Ижкар-1 °C
27 -тӥ шуркынмон 2021 Кӧснунал
18+

Ӟуч-удмурт кыллюкам поттозы Удмуртилэн кунлыкезлы 100 ар тырмонлы

  • 1972
  • 0
Ижкар / Удмуртия
Ӟуч-удмурт кыллюкам поттозы Удмуртилэн кунлыкезлы 100 ар тырмонлы
Туспуктэм: Григорий Фомин

Удмуртилэн кунлыкезлы 100 ар тырмонлы ӟуч-удмурт кыллюкам поттозы. Нырысь ик электрон амалэн вуоз, собере – кагаз вылын. Ивортодэтъя «Удмуртия» агентстволы со сярысь вераз Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая институтэзлэн кивалтӥсез Игорь Поздеев.

Та дырлы милям институтэнымы ӟуч-удмурт кыллюкамлэн академ изданиезлэсь рукописез дасямын. <…> Сое поттыны коньдон Йӧскалык политикая министерство сётэ. Вуоно арын кыллюкамлэсь электрон амалзэ дасяны чакламын (асьтэос валаськоды, али со печатлам текстлэсь но кулэгес луэ), нош 2020-тӥ арын - печатласа поттыны
Игорь Поздеев, Эскеронъёсъя удмурт федерал центрлэн Историяя, кылъя но литературая институтэзлэн кивалтӥсез

Солэн верамезъя, кыллюкамын 1 сюрс 400 бам. Отчы 55 сюрс валтӥсь кылъёс пыртэмын. Ӵошатон понна, 2008-тӥ арын потэм удмурт-ӟуч кыллюкамын 50 сюрс пала кылъёс.

Кыллюкамез кылдытон куинь ар пала мынӥз. Кылъёсты берыктон бордын Кылосбур эскеронъёсъя ёзэтысь ӧнерчиос ужазы. Кылъёсты берыктон тодос вылэ пыкиськыса, туж вылӥ удысужлыко (профессионально) лэсьтэмын, пусйиз Игорь Поздеев.

Кыллюкам бордын быдэс ёзэт ужаз - 10 лингвистъёс ужазы, ваньзы тодосъя кандидатъёс но докторъёс. <…> Карпова, Титова, Кириллова, Егоров, Ившин, Душенкова, Шибанов, Максимов – валтӥсь ӧнерчиос, кин кыллюкам бордын ужаз
Игорь Поздеев, Эскеронъёсъя удмурт федерал центрлэн Историяя, кылъя но литературая институтэзлэн кивалтӥсез

Тодэ вайытом, Удмуртилэн кунлыкезлы 100 ар тырмоз 2020-тӥ арын. Сое пусъён улсын ужанрадлыке пӧртэм ужрадъёс пыризы. Соос пӧлын йӧскалык театръёслэн огъяросси фестивальзы, Удмуртиысь калыкъёслэн конгрессы, финн-угор дуннеысь улосвылъёс но кунъёс пӧлын пневматика тӥрлыкысь ыбылӥськонъя калыккуспо ӵошатсконъёс, пӧртэм фестивальёс, адӟытонъёс, озьы ик улосэз умоятон но лэсьтӥськон ужъёс. 



Наверх
Вниз