Ижкар+12 °C
10 -тӥ куартолэзь 2021 Вордӥськон
18+

Фронтын ужам пунылэсь тусбуйзэ суреданъя конкурсэ пыриськыны ӧтё Удмуртиысь пиналъёсты

  • 624
  • 0
Ижкар / Удмуртия
Фронтын ужам пунылэсь тусбуйзэ суреданъя конкурсэ пыриськыны ӧтё Удмуртиысь пиналъёсты
Туспуктэм: Николай Кузнецов

Удмуртиысь пиналъёс Москваысь Вормон музеен ялэм «Портрет фронтовой собаки» огъяросси вожвылъяськонэ пыриськыны быгато. Суреданы луэ Быдӟым Атыкай оже пыриськем ньыль пыдо героез яке служебной пунылэсь огазеям тусбуйзэ. Со сярысь ужъюртлэн ивортодэтъя центрез ивортэ.

Вожвылъяськон кык группаын мынэ: 7-10 но 11-17 аресъем дышетскисьёс пӧлын. Суредъёс пӧртэм амалэн быдэстэмын луыны быгато – вӧй, акварель, тушь, буёло карандашъёс, мелокъёс но мукет.

Котькуд номинациын вормисьёс музейлэн вань площадкаосаз ар ӵоже вить пол дунтэк ветлыны луонлык сётӥсь карта басьтозы. Устооссэ ужъёсты Вормон музейлэн нимлыко сайтаз но мерлыко вотэсъёсысь огинъёсаз шараялозы.

Конкурсэ пыриськон понна ужъёсты 13-тӥ гудырикошконозь konkurs@cmvov.ru электрон почтае келяно. Вожвылъяськонлы йылпумъянъёс 19-тӥ гудырикошконэ тодмо луозы. Со нуналэ Вормон музей «Фронтысь пуныез буре ваён нунал» ортчоз.

ВАТСАН

Быдӟым Атыкай ож дыръя пуныос связист но санитар, диверсант но разведчик луыса ужазы. Фронтъёсын 60 сюрслэсь трос пуныос служба нуизы. Соос 700 сюрс пала сӧсырмемъёсты ыбылӥськон улысь поттӥзы, передовое 8 сюрс 862 тонна боеприпасъёс вуттӥзы, 8 сюрс иськем мында телефон езъёс кыскизы, 300 танкъёс пуштытӥзы, 4 миллион минаос но фугасъёс шедьтӥзы. 1945-тӥ арын Вормон Парад дыръя Горд площадетӥ фронтысь пуныосын проводникъёс но ортчизы. 
 Тужгес тодмо пуныос-геройёс:  
Сапёр Джульбарс - пуныос пӧлын со гинэ «За боевые заслуги» медален пусъемын. 7 сюрс 468 минаосты но 150-лэсь трос снарядъёсты разминировать кариз. Вормон Парадэз сӧсыр луыса пумитаз.  
Минаосты утчась Рик - 12 сюрс минаосты шедьтӥз но разминировать кариз. Ленинградын котыртэмын улӥз но Павловской дворецез утьыны юрттӥз. Сое пуштытэмлэсь 1 часлы азьвыл инъетысьтыз 2,5 тоннаем бомабаез шедьтӥз.  
Диверсант Дина – нырысетӥез пуны-диверсант. Быдэс дуннеын со гинэ чугун сюрес вылэ мина понӥз но немецъёслэсь эшелонзэс пуштытӥз.  
Разведчик Джек – проводникеныз ӵош 20-лэсь трос «кылъёсты» кутӥзы, соос пӧлын юн зол возьмаськись Глогау крепость пушкын пленэ кутэм офицер. 
Связист Рекс – войскоосы 1 сюрс 649 донесениосты вуттӥз. Кӧня ке пол сӧсыртэмын вал, куинь пол Днепрез выжылӥз, но котьку аслаз постаз вуылӥз.  
Санитар Мухтар – ожмаськон бусыосысь 400-лэсь трос сӧсыртэм ожгарчиосты поттӥз. Озьы ик аслэсьтыз проводниксэ но утиз.

Тодэ вайытом, Удмуртиысь егитъёс Быдӟым Атыкай ожлы сӥзем асьсэ кылбуръёссэс огъяросси конкурсэ ыстыны быгато. Россиысь дышетонъя но тодосъя министерствоен ялэм вожвылъяськонэ ужъёсты куарусёнозь куто. 



Наверх
Вниз