Удмурт урамысь 261 номеро юртын юртлэн куашкам подъездаз азьвыл улэм 31 семья улон интылы сертификатъёс басьтӥз. Со пӧлысь куатез патеръёс бырйиз но дун тырон сярысь тупанкылъёсты элькунысь лэсьтӥськонъя министерствое эскерон понна сётӥз ни. Со сярысь журналистъёслы вераз министрлэн воштӥсез Ольга Дубовцева.
Со газ пуштон дыръя патерзы изъянмыны шедем семьяос быдэн кык сертификат басьтӥзы шуыса пусйиз. Нырысетӥез — федерал коньдонлы, кыкетӥез — элькунлэсь, таиз патерлэсь
Туннэ адямиос асьсэос улон инты бырйыны быгато: выль юртын яке азьвыл пуктэмъёсаз. Лэсьтӥськисьёс соослы вуттэм юртъёсазы патер висъязы, яке лэсьтӥськись коркаын басьтыны луонлык вань. Но милям одӥг куронмы вань —трос патеръем корка 70 процентлы вуттэмын луыны кулэ
Дубовцева озьы ик ватсаз, шугадӟонэ шедемъёслы федерация 58 миллион манет висъяз шуыса, элькун коньдэт 27 миллион манет ватсалоз.
Со сяна, элькун тӧрлыкъёс куашкам подъездын улӥсьёсты капчиятэм ипотека (6 процентэн) басьтыны быгатӥсьёс пӧлы пыртыны пумкылъян кутӥзы.
Удмуртиысь лэсьтӥськонъя министерствоын ивортэмзыя, матысь кык толэзьёсы ваньмыз семьяос выль патеръёс бырйыны но тыриськон сярысь ужкагазъёсты министерствое эскерыны сётыны кулэ.
Озьы ик удысэтын веразы, улон интылы сертификат со юртын улӥсь одӥг мурт гинэ ӧз басьты шуыса. Со адямиез подъездэз куашкатэмен янгыше уськыто.
Тодэ вайытом, Ижкарысь Удмуртской урамысь 261 номеро юртлэн сэрегез кылем арын 9-тӥ шуркынмонэ куашказ.