Ижкар+27 °C
12 -тӥ пӧсьтолэзь 2020 Воскресенье
16+

«Удмуртилэн командаез» вожвылъяськонэ удмурт кадръёсъя резервысь ӧнерчиос но пыриськозы

  • 533
  • 0
Ижкар / Удмуртия
«Удмуртилэн командаез» вожвылъяськонэ удмурт кадръёсъя резервысь ӧнерчиос но пыриськозы
Туспуктэм: Наталья Еркешева

«Удмурт Кенеш» огазеяськонэн 11 толэзь азьвыл кылдытэм удмурт кадръёсын резервысьтыз 35 адями - со дась ӧнерчиос. Ваньмыз резервын 68 мурт, кылемез 33-ез — со школаын яке вузын дышетскись егитъёс. Со сярысь туннэ, 31-тӥ куартолэзе, кадръёсъя резервен пумиськонын ивортодэтъя «Удмуртия» агентстволы мер огазеяськонлэн исполкомезлэн ёзчиез Александр Скобкарёв вераз.

68 мурт пӧлысь 35-ез — со оперативной резерв шуиськом. Озьыен со резервысь адямиос дасесь, коть туннэ ик соос пуксёзы но ужаны кутскозы ни, дась адямиос. 33-ез со егитъёс, кудӥз соос школаын дышетско на, кудӥз институтын дышетско. Ми малпаськомы, милям ужпуммы соослы юрттыны
Александр Скобкарёв, «Удмурт Кенешлэн» исполкомезлэн ёзчиез

Солэн кылъёсызъя, «Удмурт Кенешлэн» сяна, элькунысь нокыӵе мер огазеяськон бордын кадръёсын резервзы ӧвӧл, соин ик та ӧръя ужан амалъёсты кенешчиослы но резерве пырисьёслы ӵошен утчано луоз. Со понна пумиськонэ люкаськемъёс асьсэлэсь ӵектонъёссэс шараязы.

Калык шуиз, ӵемгес люкаськылоно но кыӵе ке конкретной ужпумъёсты эскероно. Кык-куинь нунал кыӵе ке шугъяськонэн пуконо, вераськоно со сярысь. Кызьы сое шуо, «влиться в проблему». Озьыен ужано, ужано но тӥни
Александр Скобкарёв, «Удмурт Кенешлэн» исполкомезлэн ёзчиез

Удмурт кадръёсъя резерве шаплы адямиос пыремын, соин ик соослы юрттэт гинэ возьмаса пуконо ӧвӧл, лыдъя «Удмурт Кенешлэн» исполкомезлэн ёзчиез. Со малпамъя, котькуд адями ачиз понна сюрес бырйыны но пуктэм ужпумзэ быдэстон понна со кузя мыныны кулэ.

Кызьы шуиз ивортодэтъя «Удмуртия» агентстволэн корреспондентэзлы Удмурт кун университетысь дышетӥсь но Егитъёслэн парламентсылэн ёзчиез Александр Корепанов, ӵапак удмурт кадръёсъя резерве пырон понна вожвылъяськон сое мукет ужъёсы пыриськыны бурдъяз.

Мон тае адӟи, та конкурсэз, соин ик мылкыд ӝутскиз пыриськыны та вожвылъяськонэ. Та ик конкурсэ пыриськон, малпасько, мынэсьтым мылкыдме ӝутӥз Егитъёслэн парламентазы но пыриськыны. Али мылкыд бурдъяське та конкурс улсын но Егитъёслэн парламентсы улсын улонме герӟаны кун службаен
Александр Корепанов, Удмурт кун университетысь дышетӥсь

Та удысэ нырысетӥ вамыш лэсьтэмын ни — Александр Корепанов Ижкарысь гурт возёсъя академиын «Кун но муниципал управление» ӧръя дышетскиз. Нош али воргорон «Команда Удмуртии» вожвылъяськонэ пыриськыны малпа.

Мон сое учки, ваньзэ эскери, малпаськи. Мылкыды мынам вань пыриськыны, дэмланъёс но вань. Мед пырисько шуыса, эшъёсы дэмлазы, кенеш сётӥзы, шуом. Малпасько, пырисько, асме эскеро
Александр Корепанов, Удмурт кун университетысь дышетӥсь

Нялтас вераса, удмурт кадръёсын резервлэн пумиськоназ вожвылъяськонъёсы пыриськонлэсь кулэлыксэ но пусйизы. «Удмурт Кенешлэн» тӧроезлэн воштӥсез Владимир Байметов интыуж понна вожвылъяськонъёсты лотереен ӵошатӥз. Ми лотерея билет басьтӥськом ке, ум возьмаське одно ик вормом шуыса, но вормон понна билет басьтыны кулэ, шуиз со. Озьыгес ик интыуж понна конкурсъёсын но — вормон понна пыриськоно, нош ӧд вормы ке, ӝожтӥськытэк азьлань мыноно.

Тодэ вайытом, «Удмурт Кенеш» йӧскалык кадыръёсты дасянъя валтэт кылдытоз шуыса 2017-тӥ арын тулыспалэ тодмо луиз. Нош 2017-тӥ арын южтолэзе удмурт кадръёсын резерв кылдытон сярысь ужкагаз уже кутыны дась ни вал.



Наверх
Вниз