Ижкар+1 °C
13 -тӥ оштолэзь 2021 Пуксён
18+

Удмуртиысь Калыкъёслэн эшъяськон юртсы 10 ар тырмонзэ пусйиз

  • 1113
  • 0
Ижкар / Удмуртия
Удмуртиысь Калыкъёслэн эшъяськон юртсы 10 ар тырмонзэ пусйиз
Туспуктэм: Удмуртиысь тӧролэн но кивалтэтлэн пресс-службазы

Туннэ, 5-тӥ куарусёнэ, Удмуртиысь Калыкъёслэн эшъяськон юртсы 10 ар тырмонзэ пусйиз. Сӥё-дано ужрадэ ужъюртын ужасьёс, лулчеберетъя йӧскалык огазеяськонъёслэн, министерствоослэн но удысэтъёслэн, Ижкарлэн, улосвыл тӧролэн но кивалтэтлэн ыстэм муртъёссы пыриськизы.

Удмуртиын 100-лэсь трос йӧслыкъёс уло, тужгес трос лыдъемъёсызлэн асьсэлэн огазеяськонъёссы кылдытэмын. 1990-тӥ аръёс пумын ай соос нимаз юрт кулэ вылэм шуыса вераськон ӝутылӥзы. Соослы дурбасьтӥзы элькунысь йӧскалык политикая министръёс но: нырысь - Николай Мусалимов, собере – Владимир Завалин. Ваньзы ӵошен соос улосвыллэн азьмуртэзлы Александр Волковлы Эшъяськон юртлэсь кулэлыксэ валэктыны быгатӥзы.

Нимаз юрт ӧвӧлэн йӧскалык огазеяськонъёс котькуд ужрадзылы инты, сое арендае басьтыны коньдон утчано луо вал, ивортодэтъя «Удмуртия» агентстволэн корреспондентэнызы вераськонын тодаз ваиз Николай Мусалимов.

«Пӧртэм вариантъёс учким тӥнь та юртлы. Садикъёсты но ми учким вал. Но соку механикая заводлэн культурая юртэз куашка дыре вуэмын вал ни, татын уг ужало вал. Сэре огпол Александр Александрович давайте, пе, лэсьтоно ке калыккуспо улон понна, тем более Удмуртия котьку но висъяськылӥз, вань калыкъёс тупаса уло шуыса, давайте лэсьтомы, пе, зэмос именно инты мед луоз котькуд национальной объединенилы», - вераз Мусалимов.

Удмуртиысь Калыкъёслэн эшъяськон юртсылы - 10 ар

9 фото

Юртэз быдэсак выльдыны куинь ар кулэ луиз. Калыкъёслэсь эшъяськон юртсэс 3-тӥ куарусёнэ 2008-тӥ арын усьтӥзы.

Туннэ нокинлы но, дыр, ӧвӧл валэктоно талэсь кулэзэ. Кӧня ужрадъёс тани татын нуисько! Зэмзэ но ас бордаз вань калыкъёсты бинялтэ, бурд улаз возе, шуыны быгатом. Та Эшъяськон юрт пыр но тупаса уло вань калыкъёс, азьланяз но озьы ик мед луоз
Николай Мусалимов, 1999-2001 аръёсы Удмуртиысь йӧскалык политикая министр

Ольга Степанова Калыкъёслэн эшъяськон юртазы ужаны лыктӥз вить ар талэсь азьло, али со йӧскалыккуспо ёзэтлэн кивалтӥсез луэ. Та юрт огшоры ужан инты гинэ ӧвӧл, нырысь ик – дышетскон, шуо со.

