Ижкар-24 °C
6 -тӥ толсур 2021 Вордӥськон
18+

Удмурт лулчеберетэз тодэмзэс возьматӥзы Можга ёросысь пиналъёс «Визьпогъёс» шудонын

  • 645
  • 0
Можга / Удмуртия
Удмурт лулчеберетэз тодэмзэс возьматӥзы Можга ёросысь пиналъёс «Визьпогъёс» шудонын
Туспуктэм: Можга ёросысь лулчеберетъя «Дубитель» юрт

Можга карысь лулчеберетъя «Дубитель» юртын ортчем «Визьпогъёс» шудонын Можга ёросысь пиналъёс удмурт лулчеберетъя тодон-валанзэс возьматӥзы. Анай кыллэн калыккуспо нуналэзлы сӥзем ужрадын 26-тӥ тулыспалэ Можгаысь 9 номеро школаысь но Кватчиысь шоръёзо школаысь 5-6-тӥ классын дышетскисьёс вожвылъяськизы. Шудонэ ог 50 пыриськисьёс но учкисьёс люкаськизы. Со сярысь ивортодэтъя «Удмуртия» агентстволы ужъюртысь калык творчествоя ёзэтлэн кивалтӥсез Вера Васильева вераз.

Со ивортэмъя, Анай кыллэсь нуналзэ таӵе амалэн соос кылем арысен пусъё. Соку ужрадэ Можга карысь школаосын бадӟым классъёсын дышетскисьёс пыриськизы. Туэ шудонэ гуртъёсысь но пиналъёсты ӧтизы.

Пиналъёс туж устоесь, кырӟаны-вераны быгато. Тодон-валанъёссы туж уно, малы ке шуоно куд-ог удмуртоведъёс школаосын туж бадӟым уж нуо. Со ужзы соослэн кытчы ке но ыше — яке со куспазы луэ, яке дышетонын гинэ. Нош милям, лулчеберетъя юртын ужасьёслэн, соосты поттэм потэ кадь тунсыко амалэн
Вера Васильева, лулчеберетъя «Дубитель» юртысь калык творчествоя ёзэтлэн кивалтӥсез

Шудонлэн одӥгез куронэз — командаос удмурт шӧмын мед пӧрмозы шуыса, соин ик вань пиналъёс удмурт йӧскалык дӥсен лыктӥзы. Нош ужрад быдэсак удмурт кылын ортчиз, шуиз Вера Васильева.

Ми трос удысэз басьтӥм, со ваньмыз удмурт кылэн но литературен герӟаськемын вал. Вал отын удмурт кыл сярысь но, литература сярысь но юанъёс, собере вашкалазэ но басьтӥм, вашкала сям-йылолъёсты
Вера Васильева, лулчеберетъя «Дубитель» юртысь калык творчествоя ёзэтлэн кивалтӥсез

Ӧнерчи верамъя, пиналъёс шудонэ туж мыло-кыдо пыриськизы, нош дышетӥсьёс ужрадэз вылӥ дунъязы. Соин ик азьланяз радъясьёс, «Визьпогъёс» шудонэ тросгес команда ӧтьыса, сое паськытатыны малпало.

Анай кыллэн нуналэзлы сӥзем ужрадэз лулчеберетъя «Дубитель» юрт Можга ёросысь «Удмурт Кенеш» огазеяськонлэн ёзэтэз юрттэмен радъяз.

Ватсалом, 28-тӥ тулыспалэ «Дубитель» юртысь ӧнерчиос Можгаысь педагогикая колледжын дышетскисьёс понна но та выллем ик шудон ортчытозы.

Тодэ вайытом, Анайлэн калыккуспо нуналэз быдэс дуннеын 21-тӥ тулыспалэ пусйиське. Кузебай Герд нимо гимназиысь пиналъёс туэ та праздникен Удмуртиысь тӧрлык ёзэсъёсын ужасьёсты ӟечкылазы. Нош Йӧскалык лыдӟетъюртлэн Йӧскалык но шаертодон литературая центраз тодосчилэн Риф Насибуллинлэн удмурт кыллэн азинскон сюресэз сярысь лекциез ортчиз.



Наверх
Вниз