Москваын улӥсь удмуртъёс футбол понна висисьёсты Удмуртиен тодматӥзы

Москваын улӥсь удмуртъёслэн бӧляксы Россиысь но быдэс дуннеысь футбол понна висисьёсты Удмуртиен тодматӥз. 4-тӥ пӧсьтолэзе ог кызё пала адями улосвыллэн куншетэныз, удмурт дӥсен Никольской ураме люкаськиз. Ивортодэтъя «Удмуртия» агентстволы со сярысь вераз Балезино ёросын вордскем но али кунлэн шоркараз улӥсь Евгений Максимов.

Отын трос фанатъёс ветло, пӧртэм кунъёсысь. Соин ик ми отчы мыныны малпамы. Марина Бородина ӵектӥз, ойдолэ, пе, люкаськомы возьматыны, мар со сыӵе Удмуртия. <…> Не только иностранецъёс, Россиысь калык но юало, кыӵе со флаг, кинлэн со флагез. Россиысь но тросэз уг тоды, ма со сыӵе Удмуртия. Луоз-а, шуо, тӥледын фото лэсьтыны, англи сямен вераськыны кутско!

Солэн кылъёсызъя, кунгож сьӧрысь вуэмъёс лыктыса котырто, эктэмзэс-кырӟамзэс учко но асьсэос но пӧлазы эктыны пыро. Кин ке телефонысьтыз меӵак возьматон нуыны кутске. Евгений Максимовлэн верамезъя, Удмуртилэсь куншетсэ тросэз Канадалэн флагеныз сурало. Уноез сьӧрлось куноос Калашниковлэсь автоматсэ тодо, но со Удмуртиен, Ижкарен герӟаськемын шуыса уг тодо. Озьы вераськон куспын пӧртэм кунъёс но калыкъёс сярысь ог-огзылэсь тодонлыксэс узырмытӥзы шуыны луоз.

10 фото

Евгений Максимов пусйиз, куноослэн Россиылы но татысь калыкъёслы пумит мылкыдъёссы чик ӧвӧл шуыса.

Нокин но урод уг вера, ваньзы ӟеч верало, ваньмыз умой радъямын, шуо, ваньмыз шумпото. Дуннелэн чемпионатысьтыз потэм кунъёсысь болельщикъёс но кыльылэмын на. Толон ми бордын вал Аргентинаысь болельщикъёс трос. Нырысь калык соосты учкиз, соос тоже кырӟало вал да, мар да. Сэре ми доры калык люкаськыны кутскиз ни. Позитивной реакция иностранецъёслэн Россилы но, милем но

Озьы ик со ватсаз, Никольской ураметӥ мынӥсь-ветлӥсьёс пӧлысь но Удмуртиысь адямиосты пумитазы шуыса. Кылсярысь, ачиз со Балезино ёросысь улосчиеныз пумиськем. Зол зорыны ӧй ке кутскысал, кемагес но отын улысалмы, шуэ Евгений Максимов. Матысь дыре эшшо одӥг таӵе ужрад ортчытыны вераськизы.