Нырысь ик мон татчы сюри, куке ужаны кутски «Шунды» огазеяськонлэн кивалтӥсез сямен, соин ик со нырысь ик мон понна бадӟым юрттэт луиз, малы ке шуоно татын ужало вал сыӵе ӧнерчиос, зэмос ӧнерчиос, кудъёсыз юрттӥзы мыным та уже пырыны, йӧскалык уже, тодматскыны пӧртэм калыкъёсын, соослэн культураенызы. Пӧртэм бадӟым проектъёсын ужаны кутски и татын ӵапак со луиз сыӵе инты, кытын мон быгатӥ трос аслым басьтыны, трос дышетскыны. Соин ик нырысь ик со сыӵе дышетскон инты но луиз, огшоры ужан инты сяна
Ольга Степанова, Калыкъёслэн эшъяськон юртысьтызы йӧскалыккуспо ёзэтлэн кивалтӥсез

Калыкъёслэн эшъяськон юртазы кӧня ке ёзэтъёс ужало. Одӥгез йӧскалык огазеяськонъёслы туннэ туж гранатъёс утыны ӵектосъёс дасяны юрттэ, мукетыз финн-угор кусыпъёсты радъя но юнматэ, куинетӥез муниципал кылдытэтъёсын ужа.

Удмуртиысь йӧскалык политикая министрлэн Лариса Бурановалэн верамезъя, каръёсын но ёросъёсын ужан – нырысетӥ интыын сылыны кулэ.

Кыӵе ке секыт учыръёс но, соос кылдо «музъем вылын» - гуртъёсын, каръёсын. Соин ик асьмелы сыӵе быдэс сетка кулэ лэсьтыны, одӥг организм кадь мед ми быгатомы ужаны. Отын, интыяз ик адямиос, огазеяськонъёс но кивалтӥсьёс мед быгатозы тӥнь та материалын, мон шуысал, ужаны. Ми татын, Ижевскын, ум быгатӥське шӧдыны <… > югдурез, кудӥз кылдэ кыӵе ке но гуртъёсын, соин ик соос интыяз кулэ сое ваньзэ тодыны но шӧдыны. <…> Соку гинэ, ку ми ваньмы ӵош ужалом, соку гинэ луоз вераны экономика сярысь но, мукет но кыӵе ке вормонъёс сярысь. Нырысь интыын – эшъяськон но тупаса улон
Лариса Буранова, Удмуртиысь йӧскалык политикая министр

Эшшо одӥгез ужпум – пӧртэм калыкъёсын котыр ласянь тодматон. Министр вераз, туннэ иворъёсты вӧлмытӥсь ёзэсъёс ӵемысьгес ужрадъёсысь ивортонъёс гинэ сёто шуыса. Калыкъёс сярысь мургес материалъёс уг тырмо. Та ужпумез сэрттон-пертчон вылысь Калыкъёслэн эшъяськон юртазы ивортодэтъя но аналитикая туала центр кылдытӥське.

Нялтас вераса, та ужрадын ик пусйизы ивор вӧлмытӥсь ёзэсъёс пӧлын ортчем «Удмуртиысь бесерманъёс» элькун вожвылъяськонын вормисьёсты. Конкурсэ даслэсь трос ёзэсъёсысь 30-лэсь трос ужъёс вуизы. Вормисьёс пӧлын ивортодэтъя «Удмуртия» агентстволэн «Кӧрбан» шулдыръяськонысь репортажез.

«Калыкъёслэн эшъяськон юртсы – со туж шонер ним. <…> Удмуртилэн нырысетӥ азьмуртэз Александр Александрович Волков 10 ар талэсь азьло та Юртэз усьтон пумысен пумкылъян гинэ ӧз куты, со трос лэсьтӥз элькунамы югдур огсыр мед луоз шуыса, одӥг липет улэ элькунысь вань йӧскалык огазеяськонъёслэсь азьветлӥсьёссэс огазеяз», - вераз Удмуртиысь тӧролэн но кивалтэтлэн администрацизылэн кивалтӥсез Сергей Смирнов но ужъюртлы трос выль ӵектосъёсты быдэстыны сӥзиз. 

Калыкъёслэсь эшъяськон юртсэс кылдытыса, Удмуртия туж шонер вамыш лэсьтӥз шуыса пусйизы тросэз сӥё-дано ужрадэ люкаськемъёс. Лариса Буранова эшшо тодаз ваиз, Ижкаре лыктэм куноос та юртэз дворец нималлязы, сыӵе со йӧно но узыр адӟиське, малы, пе, юрт шуиськоды. Но министр пусйиз, со малпамезъя но пуштросэзъя юрт луэ. Юрт, кытын ваньмызлы инты тырме, отын шуныт но каньыл потэ. 



Наверх
Вниз