Ижкар+3 °C
25 -тӥ коньывуон 2020 Воскресенье
18+

Александр Шкляев: удмуртъёслэн 100 ар талэсь азьло ортчем нырысетӥ ӧтчамзы калыклы лобӟон сюрес сётӥз

  • 1833
  • 0
Ижкар / Удмуртия
Александр Шкляев: удмуртъёслэн 100 ар талэсь азьло ортчем нырысетӥ ӧтчамзы калыклы лобӟон сюрес сётӥз
Туспуктэм: Майя Бывальцева

Удмуртъёс нырысетӥ йӧслыко ӧтчамлы 100 ар тырмонэз пусйыны дасясько. 2018-тӥ арын 18-тӥ куартолэзе Алабгоын (Елабугаын) солы сӥзем научно-практической конференци ортчоз. «Удмурт Кенешлэн» Пичи кенешезлэн 20-тӥ южтолэзе пумиськоназ ӧтчамлэн удмуртъёслэн улоназы интыез сярысь ивортон лэсьтӥз кылосбур тодосъя кандидат Александр Шкляев.

Мон малпасько, куке асьмеос туннэ пусйиськом нырысетӥ съездэз, со но бадӟым уж, малы ке шуоно со асьмелы сётӥз инъет, лобӟон сюрес
Александр Шкляев, кылосбур тодосъя кандидат

Нырысетӥ ӧтчам дорозь удмуртъёс вӧсяськонъёсы гинэ ӵош люкаськылӥзы, нош татын соос асваланзы сярысь малпаськыны кутскизы, пусйиз тодосчи ивортодэтъя «Удмуртия» агентстволэн корреспондентэныз вераськонын.

Со кутскон сётӥз удмурт государственностьлы. Соин ик солэн туж бадӟым значениез. <…> Соос отын люкаськизы, собере соос автономия кылдытӥзы, кытчы люказы самой основной массивъёссэ удмуртъёслэсь, кылдӥз собере автономной область, собере кылдӥз республика — соин ик асьмелэн вань туннэ шаермы, флагмы, гербы. Асьмелы право сётэмын асьме кылынымы ужаны, дышетскыны но асьме культурамес узырмытыны, лэсьтыны. Мукет ужпум, кызьы асьмеос со правоез кутӥськомы уже
Александр Шкляев, кылосбур тодосъя кандидат

Удмуртъёслэн нырысетӥ ӧтчамзылэн кичӧлтӥсез луиз революционер, большевик, кылбурчи но югдытӥсь Максим Прокопьев. Со борды итӥськиз Трокай Борисов. Кыкетӥез сярысь туннэ трос тодӥськомы ке, Прокопьевлэн нимыз вунэмын шуыны луэ. Нош со туж батырлыко адями вал, со сюлмаськиз удмуртъёс понна зэм ик но кыӵе ке огазеяськон кылдытыны, шуэ тодосчи.

«Со граждан ожлэн героез, со туж батырлыко адями, со кылбурчи но, со государственной деятель. Нырысез со вал удмурт, кудӥз ыстэмын вал Москвае Наркомнацлэн удмурт ёзэтэныз кивалтыны — сыӵе со бадӟым адями, нош со вунэмын. Вунэмын, малы ке шуоно со вазь бырыны шедиз, 19-тӥ арын со быриз Пермь шаерысь Кунгур город дорын разведкаын дыръяз», — валэктӥз Шкляев.

Пичи кенешлэн пумиськоназ со удмурт геройёслы синпелетъёс пуктыны ӵектӥз — Владимир Короленколы, «со асьмелэн йӧскалык героймы», Максим Прокопьевлы, Ашальчи Окилы, Филипп Кедровлы. Отӥяз нош Михаил Петровлы, Флор Васильевлы, Геннадий Красильниковлы.

Валамон, туж бадӟым асьмелы уж лэсьтӥзы Буран песянайёс, озьы ик туж бадӟым вал Библиез берыктон, малы ке шуоно со ваньмыз ӝутэ асьмелэсь самосознанимес. Асьмеос умой тодыны кулэ историмес, кулэ гожтыны удмурт йӧскалык движенилэсь историзэ. Валаны кулэ, малы удмурт самосознание туж улын шуыса, малы анай-атайёслэн пиналъёссэс удмурт классэ сётэмзы уг поты
Александр Шкляев, кылосбур тодосъя кандидат

Солэн верамезъя, удмурт движениелэн пӧртэм вакытъёсыз вал ке но, со пӧлын «чигнанъёсыз, вормымтэ ужъёсыз», азьланьын солэн бадӟым луонлыкъёсыз.

Ватсалом, удмуртлыкез утён но азинтон ужзы, амалъёссы сярысь Пичи кенешын вераськизы Башкортостанысь но Пермь шаерысь удмуртъёслэн огазеяськонъёссылэн азьветлӥсьёссы. Со сяна, отын ик этнографез, истори тодосъя докторез Владимир Владыкинэз 75 арес тырмонэныз ӟечкылазы



Наверх
Вниз