Ижкар+1 °C
13 -тӥ оштолэзь 2021 Пуксён
18+

Мерлыко вотэсын #Инстаудмурточки марафон мынэ

  • 827
  • 0
Ижкар / Удмуртия
Мерлыко вотэсын #Инстаудмурточки марафон мынэ
Туспуктэм: instagram.com (vera_wonderbera)

Мерлыко вотэсъёсты #Инстаудмурточки марафон тулкымъяськытэ. 23-тӥ куартолэзе кутскем ужрадэ 256 нылъёс пырисько. Ивортодэтъя «Удмуртия» агентстволы со сярысь вераз ӵектослэн кылдытӥсез, блогер Вера Трефилова.

Солэн кылъёсызъя, марафон борды итӥськизы Удмуртиысь, Татарстанысь, Башкортостанысь, Ямалысь, Екатеринбургысь, Москваысь, Рязаньысь, озьы ик Венгриысь, Австриысь, Ирландиысь, Германиысь, Болгариысь, Лымшор Азиысь нылъёс.

Мон ӧй малпа сыӵе зол ажиотаж луоз шуыса. Валамон, сыӵе паськыт вӧлмемезлы туж шумпотӥсько
Вера Трефилова, марафонлэн кичӧлтӥсез

Вера Трефилова нимысьтыз пусъе – та марафон нылъёс пӧлын чеберлыкъя конкурс ӧвӧл. Солэн валтӥсь ужпумез – дуннеысь калыкез удмуртъёсын, Удмуртиен тодматон. Но котькуд туспуктэм ӵапак чеберлыкез возьматэ – адямилэсь, инкуазьлэсь.

Марафонлэн кичӧлтӥсез тодаз вайиз, кызьы та ужрадэз ортчытыны малпанэз кылдӥз.

Радиоын ужакум милям огинамы ивор потӥз: Яндекс кылдытэм карта, кытын возьматэмын, кыӵе стереотипъёс кылдэмын Россиысь улосвылъёсын улӥсьёс сярысь. Мыным, удмуртлы сямен, туж ӧз кельшы удмуртъёс сярысь вӧлмем малпан – соос, пе, шӧтэмесь. Соку мон аслэсьтым туспуктэмме шараяй но гожтӥ, мон удмурт но мон соин данъяськисько шуыса
Вера Трефилова, марафонлэн кичӧлтӥсез

Ужрадэ пыриськись нылъёслы котькуд нунал кыӵе ке но куронъёс сётӥсько. Кылсярысь, соос веразы ни асьсэ сярысь – кӧня арес, кӧня процентлы со удмурт луэ, кыӵе гуртысь выжыосыз, вераське-а удмурт кылын. Озьы ик нылъёс веразы, кыӵе удмурт нылкышно соос адӟем карымон луэ. Туннэ удмурт сиён-юонъёс сярысь вераны кулэ. Вуоно вордӥськонэ но пуксёнэ мукет куронъёс луозы на.

Марафонлэн «ужан кылыз» – ӟуч кыл. Со юри озьы малпамын, озьы тросгес адями ивортонъёсты лыдӟыны быгатоз, угось удмуртъёс ӵемысьгес «асьсэ пуртыязы гинэ пӧзё, нокинлы, номыр уг верало», шуэ Вера Трефилова. Но со дыре ик удмурт кылын но гожъяны ӵектэ – тужгес чебер, тунсыко удмурт текст понна нимысьтыз кузьым луоз.

Паймымон, марафонэ пыриськисьёслы кузьымъёс висъяны мылкыд карисьёс туж трос шедизы, шуэ блогер. Туннэ нуналлы 40 спонсоръёслэсь 80-90 кузьым вань ни – со дэремъёс, косметика, турынъёслэсь чай, ческыт сиёнъёс, буртчин кышетъёс, озьы ик дӥськутэз стилистэн ӵош дунъяны, массаж лэсьтыны, фотосессия ортчытыны луонлык но мукет.

#Инстаудмурточки марафонлы йылпумъянъёс лэсьтозы вуоно арня ӵоже. 



Наверх
Вниз