧл, бызьылоно котькуд томъя. Соосты чакламын вал 2–3 ар куспын поттыны, милям со ог вить ар куспын потӥз. <…> ӝоггес малпаськом вал, но ӧз пӧрмы малпамъя. Шумпотӥсько соизлы но, Фома Кузьмичлы юрттыны тыршим коньдонэн но, тупатъянэн но», — шуиз Вениамин Ившин.

Кылбурчи малпамъя, Кузебай Гердлэсь гожъям ужъёссэ туала лыдӟись доры валэктонъёсын но ватсэтъёсын шонер вуттон — со удмуртлыклэн одӥг валтӥсь ёзэз.

Шуиськом бере Кузебай Герд нимо премия, нырысь ик татын солэн нимыныз герӟаськем ужъёс луыны кулэ, мон озьы малпасько
Вениамин Ившин, Кузебай Герд нимо йӧскалык премилэн лауреатэз

Тодэ вайытом, Кузебай Гердлэн 120 ар тырмонэзлы сӥзем XXI элькун «Герд лыдӟонъёсын» Вавожын пӧртэм ӧръёсъя 11 ивортонъёс чузъяськизы.

«Кузебай Гердлы – 120» темая мукет иворъёс


Наверх
Вниз