Ижкар+22 °C
11 -тӥ пӧсьтолэзь 2020 Кӧснунал
16+

2 сюрслэсь трос адями удмурт кылын диктантэз гожтӥз нимысьтыз радъям интыосын

  • 683
  • 0
Ижкар / Удмуртия
2 сюрслэсь трос адями удмурт кылын диктантэз гожтӥз нимысьтыз радъям интыосын
Туспуктэм: vk.com (Малопургинская районная библиотека)

31-тӥ южтолэзе «Бадӟым удмурт диктантэз» нимысьтыз радъям интыосын 2 сюрслэсь трос адями гожтӥз. Со сярысь ивортэмын ужрадлэн «ВКонтакте» вотэсысь бамаз.

Удмурт кылын шонер гожъяськыны быгатэмез эскерон туэ сизьыметӥзэ радъяськиз ни, но нырысьсэ Удмуртиын но солэн палэназ котькулэсь трос нимысьтыз интыос кылдытэмын вал. Кызьы ивортэмын элькунысь йӧскалык политикая министерстволэн сайтаз, Удмуртиын 97 площадка ужаз, эшшо 24-ез — удмуртъёс тросэн улон улосвылъёсын: Татарстанын, Башкортостанын, Пермь шаерын, Марий Элын.

Таяз арын диктантлэн текстэз тодмо удмурт кылбурчилы, тодосчилы но югдытӥсьлы Кузебай Гердлы сӥземын вал, солэн вордскемез дырысен туэ 120 ар тырмиз. Текстэз гожтӥз кылосбур тодосъя кандидат Александр Шкляев.

«Бадӟым удмурт диктантлэн» ужпумез — удмурт кылэз вӧлмытон, сое дышетыны мылкыд сётон

Ватсалом, со дыре ик диктантэз «Мынам Удмуртие» радиолэн меӵак эфираз лыдӟизы.

Диктантлэсь текстсэ, ужъемышъёсты (результатъёсты) но ӵемгес пумиськылӥсь янгышъёсын ивортонэз ужрадлэн «ВКонтакте» вотэсысь бамаз, озьы ик радъясьёслэн но юрттӥсьёслэн нимлыко сайтъёсазы 30-тӥ оштолэзёзь шараялозы. Рос-прос йылпумъянъёс лэсьтозы 1-тӥ инвожоозь.

Ватсалом, туэ «Бадӟым удмурт диктант» акциез «Мынам Удмуртие» телерадиокомпания но УдГУ-ысь Удмурт кылосбуръя, финно-угроведениея но журналистикая институт элькунысь Йӧскалык политика министерство но «Удмурт Кенеш» огазеяськон юрттэмен ортчытӥзы.



Наверх
Вниз