Ижкар+1 °C
13 -тӥ оштолэзь 2021 Пуксён
18+

Кун Кенешын Удмуртилэсь дано кунмуртсэ Валентин Калининэз 80 арес тырмонэныз ӟечкылазы

  • 881
  • 0
Ижкар / Удмуртия
Кун Кенешын Удмуртилэсь дано кунмуртсэ Валентин Калининэз 80 арес тырмонэныз ӟечкылазы
Туспуктэм: Удмуртиысь Кун Кенешлэн пресс-службаез

Улосвыллэн Кун Кенешаз Удмуртилэсь дано кунмуртсэ, элькунысь Вылӥ Кенешлэн 11-тӥ ӧтчамезлэсь тӧрозэ Валентин Калининэз данъязы. Туннэ, 22-тӥ южтолэзе, солы 80 арес тырмиз. Со сярысь ивортэ улосвыл парламентлэн пресс-службаез.

Юбилярез ӟечкылазы Кун Кенешлэн тӧроез Алексей Прасолов, кивалтэтлэн тӧроез Ярослав Семёнов, гурт возёсъя но сиён-юонъя министрлэсь ужзэ быдэсъясь Ольга Абрамова, Вавож но Можга ёросъёслэн тӧрооссы, Кун Кенешысь депутатъёс, Мер палаталэн, Ижысь гурт возёсъя кун академилэн ыстэм муртъёсыз, ужъюлтошъёсыз но эшъёсыз.

Кун Кенешлэн тӧроез Валентин Калининлэсь Удмуртиез азинтон понна трос тыршемзэ пусйиз.

Тӥ шур пумиськылӥсь адями, Тӥ — ас калыктылэн йӧно пиез, Удмуртилэн пиез, кудӥз ас улоназ туж паймымонозэ лэсьтӥз. Тӥ 40 ар ӵоже одӥг колхозэн азинлыко кивалтӥды. <…> Кема улон Тӥледлы. Чебертэ элькунмес но опыттэс егитъёслы сётэ. Тӥледлы вань мар вераны но, вань мае сётыны. Шумпотымон, соос, кинлы тӥ оскиды предприятиен кивалтыны, озьы ик азьпалан мыно
Алексей Прасолов, Удмуртиысь Кун Кенешлэн тӧроез

Элькун парламентлэн тӧроез Вавож ёросысь Мичурин нимо колхозэ нырысьсэ вуылэмзэ тодаз ваиз. Чылкыт утялтэм скалъёс, асьсэ кожазы лэсьтэм автоматизация, нош гидлэн ватсэтаз сауна но бассейн. Сыӵезэ 15 ар талэсь азьло гинэ ӧвӧл, али но шер адӟод.

Удмуртилэн тӧроезлэн Александр Бречаловлэн нимыныз юбилярез кивалтэтлэн тӧроез Ярослав Семёнов ӟечкылаз.

Тӥлесьтыд адӟем карыны кулэ егит кивалтӥсьёс но, бадӟым кивалтӥсьёс но. <…> Тӥ кылдытӥды сыӵе инъет, кудӥз вылын ми туннэ но элькунэз азинтӥськомы. Кивалтэтлэн нимыныз оскытӥсько, тӥлесьтыд вань кутсконъёстэс ми азьланьтомы. Тау Тӥледлы бадӟым!
Ярослав Семёнов, Удмуртиысь кивалтэтлэн тӧроез

Удмуртиысь гуртоослэн нимынызы Валентин Калининлы тау кариз Кун Кенешлэн тӧроезлэн нырысетӥ воштӥсез Владимир Невоструев.

«Тӥлесьтыд школадэс тросэз гурт возёсъя академиысь ӧнерчиос, кивалтӥсьёс ортчизы, соос туннэ быдэс кунын ужало», — вераз со но асьме кунысь гурт возёсын туннэ вормонъёс Валентин Егорович кадь кивалтӥсьёслы луыса басьтэмын шуыса ватсаз.

Вавож ёросысь Мичурин нимо возёс элькунысь одӥгез тужгес азинлыкоез гурт предприятие. Зямбайгуртысь вань мерлыко ужъюртъёс возёс чотын пуктэмын. Валентин Калинин кивалтон вакытэ отын ву но чагыр эстӥськон гумыосты кыскизы, лулчеберетъя юрт, школа, фельдшер-акушер пункт пуктӥзы, сюресъёсты асфальтэн шобыртӥзы но урамъёстӥ электротыл кыскизы. Возёсын ужасьёслы 80 пала улон коркаос ӝутӥзы. Со гуртлэн ӝыны палаез. Удмуртия понна со тужгес азинлыко опыт, пусйизы юбилярез ӟечкыласьёс но Валентин Егоровичлы юн тазалык но кема улон сӥзизы.

Валентин Калинин ваньзылы шуныт кылъёссы понна тау кариз.



Наверх
Вниз