Кузебай Гердлэсь кылбуръёссэ лыдӟизы Ижкарысь троллейбусын

21-тӥ южтолэзе, Кылбуретлэн дунневыл нуналаз, Ижкарысь 14 номеро маршрутэтӥ ветлӥсь троллейбусын Кузебай Гердлэсь кылбуръёссэ лыдӟизы. Акциез радъязы Удмуртиысь Кузебай Герд нимо йӧскалык музей, Кузебай Герд нимо йӧскалык гимназия но «ИжГорЭлектроТранс» муниципал предприяти.

Музейысь ӧнерчилэн Надежда Кузнецовалэн верамезъя, та выллем ужрад — троллейбусын кылбуръёсты лыдӟон — 2003-тӥ арын ортчылэм ни. Туэ Кузебай Герд вордскем дырысен 120 ар тырмонэз пусъемен валче сое нош ик радъяны малпазы.

Соку ик герӟаськимы гимназиен но «ИжГорЭлектроТрансэн». Кыкназы соос соглаш луэмзэс веразы. Озьы ми Кылбуретлэн калыккуспо нуналаз ми малпамы лэсьтыны

14 номеро маршрутэз юнме шорысь ӧз быръе — со Кузебай Герд ураметӥ ортче. Со сяна, та маршрут одӥгез тужгес кузез луэ, со быдэс карез ортче — Труд урамысен Буммаш микрорайонэтӥ, Удмурт, Воровский, Карл Либкнехт урамъёстӥ Строительёслэн городоказы («Завод Керамблоков» дугдылонниозь).

Кылбуръёсты гимназиын дышетскисьёс но музейын ужасьёс лыдӟизы. Со сяна, музейысь ӧнерчиос кӧня ке ужъёсты кагаз вылын поттыса, соосты транспортын мынӥсьёслы сётъязы.

10 фото

«Микрофонэз кутыса лыдӟыны ӧз дӥсьтэ, но лыдӟисен ӵош, мон адӟи, лыдӟизы соос. Троллейбусын эшшо ошылэмын Кузебай Гердлэн биографиез, солэн кылбуръёсыз. Адске, адямиос учко, лыдӟо шуыса. Со туж шумпотытэ: озьыен, токма ум лэсьтӥське», — вераз Надежда Кузнецова.

Гимназиын 9-тӥ классын дышетскись Аня Китова верамъя, одӥг пала мынытозь даслэсь трос кылбуръёсты лыдӟиз — ӟуч но удмурт кылын. Кепыр потон чик ӧй вал, шуэ нылаш.

Тунсыко вал, уката ик адӟиськиз, калыклы тунсыко шуыса. Чабизы но милем, дурбасьтӥзы. <…> Мон толон книгаосты библиотекаысь басьтӥ, дорын лыдӟи, аслым кельшымон кылбуръёсты бырйи. Мон ӟуч но, удмурт но кылын лыдӟи — адямиос пӧртэм кылбуръёсын мед тодматскозы

Соня Захарова гимназиын 8-тӥ классын дышетске. Солэн верамезъя, та трос калык азьын астэ возьматон ласянь умой опыт.

Мон нырысь ик туж пайми, малы ке шуоно со туж аспӧртэм — троллейбусын кылбуръёсты лыдӟон. Но собере малпай, со туж умой опыт луоз шуыса

Троллейбусын мынӥсьёс кылбуръёсты туж сак кылзӥзы, егитъёс пельысьтызы наушникъёссэс но поттылӥзы. Кылбур лыдӟисьёслы пальпотонъёсын но кичабонъёсын тау каризы.

Нялтас пусъёмы, Кузебай Герд урам Ижкарысь Ленин ёросын интыяськемын